រដ្ឋធានីមូស្គូ៖ លោកប្រធានាធិបតីរុស្ស៊ី វ្ល៉ាឌីមៀ ពូទីន (Vladimir Putin) បានចុះហត្ថលេខាលើក្រឹត្យមួយ អនុញ្ញាតឱ្យរដ្ឋអាចចូលទៅកាន់កាប់ជាបណ្ដោះអាសន្ន នូវហេដ្ឋារចនាសម្ព័ន្ធសំខាន់ៗ ប្រសិនបើម្ចាស់កម្មសិទ្ធិឯកជន បានរងបរាជ័យ ក្នុងការការពារហេដ្ឋារចនាសម្ព័ន្ធទាំងនោះ បញ្ចៀសពីការវាយប្រហារ ដោយយន្តហោះគ្មានមនុស្សបើក ឬដ្រូនរបស់អ៊ុយក្រែន ឬក៏បរាជ័យក្នុងការជួសជុលឡើងវិញ បន្ទាប់ពីមានការវាយប្រហារ។ នេះបើតាមសារព័ត៌មាន PBS News ចេញផ្សាយនៅព្រឹកថ្ងៃព្រហស្បតិ៍ទី២៧ ខែសីហានេះ...។
ការចេញក្រឹត្យរបស់អ្នកចម្បាំងខ្លាឃ្មុំទឹកកក មេដឹកនាំវិមានក្រឹមឡាំង លោក វ៉្លាឌីមៀ ពូទីន កាលពីថ្ងៃចន្ទដើមសប្ដាហ៍នេះ កើតឡើង ចំពេលមានសម្ពាធសេដ្ឋកិច្ចកាន់តែខ្លាំងឡើង និងមានការមិនពេញចិត្តពីសាធារណជន នៅក្នុងប្រទេសរុស្ស៊ី បន្ទាប់ពីមានការវាយប្រហារកាន់តែខ្លាំងក្លា ពីដ្រូនអត្តឃាតរបស់កងទ័ពអ៊ុយក្រែន ដោយបានកម្ទេចរោងចក្រចម្រាញ់ប្រេងជាច្រើន មជ្ឈមណ្ឌលពាណិជ្ជកម្មតាមប្រព័ន្ធអ៊ិនធើរណេតនានា និងគោលដៅសំខាន់ៗ ដែលចូលមកជ្រៅលើទឹកដីប្ឬទេសរុស្ស៊ី នៅក្នុងរយៈពេលប៉ុន្មានខែកន្លងមកនេះ បង្កឱ្យមានវិបត្ដិប្រេងឥន្ធនៈផ្គត់ផ្គង់ក្នុងស្រុក និងមានការរំខានដល់ខ្សែច្រវាក់សេដ្ឋកិច្ចនៅទូទាំងប្រទេស។
ដោយឡែក ប្រទេសអ៊ុយក្រែន វិញ ក៏កំពុងរងផលប៉ះពាល់ធ្ងន់ធ្ងរផងដែរ ពីការវាយប្រហារតាមអាកាសឥតឈប់ឈរពីកងកម្លាំងទាហានរបស់រដ្ឋធានីមូស្គូ ដោយបានបំផ្លិចបំផ្លាញបណ្តាញអគ្គិសនីរបស់ប្រទេសអឺរ៉ុបខាងកើតមួយនេះ នៅមុនរដូវរងាចូលមកដល់។ ទន្ទឹមនោះ ផ្ទះសម្បែងរបស់ប្រជាពលរដ្ឋ បានរងការខូចខាតយ៉ាងដំណំ ខណៈការឈ្លានពានរបស់កងទ័ពរុស្ស៊ី បានបន្ដអូសបន្លាយពេលជាង៤ឆ្នាំមកហើយ។អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានបញ្ជាក់ កាលពីថ្ងៃអង្គារថា៖«ជារឿយៗ..ម្ចាស់អាជីវកម្មជាច្រើន ហាក់មិនយកចិត្តទុកដាក់គ្រប់គ្រាន់ លើការអនុវត្តវិធានការនានារបស់អាជ្ញាធរណែនាំ ដើម្បីធានាសុវត្ថិភាព ជាពិសេស គឺសុវត្ថិភាពប្រឆាំងទៅនឹងការវាយប្រហារដោយយន្តហោះគ្មានមនុស្សបើក ឬដ្រូន»។
សូមជម្រាបថា ក្រឹត្យថ្មីនេះ នឹងចូលជាធរមាន និងត្រូវអនុវត្តភ្លាមៗ ដោយគ្របដណ្ដប់លើទីតាំងនានា នៅក្នុងវិស័យឥន្ធនៈ ឧស្សាហកម្ម ទូរគមនាគមន៍ រោងចក្រថាមពល (រួមទាំងរោងចក្រថាមពលនុយក្លេអ៊ែរ) សេវាសាធារណៈ ក្រុមហ៊ុនដឹកជញ្ជូន និងភស្តុភារកម្ម ព្រមទាំងកន្លែងផ្សេងទៀតដែលត្រូវចាត់ទុកថា«មានសារសំខាន់យ៉ាងពិសេស សម្រាប់សន្តិសុខ ស្ថិរភាពសេដ្ឋកិច្ច ក៏ដូចជាជីវភាពរស់នៅរបស់ប្រជាជន នៃសហព័ន្ធន៍រុស្ស៊ី»។ ទោះជាយ៉ាងណាក៏ដោយ គេនៅមិនទាន់ដឹងច្បាស់នៅឡើយទេ អំពីបំណងពិតប្រាកដរបស់មេដឹកនាំវិមានក្រឹមឡាំង ចំពោះក្រឹត្យនេះ។ ថ្វីបើក្រឹត្យមួយនេះ គ្របដណ្ដប់លើវិស័យជាច្រើន រួមទាំងហេដ្ឋារចនាសម្ព័ន្ធថាមពល ក៏ដូចជាកន្លែងឧស្សាហកម្ម ប្រព័ន្ធទំនាក់ទំនង ការដឹកជញ្ជូន និងផ្នែកភស្តុភារកម្មយ៉ាងណាក៏ដោយ។
ដោយឡែក ក្រុមអ្នកជំនាញផ្នែកច្បាប់ បានលើកឡើងកាលពីថ្ងៃពុធថា ក្រឹត្យនេះ អាចក្លាយជាឧបករណ៍មួយ សម្រាប់រឹបអូសទ្រព្យសម្បត្តិជាច្រើនរបស់ក្រុមហ៊ុននានា នៅក្នុងប្រទេសរុស្ស៊ី ក្រោមលេស អំពីការបរាជ័យនៃការ[ការពារ]ផ្នែកសន្តិសុខ។ ទន្ទឹមគ្នានេះ ក្រុមអ្នកជំនាញច្បាប់ បានហៅវិធានការបែបនេះ ថា«ជាការធ្វើជាតូបនីយកម្មបែបចម្រុះ» ជាមួយនឹងការព្រមានលើក្រឹត្យថ្មីនេះ ដែលនឹងត្រូវប្រើប្រាស់សម្រាប់ការដកហូតទ្រព្យសម្បត្តិរបស់ក្រុមហ៊ុនឯកជន។ ប៉ុន្ដែអ្វីដែលធ្ងន់ធ្ងរជាងនេះ គឺនៅត្រង់ថា ក្រឹត្យថ្មីនេះ អនុញ្ញាតឱ្យរដ្ឋមានសិទ្ធិគ្រប់គ្រងជាបណ្តោះអាសន្ន ដោយមិនចាំបាច់មានសេចក្តីសម្រេចពីតុលាការ។ ពោល..គឺគ្រាន់តែផ្អែកតាមការណែនាំរបស់ប្រធានាធិបតីតែម្នាក់ប៉ុណ្ណោះ។ នេះជាអ្វីដែលក្រុមអ្នកជំនាញច្បាប់ កត់សម្គាល់ឃើញថា ការណែនាំទាំងនោះ អាចធ្វើឡើងត្រឹមតែតាមរយៈពាក្យសម្តី ដោយផ្ទាល់មាត់ក៏បានដែរ។
ការគ្រប់គ្រងដោយរដ្ឋ អាចត្រូវអនុវត្ត ខណៈក្រុមហ៊ុនដែលរងបរាជ័យ នៅក្នុងការអនុម័តវិធានការសន្តិសុខ ប្រឆាំងនឹងការវាយប្រហារដោយយន្តហោះគ្មានមនុស្សបើក ឬដ្រូនរបស់អ៊ុយក្រែន គឺមានការរំលោភលើតម្រូវការសន្តិសុខ ឬមានការអនុវត្តវិធានការ ដែលត្រូវវាយតម្លៃ ថា គ្មានប្រសិទ្ធភាព។ ករណីដ៏សំខាន់មួយទៀត នោះគឺក្រឹត្យរបស់មេដឹកនាំវិមានក្រឹមឡាំង មិនបានកំណត់ច្បាស់លាស់ទេថា តើនរណាជាអ្នកសម្រេចចិត្តលើលក្ខខណ្ឌកំណត់ ដែលត្រូវបានបំពេញ ឬក៏សម្រេចដោយផ្អែកលើលក្ខណៈវិនិច្ឆ័យអ្វីមួយ?...៕
