ក្រុងបាត់ដំបង៖ រដ្ឋបាលស្រុកឯកភ្នំ នៅថ្ងៃទី៣១ ខែសីហា ឆ្នាំ២០២៦ បានប្រកាសឱ្យពលរដ្ឋបង្កើនការប្រុងប្រយ័ត្ន ខណៈស្ថានភាពទឹកជំនន់ស្ទឹងសង្កែកំពុងហក់ឡើងខ្លាំង និងបានប៉ះពាល់ដល់ផ្នែកខ្លះនៃផ្លូវខេត្តលេខ១៥៦ ក្នុងភូមិសាស្ត្រស្រុកឯកភ្នំជាបណ្តើរៗហើយ...។

តាមសេចក្តីជូនដំណឹងរបស់រដ្ឋបាលស្រុក បានអំពាវនាវដល់ប្រជាពលរដ្ឋ រស់នៅតាមបណ្តោយមាត់ស្ទឹងសង្កែ ជាពិសេស នៅឃុំសំរោងក្នុង ឃុំព្រែកនរិន្ទ ឃុំព្រែកខ្ពប និងឃុំព្រែកហ្លួង ឱ្យបង្កើនការប្រុងប្រយ័ត្ន យកចិត្តទុកដាក់ចំពោះសុវត្ថិភាពកុមារ និងការពារទ្រព្យសម្បត្តិ សម្ភារ ព្រមទាំងសត្វចិញ្ចឹម ដើម្បីជៀសវាងគ្រោះថ្នាក់ដែលអាចកើតមានជាយថាហេតុ។ ជាមួយគ្នា រដ្ឋបាលស្រុក បានសម្រេចផ្អាកជាបណ្តោះអាសន្ននូវការធ្វើដំណើររបស់រថយន្តដឹកទំនិញធុនធ្ងន់គ្រប់ប្រភេទ ដែលប្រើប្រាស់ផ្លូវខេត្តលេខ១៥៦ ដោយសារផ្នែកខ្លះនៃផ្លូវ ត្រូវបានទឹកហូរកាត់។ ការផ្អាកចរាចរណ៍នេះ អនុវត្តចាប់ពីចំណុចគល់ស្ពានដូនទាវ រហូតដល់ចំណុចស្ពានព្រែកត្រប់ ស្ថិតក្នុងភូមិព្រែកត្រប់ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ រថយន្តដែលត្រូវផ្អាករួមមាន រថយន្តយីឌុប រថយន្តដឹកសម្ភារសំណង់ រថយន្តដឹកស្រូវ រថយន្តដឹកដី និងរថយន្តធុនធ្ងន់ផ្សេងៗទៀត។

រដ្ឋបាលស្រុកបានគូសបញ្ជាក់ថា វិធានការនេះ ធ្វើឡើងដើម្បីជៀសវាងការខូចខាតផ្លូវ និងគ្រោះថ្នាក់ដែលអាចកើតឡើងក្នុងអំឡុងពេលស្ថានភាពទឹកជំនន់។ ចំពោះការបើកឱ្យធ្វើចរាចរណ៍ឡើងវិញ រដ្ឋបាលស្រុក នឹងជូនដំណឹងនៅពេលក្រោយ តាមស្ថានភាពជាក់ស្តែង។ អាជ្ញាធរ ក៏ព្រមានចាត់វិធានការឃាត់រថយន្តទុកជាបណ្តោះអាសន្ន ក្នុងករណីម្ចាស់ ឬអ្នកបើកបររថយន្តធុនធ្ងន់ មិនអនុវត្តតាមការជូនដំណឹងនេះ៕