រដ្ឋធានីមូស្គូ៖ ប្រភពពីវិស័យឧស្សាកម្មប្រេងចំនួន២ បានរាយការណ៍ អំពីការផលិតប្រេងសាំងរបស់រុស្ស៊ី បានធ្លាក់ចុះ រហូតដល់ប្រហែល៧0ភាគរយ នៃកម្រិតប្រើប្រាស់ក្នុងស្រុក នៅចុងខែសីហានេះ បន្ទាប់ពីការវាយប្រហារ ដោយយន្តហោះគ្មានមនុស្សបើក ឬដ្រូនរបស់កងទ័ពអ៊ុយក្រែន រហូតធ្វើឲ្យរោងចក្រចម្រាញ់ប្រេងធំៗរបស់ប្រទេសមហាអំណាចយោធាកំពូលលំដាប់ទី២របស់ពិភពលោក បានផ្អាកប្រតិបត្តិការ។ នេះបើតាមបណ្ដាញទូរទស្សន៍ គ្រប់គ្រងដោយរដ្ឋអារ៉ាប៊ីសាអូឌីត Al Arabiya News បានផ្សាយ កាលពីព្រឹក ថ្ងៃសៅរ៍ ទី២៩ ខែសីហា។
កងទ័ពអ៊ុយក្រែន បាននិងកំពុងតែបង្កើនការវាយប្រហារលើហេដ្ឋារចនាសម្ព័ន្ធថាមពលសំខាន់ៗរបស់រុស្ស៊ី នៅក្នុងរយៈពេលប៉ុន្មានខែចុងក្រោយនេះ ដោយមានគោលបំណងទប់ស្កាត់ប្រាក់ចំណូលរបស់រដ្ឋាភិបាលក្រុងម៉ូស្គូ សម្រាប់យកមកធ្វើសង្គ្រាម។ ការខ្វះខាតប្រេងឥន្ធនៈ បានវិលត្រឡប់ទៅកាន់តំបន់នានារបស់ប្រទេសរុស្ស៊ីវិញ នៅក្នុងខែសីហានេះ បន្ទាប់ពីមានស្ថានភាពវិបត្ដិប្រេង មានភាពល្អប្រសើរឡើងវិញមួយរយៈ កាលពីចុងខែកក្កដា ខណៈអាជ្ញាធរមូលដ្ឋានមួយចំនួន បានចាប់ផ្តើមបន្ធូរបន្ថយ ឬលុបចោលការរឹតបន្តឹង លើការលក់ប្រេងឥន្ធនៈ។
បើតាមប្រភពនានា បានឱ្យដឹង ថា ការផលិតប្រេងសាំង នៅចុងខែសីហានេះ បានធ្លាក់ចុះដល់កម្រិតដូចគ្នា ដែលបានមើលឃើញ កាលពីដើមខែកក្កដា នៅក្នុងកម្រិតកំពូល សម្រាប់រលកទី១មួយ នៃវិបត្តិប្រេងឥន្ធនៈដែលបានកើតឡើង ចាប់តាំងពីខែឧសភា។
នៅក្នុងរយៈពេលមួយសប្តាហ៍កន្លងមកនេះ យន្តហោះគ្មានមនុស្សបើក ឬដ្រូនរបស់កងទ័ពអ៊ុយក្រែន បានបង្កើនការវាយប្រហារ និងបញ្ឈប់ដល់ប្រតិបត្តិការ នៅក្នុងរោងចក្រចម្រាញ់ប្រេងសំខាន់ៗចំនួន៣ រួមទាំងរោងចក្រនៅ Perm, Nizhny Novgorod និង Yaroslavl ដែលជារោងចក្រផលិតប្រេងសាំងដ៏ធំបំផុត នៅក្នុងប្រទេសរុស្ស៊ី៕
