រាជធានីភ្នំពេញ៖ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអំពាវនាវដល់គ្រប់ភាគីពាក់ព័ន្ធទាំងអស់ បន្តរួមដំណើរជាមួយកម្ពុជាក្នុងកិច្ចការបោសសសម្អាតមីននៅដំណាក់កាលចុងក្រោយនេះ…។
អនុប្រធានទី១ អាជ្ញាធរមីន បានបញ្ជាក់ថា ដំណាក់កាលចុងក្រោយនៃការបោសសម្អាតមីននៅកម្ពុជា មានភាពស្មុគស្មាញ និងត្រូវការធនធានច្រើន។ លោកបានអំពាវនាវឱ្យប្រទេសម្ចាស់ជំនួយ ដៃគូអភិវឌ្ឍន៍ និងគ្រប់ភាគីពាក់ព័ន្ធ បន្តរួមដំណើរជាមួយកម្ពុជា ដើម្បីសម្រេចបាននូវគោលដៅកម្ពុជាមួយ ដែលរួចផុតពីផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។ លោក លី ធុជ មានប្រសាសន៍ដូច្នេះ ក្នុងនាមតំណាង សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងពិធីប្រកាសផ្សព្វផ្សាយដាក់ឱ្យប្រើប្រាស់ជាផ្លូវការ «គោលនយោបាយជាតិ ស្តីពីសកម្មភាពមីន ឆ្នាំ២០២៦-២០៣៥» នៅទីស្តីការគណៈរដ្ឋមន្ត្រី នាថ្ងៃទី២ ខែកញ្ញា ឆ្នាំ២០២៦។ គោលនយោបាយជាតិថ្មីនេះ បាននាំមកនូវការផ្លាស់ប្ដូរសំខាន់មួយ គឺការវាស់វែងភាពជោគជ័យ មិនត្រឹមតែតាមផ្ទៃដីដែលបានបោសសម្អាតទេ ថែមទាំងត្រូវវាស់តាមអ្វីដែលប្រជាជនអាចកសាង និងទទួលបានប្រយោជន៍ពីដីដែលបានបោសសម្អាតរួច។
លោក លី ធុជ បានគូសរំលេចថា សកម្មភាពមីន មិនមែនជាការងារបន្ទាប់បន្សំនោះទេ ប៉ុន្តែគឺជាស្នូលនៃការអភិវឌ្ឍជាតិ ជាការប្តេជ្ញាចិត្តចំពោះប្រជាជនកម្ពុជា និងជាការសន្យាចំពោះមនុស្សជំនាន់ក្រោយ។ សកម្មភាពមីន ត្រូវបានរាជរដ្ឋាភិបាលចាត់ទុកជាផ្នែកសំខាន់នៃយុទ្ធសាស្ត្រអភិវឌ្ឍជាតិ។ ក្នុងរយៈពេលជាង៣ទសវត្សរ៍ ការបោសសម្អាតមីន និងសំណល់ជាតិផ្ទុះពីសង្គ្រាម បានកាត់បន្ថយយ៉ាងខ្លាំងនូវផលប៉ះពាល់ដល់ប្រជាជន ហើយដីដែលបានបោសសម្អាត កំពុងត្រូវបានប្រើប្រាស់សម្រាប់កសិកម្ម ការអប់រំ ហេដ្ឋារចនាសម្ព័ន្ធ និងការវិនិយោគ ជាដើម។ លោកបានថ្លែងអំណរគុណចំពោះប្រទេសម្ចាស់ជំនួយ ដៃគូអភិវឌ្ឍន៍ ប្រតិបត្តិករបោសសម្អាតមីន សង្គមស៊ីវិល វិស័យឯកជន សប្បុរសជន និងភាគីពាក់ព័ន្ធទាំងអស់ ដែលបានចូលរួមចំណែកក្នុងបេសកកម្មមនុស្សធម៌នេះ។ ជាការឆ្លើយតប តំណាងប្រទេសផ្តល់ជំនួយ ដៃគូអភិវឌ្ឍន៍ និងវិស័យឯកជន បានវាយតម្លៃខ្ពស់ និងប្តេជ្ញាចិត្តបន្តគាំទ្រគោលដៅកម្ពុជាមួយគ្មានផលប៉ះពាល់ដោយយុទ្ធភណ្ឌគ្រឿងផ្ទុះ៕
