រដ្ឋធានីប៉េកាំង៖ តាមរយៈបទពិសោធសង្គ្រាមនៅប្រទេសអ៊ុយក្រែន និងអ៊ីរ៉ង់ បានបង្ហាញឱ្យឃើញអំពីប្រសិទ្ធភាព នៃការធ្វើសមាហរណកម្ម និងការកំណត់គោលដៅវាយប្រហារ ដោយរាប់បញ្ចូលទាំងហេដ្ឋារចនាសម្ព័ន្ធស៊ីវិលសំខាន់ៗមួយចំនួនផង។ កងទ័ពរំដោះប្រជាជនចិន កំពុងផ្លាស់ប្ដូរយុទ្ធសាស្រ្ដសង្គ្រាម ដែលទាមទារឱ្យកោះតៃវ៉ាន់ ត្រូវធ្វើដូចគ្នាដែរ ដើម្បីដើរឱ្យទាន់គោលនយោបាយចិន ដែលមានមហិច្ឆតាវាទីយកកូនកោះប្រជាធិបតេយ្យមួយនេះឱ្យមកនៅក្រោមការគ្រប់គ្រងរបស់ខ្លួន។ នេះបើតាមសារព័ត៌មានហុងកុង South China Morning Post ចេញផ្សាយនៅព្រឹកថ្ងៃចន្ទទី៣១ ខែសីហា។
កងទ័ពរំដោះប្រជាជនចិន (PLA) កំពុងងាកទៅអនុវត្តយុទ្ធសាស្ត្រគោលគំនិតយោធាសម័យទំនើបមួយ ដោយផ្លាស់ប្ដូរពីការផ្តោតអារម្មណ៍តែទៅលើប្រព័ន្ធអាវុធតែមួយមុខ ហើយងាកទៅពង្រីកលើល្បឿន ភាពធន់ និងការធ្វើសមាហរណកម្ម នៃបណ្តាញប្រតិបត្តិការទាំងមូល នៅក្នុងទម្រង់ទូលំទូលាយជាងមុនច្រើន។ ទន្ទឹមគ្នា ក្រុមអ្នកវិភាគនៅកោះតៃវ៉ាន់ បានលើកឡើងថា សកម្មភាពបែបនេះ អាចបង្កជាបញ្ហាប្រឈមថ្មីៗ ដល់ប្រព័ន្ធការពាររបស់កោះតៃវ៉ាន់។ ក្រុមអ្នកវិភាគ ព្រមានថា ជំនួសឱ្យការផ្តោតតែទៅលើគ្រឿងសព្វាវុធដាច់ដោយឡែក កងទ័ពរំដោះប្រជាជនចិន កំពុងបង្កើនការយកចិត្តទុកដាក់ជាបន្តបន្ទាប់ លើការបញ្ចូលគ្នានូវផ្នែកស៊ើបការណ៍សម្ងាត់ បញ្ញាសិប្បនិម្មិត (AI) ប្រព័ន្ធទំនាក់ទំនង គ្រឿងសព្វាវុធ ការផ្គត់ផ្គង់ភស្តុភារ និងហេដ្ឋារចនាសម្ព័ន្ធ ឱ្យទៅជាប្រព័ន្ធប្រយុទ្ធដ៏ពេញលេញ។
លោក ចេន ជា-ស៊ឹង (Chen Chia-sheng) អ្នកស្រាវជ្រាវមួយរូបនៃស្ថាប័នវិភាគគោលនយោបាយ ទទួលមូលនិធិពីរដ្ឋបាលទីក្រុងតៃប៉ិ បញ្ជាក់ថា៖«កងទ័ពរំដោះប្រជាជនចិន (PLA) លែងផ្តោតការយកចិត្តទុកដាក់តែទៅលើ ថាតើអាវុធរបស់ភាគីណាមួយខ្លាំងជាងទៀតហើយ ប៉ុន្តែពួកគេបានផ្តោតលើ ថាតើភាគីណា អាចតភ្ជាប់ប្រព័ន្ធអាវុធផ្សេងៗគ្នា ដើម្បីបង្កើតជាកម្លាំងប្រយុទ្ធរួមដ៏ខ្លាំងក្លាជាងមុន»។ អ្នកស្រាវជ្រាវរូបនេះ បានសរសេរពន្យល់អំពីផែនការយោធាចិន នៅក្នុងអត្ថបទមួយ ដែលបានចុះផ្សាយ កាលពីសប្ដាហ៍មុន ដោយវិទ្យាស្ថានស្រាវជ្រាវការពារជាតិ និងសន្ដិសុខជាតិ សម្រាប់កោះតៃវ៉ាន់ ថា ការគំរាមកំហែង នៅក្នុងជម្លោះឆ្លងកាត់ច្រកសមុទ្ទតៃវ៉ាន់ អាចនឹងលាតសន្ធឹង ហួសពីការវាយប្រហារទៅលើយន្តហោះចម្បាំង កងនាវាចម្បាំង និងប្រព័ន្ធបាញ់មីស៊ីលរបស់ខ្លួន។
ក្រោមយុទ្ធសាស្ត្រ ដែលកងទ័ពរំដោះប្រជាជនចិន (PLA) ហៅថា៖«សង្គ្រាមបំផ្លាញគ្រប់ប្រព័ន្ធនោះ រដ្ឋាភិបាលរដ្ឋធានីប៉េកាំង អាចនឹងព្យាយាមធ្វើឱ្យខូចខាត ឬកាត់ផ្តាច់ចំណុចសំខាន់ៗ ដែលគាំទ្រដល់កងកម្លាំងតៃវ៉ាន់ រួមមាន៖ ប្រព័ន្ធផ្កាយរណប ប្រព័ន្ធរ៉ាដា បណ្តាញទំនាក់ទំនង មជ្ឈមណ្ឌលបញ្ជាការ បណ្តាញទិន្នន័យ ក៏ដូចជា កន្លែងស្តុកប្រេងឥន្ធនៈ និងហេដ្ឋារចនាសម្ព័ន្ធដឹកជញ្ជូន និងផ្គត់ផ្គង ជាដើម។ល។ អ្នកស្រាវជ្រាវរូបនេះ បានបន្ថែមថា នៅពេលប្រព័ន្ធទំនាក់ទំនង ឬបណ្ដាញតភ្ជាប់ទាំងនោះ ត្រូវកាត់ផ្តាច់ សូម្បីតែអាវុធទំនើបៗ ក៏អាចបាត់បង់ប្រសិទ្ធភាពយ៉ាងឆាប់រហ័ស ដោយមិនចាំបាច់បំផ្លិចបំផ្លាញដល់គ្រឿងសព្វាវុធទាំងនោះឡើយ។
ការវាយតម្លៃរបស់អ្នកវិភាគរូបនេះ ស្របទៅនឹងការអង្កេតរបស់ លោក ធី ហ្ក្រាហាំ (Tye Graham) អតីតមន្ត្រីកងទ័ពសហរដ្ឋអាម៉េរិក ជំនាញកិច្ចការបរទេស ហើយបច្ចុប្បន្ន លោកជាអ្នកស្រាវជ្រាវជាន់ខ្ពស់ នៅក្រុមហ៊ុន BluePath Labs ដែលជាក្រុមហ៊ុនផ្តល់ប្រឹក្សាយោបល់ផ្នែកយុទ្ធសាស្ត្រ និងបច្ចេកវិទ្យា មានមូលដ្ឋាននៅរដ្ឋធានីវ៉ាស៊ីនតោន សហរដ្ឋអាម៉េរិក។ លោក ហ្ក្រាហាំ បានលើកឡើងថា អ្នកស្រាវជ្រាវរបស់កងទ័ពរំដោះប្រជាជនចិន (PLA) មើលឃើញថា សង្គ្រាមរបស់សហរដ្ឋអាម៉េរិក-អ៊ីស្រាអែល នៅអ៊ីរ៉ង់ បានពង្រឹងការផ្លាស់ប្ដូរ ពី«ការប្រឈមមុខដាក់គ្នា ដោយប្រើប្រាស់កម្លាំងយោធាដោយផ្ទាល់» ទៅជា«ការប្រកួតប្រជែងគ្រប់ប្រព័ន្ធ» ដោយក្នុងនោះឧត្តមភាព អាស្រ័យលើបណ្តាញមានល្បឿនលឿន ភាពធន់ និងប្រសិទ្ធភាពលើចំណាយច្រើនជាង អាស្រ័យតែទៅលើគ្រឿងសព្វាវុធតែប៉ុណ្ណោះ។
គំនិតនេះ មានផលប៉ះពាល់យ៉ាងខ្លាំងដល់បណ្តាញប្រព័ន្ធការពារដែនអាកាសដ៏ទូលំទូលាយរបស់កោះតៃវ៉ាន់ រួមមាន៖ ប្រព័ន្ធការពារដែនអាកាស Patriot ផលិតដោយសហរដ្ឋអាម៉េរិក ប្រព័ន្ធការពារដែនអាកាស Tien Kung ផលិតក្នុងស្រុក និងប្រព័ន្ធការពារដែនអាកាសផ្សេងៗទៀត។ ក្រុមអ្នកវិភាគ បានព្រមានថា រដ្ឋធានីប៉េកាំង អាចនឹងទាញយកផលប្រយោជន៍ពីភាពខុសគ្នានៃតម្លៃ រវាងយន្តហោះគ្មានមនុស្សបើក ឬដ្រូន និងគ្រាប់រ៉ុក្កែតមានតម្លៃថោក ប៉ុន្តែកងទ័ពរំដោះប្រជាជនចិន មានគ្រឿងសព្វាវុធប្រភេទនេះច្រើន ធៀបនឹងមីស៊ីលស្ទាក់ចាប់ដែលមានតម្លៃថ្លៃរបស់កោះតៃវ៉ាន់៕
