រដ្ឋធានីកៀវ៖ ស្របពេលសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បាននិងកំពុងតែបន្ដវាយប្រហារគ្នាទៅវិញទៅមកយ៉ាងសាហាវ នៅលើទឹកដីរបស់អ៊ុយក្រែននោះ កងទ័ពរបស់រដ្ឋាភិបាលក្រុងកៀវ តែងតែ​តែរិះរកគ្រប់មធ្យោបាយ ដើម្បីទប់ទល់ និងវាយបកទៅវិញ ​ហើយបានប្រើប្រាស់សំណាញ់ សម្រាប់ចាប់ដ្រូនរបស់រុស្ស៊ី។

សារព័ត៌មានរបស់កូរ៉េខាងត្បូង បានផ្សាយ កាលពីព្រឹក ថ្ងៃសៅរ៍ ទី២២ ខែសីហា ថា សំណាញ់ពណ៌សដ៏ធំ ត្រូវបានកងទ័ពអ៊ុយក្រែន ដំឡើងនៅតាមតំបន់មួយចំនួន។​ ទោះ​ជាមើលទៅ វាហាក់បីដូចជាពួកគេកំពុងតែជួសជុលសំណាញ់នេសាទក៏ពិតមែន ប៉ុន្តែទីនោះ មិនមែនជាសមុទ្រនោះឡើ​យ​។

កងវរសេនាតូចគាំទ្រឯករាជ្យទី១២២១របស់អ៊ុយក្រែន កាលពី​ថ្ងៃទី ១៧ ខែសីហា បាននាំគ្នាជួសជុលសំណាញ់ការពារ ទប់ទល់នឹងដ្រូន នៅទីក្រុងស្លូវៀនស្ក៍ (Sloviansk) នៃតំបន់ដូណែតស្ក៍ (Donetsk) នា​​ភាគខាងកើត ប្រទេសនេះ។ សំណាញ់ទាំងនោះ បានដើរតួជាខ្សែការពារចុងក្រោយ សម្រាប់​រារាំង ទប់ទល់នឹងដ្រូនរបស់រុស្ស៊ី  ប្រភេទ FPV ​កុំឱ្យវាចូលទៅជិតយានយន្ត និងបុគ្គលិកយោធារបស់ពួកគេ។​

​គ្រាប់បែកវាយប្រហារតាមអាកាសរបស់រុស្ស៊ី ប្រភេទ KAB ដែលអាចកំណត់គោលដៅ បានធ្លាក់ចំទីតាំងមួយ ស្ថិតក្នុងទីក្រុង Sloviansk ដោយបង្ករងការខូចខាតយ៉ាងធ្ងន់ធ្ងរ ដល់សំណាញ់ដែលមានស្រាប់។ ក្រុមទាហាន បានលាតសំណាញ់ថ្មីៗ ដែលរមូរដូចជាដុំក្រដាសរមូរ ហើយបានដាក់ពង្រាយវា នៅតាមដងផ្លូវ។ រីឯការជួសជុលសំណាញ់ដែលរហែកទាំងនោះ ក៏ដោយសារតែការវាយប្រហារនៅតាមអាកាស នៅតែបន្ត នៅតាមបណ្តោយខ្សែត្រៀមជួរមុខរបស់អ៊ុយក្រែន​។

សំណាញ់ទប់ទល់ប្រឆាំងនឹងដ្រូន កំពុងតែត្រូវ​​បន្តដំឡើង នៅតាមបណ្តោយផ្លូវនានា ដែលស្ថិតនៅជិតខ្សែត្រៀមជួរមុខ​របស់អ៊ុយក្រែន។ បើ​តាមក្រសួងការពារជាតិអ៊ុយក្រែន បានឲ្យដឹង ថា គិតត្រឹមខែកក្កដា ឆ្នាំ២០២៦ សំណាញ់ការពារទប់ទល់នឹងដ្រូន ​បានដំឡើងគ្របដណ្តប់លើផ្លូវដឹកជញ្ជូនសំខាន់ៗ មានប្រវែងជាង ១ ១៨៤ គីឡូម៉ែត្រ។ ប៉ុន្ដែកាលពីខែកុម្ភៈ ក្រសួងការពារជាតិអ៊ុយក្រែន ​បានប្រកាសអំពីផែនការដំឡើងសំណាញ់បន្ថែមទៀត ដែលមានប្រវែង ៤ ០០០ គីឡូម៉ែត្រ នៅត្រឹមដំណាច់ឆ្នាំ២០២៦​៕