រដ្ឋធានីប៊ែរឡាំង៖ អាកាសយានដ្ឋានឡេបហ្ស៊ីក-ហាឡេ (Leipzig/Halle) នាភាគខាងកើត នៃប្រទេសអាល្លឺម៉ង់ ដើរតួនាទីយ៉ាងសំខាន់ នៅក្នុងការដឹកជញ្ជូនសម្ភារៈយោធា រួមទាំងការដឹកជញ្ជូនរបស់កងទ័ពអាល្លឺម៉ង់ និងអង្គការណាតូ ហើយវាក៏ដើរតួជាមូលដ្ឋាន សម្រាប់ក្រុមហ៊ុនអាកាសចរណ៍របស់អ៊ុយក្រែន Antonov Airlines ផងដែរ ប៉ុន្ដែឥឡូវ ព្រលានយន្ដហោះមួយនេះ កំពុងតែរងការគំរាមកំហែងជាបន្ដបន្ទាប់ ពីដ្រូន។
ក្រុមមន្រ្ដីស៊ើបអង្កេត បានរកឃើញដ្រូនជាលើកទី៣ចំនួនមួយគ្រឿង និងវត្ថុដែលគេសង្ស័យ ជាគ្រឿងផ្ទុះ ហើយត្រូវបានគេជឿ ថា មានការជាប់ពាក់ព័ន្ធនឹងការប៉ុនប៉ងវាយប្រហារ មកលើព្រលានយន្តហោះ Leipzig/Halle កាលពីដើមខែសីហា។ នេះបើតាមសេចក្តីរាយការណ៍ កាលពីថ្ងៃអង្គារ ទី២៥ ខែសីហា ដោយបណ្តាញផ្សព្វផ្សាយសាធារណៈ NDR និង WDR ។
ការរកឃើញដ្រូនលើកទី៣នេះ បន្ទាប់ពីរកឃើញដ្រូនមួយគ្រឿង កាលពីថ្ងៃទី១៤ ខែសីហា ពោលគឺ១០ថ្ងៃ បន្ទាប់ពីហេតុការណ៍បែបនេះ បានកើតឡើង នៅតំបន់ភាគខាងលិច នៃព្រលានយន្តហោះមួយនេះ។ ក្រៅពីនេះ ក្រុមមន្រ្ដីស៊ើបអង្កេត ក៏បានរកឃើញសារធាតុម្យ៉ាង មានទម្ងន់ប្រហែល៥០ក្រាម ដែលគេសង្ស័យ ថា វាជាសារធាតុបំផ្ទុះផ្នែកយោធា ប្រភេទ Hexogen។
ដ្រូនបំពាក់គ្រឿងបំផ្ទុះមួយគ្រឿង ក៏ធ្លាប់រកឃើញ នៅជិតយន្តហោះដឹកទំនិញ Antonov របស់អ៊ុយក្រែន កាលពីថ្ងៃទី៤ ខែសីហា នៅក្នុងព្រលានយន្ដហោះដ៏សំខាន់របស់អាល្លឺម៉ង់មួយនេះ។ ក្រុមមន្រ្ដីស៊ើបអង្កេត សង្ស័យ ថា អាចមានដ្រូនទីពីរមួយគ្រឿងទៀត បានហោះបុកជាមួយយន្តហោះដឹកទំនិញរបស់ក្រុមហ៊ុន DHL បន្ទាប់ពីព្រលានយន្តហោះ ត្រូវបានបិទជាបណ្តោះអាសន្ន។
ប្រភពសន្តិសុខ ដែលត្រូវបានដកស្រង់ ដោយប្រព័ន្ធផ្សព្វផ្សាយអាល្លឺម៉ង់ បានបង្ហាញពីការសង្ស័យ ថា ដ្រូនទាំងនេះ មានការជាប់ពាក់ព័ន្ធនឹងចារកម្មរុស្ស៊ី។ ប៉ុន្ដែរដ្ឋាភិបាលក្រុងមូស្គូ បានបដិសេធការចោទប្រកាន់ ដែលអះអាង ថា ខ្លួននៅពីក្រោយការប៉ុនប៉ងវាយប្រហារនេះ៕
