រដ្ឋធានីជេរូសាឡឹម(Jerusalem)៖ កងទ័ពអ៊ីស្រាអែល បានអះអាង អំពីការវាយប្រហារលើទីបញ្ជាការមួយកន្លែងរបស់ក្រុមប្រដាប់អាវុធហាម៉ាស់ នៅក្នុងមន្ទីរពេទ្យហ្កាហ្សា (Gaza) កាលពីថ្ងៃសៅរ៍ ខណៈក្រុមមន្រ្ដីក្រសួងសុខាភិបាលរបស់ដែនដីប៉ាឡេស្ទីនមួយនេះ បានបញ្ជាក់ ពីការវាយប្រហាររបស់អ៊ីស្រាអែល នៅកន្លែងផ្សេងទៀត ដោយបានសម្លាប់មនុស្ស ចំនួន៣នាក់។ នេះបើតាមទូរទស្សន៍របស់អារ៉ាប៊ីសាអូឌីត Al Arabiya News បានផ្សាយ កាលពីព្រឹក ថ្ងៃអាទិត្យ ទី៣០ ខែសីហា។
ការវាយប្រហារចុងក្រោយបំផុតរបស់អ៊ីស្រាអែល នៅក្នុងដែនដីហែកហួរ ដោយសារសង្គ្រាម នាពេលនេះ បានកើតឡើង ក្រោយពេលមានកិច្ចព្រមព្រៀងឈប់បាញ់ គាំទ្រដោយសហរដ្ឋអាម៉េរិក បានចូលជាធរមាន កាលពីខែតុលា ឆ្នាំ២០២៥។ អ៊ីស្រាអែល នៅតែបន្តកំណត់គោលដៅលើជនជាតិប៉ាឡេស្ទីន តាមអ្វីដែលខ្លួនចាត់ទុក ជាសមាជិករបស់ក្រុមប្រដាប់អាវុធហាម៉ាស់។
មន្រ្ដីយោធាអ៊ីស្រាអែល បានបញ្ជាក់ ថា អ៊ីស្រាអែល បានវាយប្រហារទៅលើមេបញ្ជាការរបស់ក្រុមហាម៉ាស់ (Hamas) ម្នាក់ ដែល «កំពុងតែលាក់ខ្លួន នៅក្នុងបរិវេណ» នៃមន្ទីរពេទ្យអាល់-អាគសា (Al-Aqsa) ស្ថិតក្នុងទីក្រុងឌា អាល់-បាឡាហ៍ (Deir al-Balah) នៅតំបន់ភាគកណ្តាល នៃហ្កាហ្សា។ ប៉ុន្តែអ៊ីស្រាអែល មិនបានបញ្ជាក់ភ្លាមៗ ថា តើមេបញ្ជាការរូបនោះ ត្រូវបានសម្លាប់ឬយ៉ាងណានោះដែរ។
ជាមួយគ្នានេះ មន្ទីរពេទ្យអាល់-អាគសា បានបញ្ជាក់ ថា មនុស្សចំនួន៣នាក់ បានរងរបួស នៅក្នុងការវាយប្រហាររបស់អ៊ីស្រាអែល នៅក្បែរឃ្លាំងមួយ នៅជិតផ្នែកសម្ភព ស្ថិតក្នុងបរិវេណមន្ទីរពេទ្យនេះ។ ប៉ុន្ដែកាលពីព្រឹក ថ្ងៃដដែលនោះ មន្ទីរពេទ្យ Al-Aqsa បានរាយការណ៍ ថា មនុស្សម្នាក់បានត្រូវសម្លាប់ ដោយសារការវាយប្រហាររបស់អ៊ីស្រាអែល នៅតំបន់ភាគខាងកើតរបស់ទីក្រុងនេះ។
បើតាមក្រសួងសុខាភិបាល នៃដែនដីហ្កាហ្សារបស់ប៉ាឡេស្ទីន បានឲ្យដឹង ថា ប្រតិបត្ដិការយោធារបស់អ៊ីស្រាអែល បានសម្លាប់មនុស្ស យ៉ាងតិច ១ ៣១៣នាក់ ចាប់តាំងពីបទឈប់ បានបាញ់ចូលជាធរមាន។ តួលេខនេះ ត្រូវគិតថា អាចគួរឲ្យទុកចិត្តបាន ដោយអង្គការសហប្រជាជាតិ៕
