រាជធានីតូក្យូ៖ ក្រុមហ៊ុននានា នៅក្នុងប្រទេសជប៉ុន កំពុងតែត្អូញត្អែរអំពីការលំបាកខ្លាំង នៅក្នុងការជ្រើសរើសបុគ្គលិកធ្វើការ ក្រោយពេលរដ្ឋាភិបាលក្រុងតូក្យូ បានប្រកាសផ្អាកទទួលពលករបរទេស ក្រោមស្ថានភាពទិដ្ឋាការ ប្រភេទ «កម្មករជំនាញពិសេសជាក់លាក់ (i)» សម្រាប់វិស័យសេវាកម្មម្ហូបអាហារ ចាប់តាំងពីខែមេសា ឆ្នាំ២០២៦រហូតមក ហើយវិធានការបែបនេះ បានបង្កឱ្យមានផលប៉ះពាល់យ៉ាងខ្លាំង ខណៈជប៉ុនកំពុងតែប្រឈមនឹងបញ្ហាកង្វះខាតកម្លាំងពលកម្មធ្ងន់ធ្ងរដែលស្រាប់ ហើយមានការប្រកួតប្រជែងដណ្តើមយកកម្មករ រវាងតំបន់ជនបទ និងទីក្រុងធំៗ កាន់តែមានសភាពស្រួចស្រាល់បន្ថែមទៀត។ នេះបើតាមសារព័ត៌មានដ៏ធំមួយរបស់ជប៉ុន The Mainichi បានផ្សាយ កាលពីព្រឹក ថ្ងៃអាទិត្យ ទី៣០ ខែសីហា។
ការសម្រេចចិត្តផ្អាកទទួលយកពលករបរទេសរបស់រដ្ឋាភិបាល អនុវត្តជាចម្បងទៅលើនីតិវិធី នៃការនាំចូលពលករថ្មីៗ មកពីក្រៅប្រទេស។ ចំពោះជនបរទេសដែលកំពុងតែធ្វើការ នៅក្នុងប្រទេសជប៉ុន ក្រោមលក្ខខណ្ឌទិដ្ឋាការបែបនេះដែលមានស្រាប់ ពួកគេនៅតែអាចបន្តដាក់ពាក្យស្នើសុំផ្លាស់ប្តូរការងារ នៅក្នុងវិស័យនេះ ឬបន្តសុពលភាព សម្រាប់ការស្នាក់នៅរបស់ពួកគេ ដូចធម្មតា។ សម្រាប់ម្ចាស់ភោជនីយដ្ឋាននានាវិញ គឺការមិនអាចជួលបុគ្គលិក មកពីក្រៅប្រទេស មានន័យថា ពួកគេគ្មានជម្រើសអ្វី ក្រៅតតែអំពីការជ្រើសរើសមនុស្ស ដែលកំពុងរស់នៅក្នុងប្រទេសជប៉ុនស្រាប់នោះឡើយ។
កម្មករបរទេស បានត្រូវគេអូសទាញឲ្យទៅធ្វើការងារ នៅតាមតំបន់ផ្សេងៗ នៃទីក្រុងតូក្យូ។ នេះបើតាមការលើកឡើងរបស់ក្រុមហ៊ុនជាសមាជិក នៃសមាគមសេវាកម្មម្ហូបអាហារជប៉ុន (Japan Foodservice Association) ដែលបានរៀបរាប់ អំពីការលំបាកក្នុងការរក្សាកម្មករឱ្យបន្តធ្វើការជាមួយខ្លួន។
ក្រុមហ៊ុនសាជីវកម្មពិភពលោកមីណាវី (Mynavi Global Corp.) មានមូលដ្ឋាននៅទីក្រុងតូក្យូ ដែលគាំទ្រដល់ការជ្រើសរើសពលករបរទេស បានបញ្ជាក់ ថា ចំនួនការងារដែលក្រុមហ៊ុននេះគ្រប់គ្រងតួនាទីជា «ពលករជំនាញជាក់លាក់» ក្នុងវិស័យភោជនីយដ្ឋាន បានកើនឡើង ចំនួន២,៦ដង ចន្លោះពីថ្ងៃទី២៧ ខែមីនា (ចំពេលរដ្ឋាភិបាលប្រកាសផ្អាកទទួលយកពលករថ្មី) និងថ្ងៃទី១៦ ខែកក្កដា។ ការកើនឡើង នៃឱកាសការងារ មានសភាពខ្លាំងក្លា ជាពិសេស នៅក្នុងតំបន់ទីក្រុងតូក្យូ។
លោក ម៉ូតូគិ យូហ្ស៊ូរីហា (Motoki Yuzuriha) ប្រធានក្រុមហ៊ុន Mynavi Global បានបញ្ជាក់ ថា ថា៖ «ប្រភពផ្គត់ផ្គង់កម្លាំងពលកម្មដ៏សំខាន់មួយ ត្រូវបានកាត់ផ្តាច់ ហើយអារម្មណ៍នៃវិបត្តិ ការព្រួយបារម្ភ និងភាពច្របូកច្របល់ នៅតែបន្តកើតមាន នៅលើទីលានការងារជាក់ស្តែង។ ពលករ នឹងបន្តស្វែងរកការងារ នៅក្នុងតំបន់ទីក្រុង ហើយបញ្ហាប្រឈមក្នុងការជ្រើសរើសបុគ្គលិកនៅតាមតំបន់ជនបទ ឬតំបន់ក្រៅទីក្រុងធំៗ នឹងកាន់តែមានសភាពធ្ងន់ធ្ងរ ឬលំបាកឡើង»៕
