រដ្ឋធានីកដ្ឋមណ្ឌូ៖ ទឹកជំនន់ជន់ភ្លាមៗដ៏ខ្លាំងក្លា បានវាយប្រហារយ៉ាងសន្ធាប់លើប្រទេសនេប៉ាល់ ដោយបានពន្លិចកួចភូមិឋានប្រជាជន ព្រមទាំងបំផ្លិចបំផ្លាញផ្លូវថ្នល់ ស្ពាន និងគម្រោងថាមពលអគ្គិសនីជាច្រើន នៅតំបន់ជាប់ព្រំដែនទីបេ នៅថ្ងៃថ្ងៃពុធ ថ្ងៃទី២៦ ខែសីហានេះ ​ខណៈអាជ្ញាធរ ព្រមាន​ពីហានិភ័យ នៃការបាត់បង់ជីវិតមនុស្សយ៉ាងច្រើន​។

តំបន់ស៊ីយ៉ាប្រ៊ូបេស៊ី (Syapru Besi) និងទីមូរ៉េ (Timure) ស្ថិតក្នុងស្រុករ៉ាស៊ូវ៉ា (Rasuwa) ដែលជាតំបន់ជួរភ្នំមានប្រជាជនរស់នៅប្រមាណ ៥០០០០នាក់ បានរងការវាយប្រហារយ៉ាងធ្ងន់ធ្ងរបំផុត។ អាជ្ញាធរបានប្រកាសអាសន្នបន្ទាន់ ឱ្យប្រជាពលរដ្ឋរស់នៅតាមដងទន្លេបូតេកូស៊ី (Bhotekoshi) ប្រញាប់ប្រញាល់ភៀសខ្លួនទៅកាន់ទីទួលសុវត្ថិភាព។ វីដេអូដែលត្រូវបានចែករំលែកដោយកងកម្លាំងនគរបាល និងនៅលើបណ្តាញសង្គម បានបង្ហាញពីទិដ្ឋភាពទឹកភក់ និងទឹកល្អក់កកករ ហូរកួចខ្មួលខ្មាញ់យ៉ាងខ្លាំង ដូចបាក់ទំនប់។

លោក អេប៊ី ណារ៉ាយ៉ាន កាហ្វឡេ (Abi Narayan Kafle) អ្នកនាំពាក្យ នគរបាលនេប៉ាល់ បានថ្លែងទាំងបារម្ភថា៖«យើងមិនទាន់ដឹងពីទំហំនៃការខូចខាតពិតប្រាកដនៅឡើយ ប៉ុន្តែទឹកជំនន់នេះ មានកម្លាំងខ្លាំងក្លាណាស់ ហើយវាអាចប៉ះពាល់ដល់តំបន់ប្រជុំជនជាច្រើន។ យើងបានជូនដំណឹងដល់ប្រជាជនដែលនៅជិតមាត់ទន្លេឱ្យជម្លៀសខ្លួនចេញជាប្រញាប់ និងបានដាក់ចេញនូវធនធានទាំងអស់ ដើម្បីសង្គ្រោះ»។ របាយការណ៍បឋម បានបង្ហាញថា ភូមិឋាន និងការដ្ឋានគម្រោងហេដ្ឋារចនាសម្ព័ន្ធត្រូវបានទឹកកួច បាត់ស្រមោលឈឹង ខណៈមនុស្សជាច្រើនអាចនឹងស្លាប់ ហើយទ្រព្យសម្បត្តិជាច្រើន នឹងរងការប៉ះពាល់ធ្ងន់ធ្ងរ ប៉ុន្តែនៅមិនទាន់អាចវាយតម្លៃតួលេខ ជាក់លាក់បាននៅឡើយ៕