រដ្ឋធានីញូវដេលី៖ ប្រទេសឥណ្ឌាបាននិងកំពុងបង្កើនការតាមដាន និងត្រួតពិនិត្យយ៉ាងប្រុងប្រយ័ត្នលើតំបន់ជួរភ្នំហិមាល័យ ភាគខាងជើងរបស់ខ្លួនដែលជាប់ព្រំដែនជាមួយប្រទេសចិន និងនេប៉ាល់។ នេះបើយោងតាមការប្រកាសរបស់អាជ្ញាធរកាលពីថ្ងៃទី២៩ ខែសីហា ឆ្នាំ២០២៦ បន្ទាប់ពីគ្រោះទឹកជំនន់ និងដីបាក់យ៉ាងសាហាវឃោរឃៅ ដែលបង្កឡើងដោយការបាក់ស្រុតផ្ទាំងទឹកកក បានឆក់យកជីវិតមនុស្សរាប់រយនាក់។

យោងតាមអង្គការស្ទង់មតិភូមិសាស្ត្រសហរដ្ឋអាម៉េរិក (USGS) គ្រោះមហន្តរាយកាលពីថ្ងៃទី២៦ ខែសីហា នៅព្រំដែនទីបេ-នេប៉ាល់ ត្រូវបានបង្កឡើងដោយការបាក់ស្រុតនៃផ្ទាំងទឹកកកដ៏ធំសម្បើម ដែលបង្កើតបានជាជំនន់យ៉ាងសន្ធោសន្ធៅ ដោយគិតត្រឹមពេលនេះ មនុស្សចំនួន៦៨២នាក់ត្រូវបានគេបញ្ជាក់ថាបានស្លាប់បាត់បង់ជីវិត និងជិត៣ពាន់នាក់ផ្សេងទៀតកំពុងបាត់ខ្លួន។

ដើម្បីឆ្លើយតបនឹងគ្រោះថ្នាក់នេះ លោក Madan Kaushik រដ្ឋមន្ត្រីគ្រប់គ្រងគ្រោះមហន្តរាយប្រចាំរដ្ឋ Uttarakhand នៃប្រទេសឥណ្ឌា បានថ្លែងថា ដោយសារឥណ្ឌាមានព្រំដែនជាប់នេប៉ាល់ និងមានស្ថានភាពភូមិសាស្ត្រស្រដៀងគ្នា អាជ្ញាធរបានបញ្ជាឱ្យក្រុមការងារចុះត្រួតពិនិត្យជាប្រចាំលើបឹង និងផ្ទាំងទឹកកកទាំងអស់នៅក្នុងតំបន់​​ ដោយរដ្ឋនេះមានបឹងទឹកកករហូតដល់ ១២៦៦កន្លែង ដើម្បីត្រៀមលក្ខណៈជាមុន ប្រសិនបើមានសញ្ញាណាមួយកើតឡើង។

ក្រុមអ្នកវិទ្យាសាស្ត្របានព្រមានថា ផ្ទាំងទឹកកកជួរភ្នំហិមាល័យ ដែលជាប្រភពទឹកដ៏សំខាន់សម្រាប់ប្រជាជនជិត២ពាន់លាននាក់ កំពុងរលាយក្នុងល្បឿនលឿនមិនធ្លាប់មាន ដោយសារតែបម្រែបម្រួលអាកាសធាតុ និងកំណើនកម្ដៅផែនដី។ ការរលាយនៃផ្ទាំងទឹកកក និងស្រទាប់ដីកកនេះ បានធ្វើឱ្យជម្រាលភ្នំបាត់បង់ស្ថិរភាព បង្កឱ្យមានការបាក់ដី និងគ្រោះទឹកជំនន់ភ្លាមៗកាន់តែញឹកញាប់ និងកាចសាហាវជាងមុន ដែលទាមទារឱ្យមានការរៀបចំផែនការអភិវឌ្ឍន៍ប្រកបដោយប្រុងប្រយ័ត្នបំផុត៕