រដ្ឋធានីវ៉ាស៊ីនតោន៖ លោកប្រធានាធិបតីសហរដ្ឋអាម៉េរិក ដូណាល់ ត្រាំ បានបង្ហោះវីដេអូឃ្លីបមួយដែលបង្កើតដោយបច្ចេកវិទ្យា AI បង្ហាញអំពីការបំផ្លាញកោះឃើគ (Kharg) ដែលជាមជ្ឈមណ្ឌលប្រេងដ៏ធំបំផុតរបស់អ៊ីរ៉ង់ ឱ្យខ្ទេចខ្ទីអស់ទាំងស្រុង។ នេះបើតាមទូរទស្សន៍របស់អារ៉ាប៊ីសាអូឌីត Al Arabiya News បានចេញផ្សាយនៅរសៀលថ្ងៃចន្ទទី៣១​ ខែសីហា...។

ការបង្ហោះវីដេអូឃ្លីបនេះ ធ្វើឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីប្រទេសទាំងពីរ ចាប់ផ្ដើម​វាយប្រហារតបតគ្នាទៅវិញទៅមក ជាលើកដំបូង ចាប់តាំងពីខែកក្កដា រហូតមក។ ប៉ុន្ដែគេនៅមិនទាន់​ដឹងនៅឡើយទេថា តើការបង្ហោះឃ្លីបវីដេអូរបស់លោកប្រធានាធិបតី ត្រាំ គឺជាការគំរាមកំហែងដល់កោះឃើគ ឬក៏ជាសញ្ញាបង្ហាញថា ការវាយប្រហារណាមួយ កំពុង​កើតឡើងនៅលើកោះនោះ​។ ទោះជាយ៉ាងណាក៏ដោយ ប៉ុន្មានម៉ោងក្រោយការបង្ហោះឃ្លីបវីដេអូនេះ នៅមិនទាន់មានភស្ដុតាង ពីកោះឃើគនោះ រងការវាយប្រហារនៅឡើយទេ។​ ដោយឡែក សេតវិមាន និងក្រសួងសង្គ្រាមសហរដ្ឋអាម៉េរិក នៅមិនទាន់ឆ្លើយតប ចំពោះការសុំបំភ្លឺពី​ទីភ្នាក់ងារសារព័ត៌មាន Reuters នោះទេ។​

លោកប្រធានាធិបតី ដូណាល់ ត្រាំ បានបញ្ជាក់នៅលើបណ្ដាញសង្គម The Social កាលពីថ្ងៃអាទិត្យម្សិលមិញថា កោះឃើគ នឹងត្រូវបំផ្ទុះឱ្យខ្ទេចខ្ទីអស់។ ប៉ុន្ដែលោក មិនទាន់ផ្ដល់ព័ត៌មានលម្អិត​នៅឡើយទេ។​ កោះឃើគ ​ជាទីតាំងគ្រប់គ្រងការនាំចេញប្រេងរបស់អ៊ីរ៉ង់ រហូតដល់ទៅ៩០ភាគរយ នៅមុនពេលផ្ទុះ​សង្គ្រាម ដែលបានបង្កឡើង ដោយ​សហរដ្ឋអាម៉េរិក និងអ៊ីស្រាអែល កាលពីថ្ងៃទី២៨ ខែកុម្ភៈ។ ប្រសិនបើមានការវាយប្រហារទៅលើកោះនោះមែន នឹងបង្កការរំខានយ៉ាងធ្ងន់ធ្ងរដល់ពាណិជ្ជកម្មថាមពលរបស់អ៊ីរ៉ង់ និងដាក់សម្ពាធយ៉ាងខ្លាំង លើសេដ្ឋកិច្ចរបស់ប្រទេសនេះថែមទៀត។ ដោយឡែក កងទ័ពហ្ស៊កដានី បានប្រកាសនៅព្រឹកថ្ងៃចន្ទនេះថា ខ្លួនបានស្ទាក់ចាប់មីស៊ីលភ្លាមៗ ចំនួន៨គ្រាប់ ​បន្ទាប់ពីកងឆ្មាំបដិវត្តន៍អ៊ីរ៉ង់ (IRGC) ប្រកាសថា ពួកគេបានវាយប្រហារគោលដៅយោធារបស់សហរដ្ឋអាម៉េរិក នៅក្នុងប្រទេសរបស់ខ្លួន៕