រដ្ឋធានីតេហេរ៉ង់៖ មេដឹកនាំកំពូលនៃប្រទេសអ៊ីរ៉ង់ លោក មុចតាបា ខាមេណី (Mojtaba Khamenei) បានចេញមុខអំពាវនាវដល់មេដឹកនាំនៃបណ្តាប្រទេសកាន់សាសនាអ៊ិស្លាមទាំងអស់ ឱ្យស្គាល់ច្បាស់ពី «សត្រូវពិតប្រាកដ» របស់ខ្លួន ដោយបានចាត់ទុក សហរដ្ឋអាម៉េរិក និងអ៊ីស្រាអែល ថា ជាសត្រូវស៊ីសាច់ហុតឈាម ដែលបាននិងកំពុងបំផ្លាញប្លុកអ៊ិស្លាម។ នេះបើយោងតាមការរាយការណ៍របស់ទូរទស្សន៍រដ្ឋ IRIB នៅថ្ងៃទី៣០ ខែសីហា ឆ្នាំ២០២៦នេះ។

លោក ខាមេណី បានសង្កត់ធ្ងន់ថា៖«ការណែនាំយ៉ាងម៉ឺងម៉ាត់របស់ខ្ញុំ ទៅកាន់មេដឹកនាំប្រទេសអ៊ិស្លាម ជាពិសេសនៅតំបន់អាស៊ីខាងលិច និងឈូងសមុទ្ទ គឺត្រូវស្គាល់សត្រូវពិតប្រាកដរបស់អ្នក យល់ពីផែនការរបស់ពួកគេ និងរួមគ្នាតតាំងប្រឆាំងវិញ»។ លោកបានបន្ថែមថា សាមគ្គីភាពក្នុងចំណោមប្រជាជនអ៊ិស្លាម គឺជាកត្តាចាំបាច់បំផុតដើម្បីបង្កើតអារ្យធម៌អ៊ិស្លាមដ៏ឧត្តុង្គឧត្តម។ មេដឹកនាំកំពូលរូបនេះ បានអះអាងថា រដ្ឋធានីវ៉ាស៊ីនតោន និងរដ្ឋធានីតេអាវីវ មិនត្រឹមតែជាសត្រូវរបស់អ៊ីរ៉ង់ប៉ុណ្ណោះទេ ប៉ុន្តែគឺជាសត្រូវរបស់ពិភពអ៊ិស្លាមទាំងមូល។  

ការចេញមុខថ្លែងសារដ៏តឹងរ៉ឹងនេះ កើតឡើងបន្ទាប់ពីកម្តៅយោធានៅតំបន់មជ្ឈិមបូព៌ាបានកើនឡើងយ៉ាងខ្លាំង ចាប់តាំងពីសហរដ្ឋអាម៉េរិក និងអ៊ីស្រាអែល បើកការវាយប្រហាររួមគ្នលើអ៊ីរ៉ង់ កាលពីចុងខែកុម្ភៈ។ ទោះបីជាភាគីទាំងពីរធ្លាប់បានព្រមព្រៀងលើបទឈប់បាញ់ និងចុះហត្ថលេខាលើអនុស្សរណៈនៃការយោគយល់គ្នាកាលពីខែមិថុនាក៏ដោយ ប៉ុន្តែកិច្ចព្រមព្រៀងនេះ បានដួលរលំទៅវិញកាលពីខែមុន បណ្ដាលឱ្យមានការបាញ់បោះតបតគ្នារយៈពេលជិតពីរសប្តាហ៍ មុនពេលប្រធានាធិបតីសហរដ្ឋអាម៉េរិក លោក ដូណាល់ ត្រាំ ប្រកាសផ្អាកការទម្លាក់គ្រាប់បែកជាបណ្តោះអាសន្ន ដើម្បីបើកផ្លូវឱ្យមានការចរចាឡើងវិញ៕