ទីក្រុងតៃប៉ិ៖ កងទ័ពជើងទឹករបស់កោះតៃវ៉ាន់ កំពុងបង្ហាញផែនការទិញយន្ដហោះគ្មានមនុស្សបើក ឬដ្រូន ប្រភេទ Albatross II ចំនួន៣២គ្រឿង និងដ្រូនប្រភេទ V-Bat ចំនួន២៨០គ្រឿង ដើម្បីពង្រឹងសមត្ថភាពតាមឃ្លាំមើល និងការយល់ដឹងអំពីស្ថានភាពនៅក្នុងដែនសមុទ្ទ ស្របពេលដែនកោះគ្រប់គ្រងដោយការផ្តាច់ខ្លួនពីនាគរាជចិនមួយនេះ កំពុងរងសម្ពាធកាន់តែខ្លាំងឡើងពីមួយថ្ងៃទៅមួយថ្ងៃ...។
សារព័ត៌មាន Taiwan News បានចេញផ្សាយនៅព្រឹកថ្ងៃអង្គារទី១ ខែកញ្ញានេះថា កងទ័ពជើងទឹកកោះតៃវ៉ាន់ បានបែងចែកថវិកាចំនួន១៦,៧៨ពាន់លានដុល្លារតៃវ៉ាន់ ឬស្មើនឹង៥៣០លានដុល្លារអាម៉េរិក សម្រាប់រយៈពេលចន្លោះពីឆ្នាំ២០២៦ ដល់ឆ្នាំ២០២៩ ដើម្បីទិញដ្រូន Albatross II ចំនួន៣២គ្រឿង ស្ថានីយបញ្ជាចំនួន៨ និងយានយន្តដឹកជញ្ជូនចំនួន៤៨គ្រឿង។ ក្រៅពីនេះ កងទ័ពជើងទឹកតៃវ៉ាន់ ក៏បានចាត់ចែងថវិកាចំនួន៣៦ពាន់លានដុល្លារតៃវ៉ាន់ផ្សេងទៀត ក្នុងរយៈពេលដូចគ្នានេះ សម្រាប់ទិញដ្រូន V-Bat ចំនួន២៨០គ្រឿង ប្រព័ន្ធបញ្ជាចំនួន១៤០ និងយានយន្តដឹកជញ្ជូន ចំនួន៨២គ្រឿងបន្ថែម។
កងទ័ពជើងទឹកតៃវ៉ាន់ ក៏បានសង្កត់ធ្ងន់ទៅលើសារសំខាន់នៃការដាក់ឱ្យប្រើប្រាស់ដ្រូន ប្រភេទផ្សេងៗទៀត ដើម្បីតាមដានសញ្ញានៃសកម្មភាពយោធា ដែលអាចកើតមានពីប្រទេសចិន ប្រឆាំងនឹងកោះតៃវ៉ាន់។ ដ្រូន ប្រភេទ Albatross II និង V-Bat នឹងជួយពង្រឹងសមត្ថភាពស្វែងរកនៅក្នុងដែនសមុទ្ទ និងការកំណត់អត្តសញ្ញាណគោលដៅ ព្រមទាំងការពារប្រឆាំងនឹងការវាយប្រហារលើប្រព័ន្ធបញ្ជា និងគ្រប់គ្រងដំណាក់កាលដំបូង នៃការផ្ទុះជម្លោះ។
បើតាមទូរទស្សន៍របស់សិង្ហបុរី CNA បានឱ្យដឹងថា វិទ្យាស្ថានវិទ្យាសាស្រ្ត និងបច្ចេកវិទ្យាជាតិចុងសាន (Chung Shan) បានរចនាដ្រូន Albatross II ជាមួយនឹងការកំណត់រចនាសម្ព័ន្ធផ្ទុកឧបករណ៍ ដែលអាចផ្លាស់ប្តូរបាន ដោយអាស្រ័យលើតម្រូវការ សម្រាប់បេសកកម្ម។ ដ្រូនប្រភេទនេះ អាចផ្ទុកឧបករណ៍នានា ដូចជា ប្រអប់ឧបករណ៍ចាប់សញ្ញាសំឡេងនៅក្រោមទឹក ឬដ្រូនសម្រាប់វាយប្រហារ ប្រភេទ Chien Feng I។ ដ្រូនភេទនេះ មានសមត្ថភាពហោះហើរ រហូតដល់រយៈពេល១៦ម៉ោង និងមានរយៈចម្ងាយបញ្ជាលើសពី៣០០គីឡូម៉ែត្រ។
ដ្រូន V-Bat ត្រូវបានអភិវឌ្ឍ និងផលិតដោយក្រុមហ៊ុនបច្ចេកវិទ្យាយោធាសហរដ្ឋអាម៉េរិក Shield AI។ ដ្រូនប្រភេទនេះ ប្រើប្រាស់ការរចនាបែបកង្ហារ ដែលមានស្រោមព័ទ្ធជុំវិញ និងម៉ាស៊ីនតែមួយ ដោយអនុញ្ញាតឱ្យវាហោះឡើង និងចុះចតតាមទិសបញ្ឈរ នៅក្នុងទីធ្លាតូចចង្អៀត ឬនៅលើនាវា។ បន្ទាប់មក ដ្រូនប្រភេទនេះ អាចប្តូរទៅជាការហោះហើរ តាមទិសផ្ដេកវិញ ហើយវាមានសមត្ថភាព ហោះឈ្លបយកការណ៍ដោយឯករាជ្យ ប្រមូលព័ត៌មានសម្ងាត់ និងកំណត់គោលដៅ សូម្បីតែនៅក្នុងបរិយាកាសដែលគ្មានសញ្ញា GPS ឬមានការរំខានសញ្ញាខ្លាំងយ៉ាងណាក៏ដោយ៕
