រាជធានីអាប៊ូដាប៊ី៖ សង្គ្រាមរុស្ស៊ីឈ្លាពាននៅអ៊ុយក្រែន និងសង្គ្រាមសហរដ្ឋអាម៉េរិក-អ៊ីស្រាអែល ប្រឆាំងអ៊ីរ៉ង់ បាននិងកំពុងជំរុញឱ្យបណ្ដាប្រទេសនានានៅលើពិភពលោក ខិតខំបង្កើនកញ្ចប់ថវិកាលើវិស័យការពារជាតិយ៉ាងខ្លាំង ដើម្បីត្រៀមខ្លួនទប់ទល់នឹងព្រឹត្ដិការណ៍ឈ្លានពានរបស់ប្រទេសដែលមានកម្លាំងយោធាខ្លាំងក្លាជាងខ្លួន។ ហើយនេះក៏ជាពេលវេលាកើបលុយរាប់ពាន់លានដុល្លារអាម៉េរិក របស់ក្រុមហ៊ុនផលិតគ្រឿងសព្វាវុធំៗនៅទូទាំងពិភពលោកផងដែរ។ ជម្លោះនៅមជ្ឈិមបូព៌ា ជាឱកាសមាស និងល្អបំផុតមួយ សម្រាប់ក្រុមហ៊ុនឧស្សាហកម្មការពារជាតិដ៏ធំបំផុតរបស់ប្រទេសអារ៉ាប់រួម ដែលបានឆ្លងកាត់បទពិសោធជាក់ស្ដែង លើការលក់គ្រឿងសព្វាវុធ និងបង្កើនការកើបលុយពីឧស្សាកម្មមួយនេះយ៉ាងធំសម្បើម...។
បណ្ដាញទូរទស្សន៍របស់អារ៉ាប៊ីសាអូឌីត Al Arabiya News បានចេញផ្សាយថា នៅចំកណ្តាលវាលខ្សាច់នៃរាជធានីអាប៊ូដាប៊ី (Abu Dhabi) ប្រទេសអារ៉ាប់រួម ឬអេមីរ៉េតអារ៉ាប់ កម្មករកំពុងធ្វើការងារដោយរីករាយនៅក្នុងឃ្លាំង ដើម្បីដំឡើងប្រព័ន្ធដ្រូន និងមីស៊ីលរបស់ក្រុមហ៊ុនឧស្សាហកម្មការពារជាតិក្នុងប្រទេស Edge ដែលកំពុងមានតម្រូវការកើនឡើងយ៉ាងខ្លាំង សម្រាប់អាវុធរបស់ខ្លួន ហើយត្រូវសាកល្បងជាក់ស្តែង នៅក្នុងសមរភូមិសង្គ្រាម នៅមជ្ឈិមបូព៌ា។
នាយកគ្រប់គ្រងក្រុមហ៊ុនវិស័យការពារជាតិអារ៉ាប់អេមីរ៉េត បានប្រាប់ដល់ទីភ្នាក់ងារព័ត៌មានបារាំង AFP ថា ក្នុងអំឡុងជម្លោះរយៈពេល៦ខែ រវាងសហរដ្ឋអាម៉េរិក និងអ៊ីរ៉ង់នោះ មីស៊ីល និងយន្តហោះគ្មានមនុស្សបើក ឬដ្រូនជិត៣០០០គ្រឿង បានវាយប្រហារមកលើ UAE ដែលធ្វើឱ្យប៉ះពាល់ដល់កេរ្តិ៍ឈ្មោះរបស់ប្រទេសនេះ ក្នុងនាមជាតំបន់មានសុវត្ថិភាព។ ប៉ុន្តែជម្លោះនេះ ក៏បានហុកឱកាសល្អ សម្រាប់រកប្រាក់ចំណូលយ៉ាងច្រើនសន្ធឹកសន្ធាប់របស់ក្រុមហ៊ុនឧស្សាហកម្ម និងបច្ចេកវិទ្យាដ៏ទំនើប EDGE គ្រប់គ្រងដោយរដ្ឋាភិបាលរាជធានីអាប៊ូដាបី និងកំពុងតែចាប់ផ្តើមពង្រីកអាជីវកម្មយ៉ាងទូលំទូលាយ ទៅកាន់តំបន់អឺរ៉ុបផងដែរ។
លោក ខាឡេដ អាល់ ហ្សាអាប៊ី (Khaled Al Zaabi) នាយកប្រតិបត្ដិក្រុមហ៊ុនឧស្សាហកម្មការពារជាតិ និងបច្ចេកវិទ្យាជាន់ខ្ពស់ EDGE បានប្រាប់ដល់ទីភ្នាក់ងារសារព័ត៌មាន AFP ពីទីស្នាក់ការកណ្ដាលរបស់ខ្លួន នៅរាជធានីអាប៊ូដាប៊ីថា៖«នៅមុនពេលមានសង្គ្រាម យើងមានផលិតផលមួយចំនួនតូចប៉ុណ្ណោះ ដែលអាចនិយាយបានថា បានឆ្លងកាត់ការសាកល្បងជាក់ស្តែងក្នុងសមរភូមិ។ ប៉ុន្តែក្រោយបញ្ចប់សង្គ្រាម យើងអាចនិយាយបានថា ផលិតផលជាច្រើន ឥឡូវនេះ ត្រូវបានបញ្ជាក់ពីគុណភាព តាមរយៈការប្រើប្រាស់ជាក់ស្តែង នៅក្នុងសមរភូមិរួចហើយ»។ ក្នុងរយៈពេលត្រឹមតែប៉ុន្មានឆ្នាំប៉ុណ្ណោះ ក្រុមហ៊ុនដែលផ្គត់ផ្គង់សព្វាវុធដល់កងកម្លាំងប្រដាប់អាវុធរបស់អារ៉ាប់រួម (UAE) មួយនេះ បានប្រែក្លាយទៅជាក្រុមហ៊ុនវិស័យការពារជាតិឈានមុខគេរបស់អារ៉ាប់ ហើយបច្ចុប្បន្នពឹងផ្អែកយ៉ាងខ្លាំងលើការនាំចេញ ដើម្បីស្វែងរកប្រាក់ចំណូល។
លោកនាយកប្រតិបត្ដិ ក្រុមហ៊ុនឧស្សាហកម្មការពារជាតិ និងបច្ចេកវិទ្យាជាន់ខ្ពស់ EDGE បានបន្ថែមថា ការទទួលស្គាល់ផលិតផលទាំងនោះ បានឆ្លងកាត់ការសាកល្បងជាក់ស្តែង នៅក្នុងសមរភូមិ គឺជា«ចំណុចទាក់ទាញការលក់ដ៏សំខាន់បំផុត» ជាមួយនឹងការកត់សម្គាល់ឃើញថា មានតម្រូវការកើនឡើងយ៉ាងខ្លាំង ក្រោយការបញ្ចប់សង្គ្រាម ទោះបីមិនបានបញ្ជាក់ពីតួលេខជាក់លាក់យ៉ាងក៏ដោយ។ ក្រុមហ៊ុន EDGE បានបង្កើតឡើងក្នុងឆ្នាំ២០១៩ តាមរយៈការច្របាច់បញ្ចូលគ្នា សម្រាប់ក្រុមហ៊ុនវិស័យការពារជាតិជាច្រើនរបស់អារ៉ាប់រួម។ បច្ចុប្បន្ន ក្រុមហ៊ុននេះ មានបុគ្គលិកចំនួន១៩០០០នាក់ និងបានផលិត[ផលិតផល]ជាច្រើនប្រភេទ រាប់ចាប់ពីយន្តហោះគ្មានមនុស្សបើក ឬដ្រូន រហូតដល់មីស៊ីល យានយន្តពាសដែក បច្ចេកវិទ្យាបញ្ញាសិប្បនិម្មិត (AI) និងនាវាចម្បាំង៕
