រាជធានីបាងកក៖ ជំនន់ទឹកភ្លៀងនៅខេត្តណាន (Nan) និងខេត្តសុខោទ័យ (Sukhothai) បានចាប់ផ្តើមស្រកចុះបន្តិច ប៉ុន្តែអាចនឹងមានភ្លៀងវិញ នៅតាមតំបន់មួយចំនួន ចន្លោះថ្ងៃទី២៥ ដល់ថ្ងៃទី២៦ ខែសីហា ខណៈព្យុះប្រហែល៧ទៅ៩ អាចនឹងបោលបោកបក់កាត់ប្រទេសថៃបន្ថែមទៀត។ នេះជាការព្រមានពីលោក សេរី សុប្រាទិត្យ (Seree Supratid) អ្នកជំនាញផ្នែកបរិស្ថាន និងគ្រោះមហន្តរាយ។

លោក សេរី បានថ្លែងនៅលើគេហទំព័រហ្វេសប៊ុករបស់លោកថា បរិមាណទឹកភ្លៀងត្រូវបានរំពឹងថា នឹងថយចុះជាបណ្តើរៗរហូតដល់ចុងខែសីហា។ ទោះជាយ៉ាងណាក៏ដោយ លក្ខខណ្ឌអាកាសធាតុនៅតែត្រូវការការតាមដានយ៉ាងយកចិត្តទុកដាក់នៅថ្ងៃទី២៥ ដល់២៦ ខែសីហា និងម្ដងទៀតនៅជុំវិញថ្ងៃទី២៩ ខែសីហា។ ព្យុះមួយនៅជិតកោះហៃណាន (Hainan) ប្រទេសចិន អាចធ្វើឱ្យមានភ្លៀងធ្លាក់ច្រើននៅតំបន់មួយចំនួនបន្ថែមទៀតក្នុងប្រទេសថៃ។ តំបន់ភាគខាងលិច ភាគខាងជើងផ្នែកខាងលើ ភាគឦសានផ្នែកខាងលើ និងភាគខាងកើត ប្រឈមមុខនឹងហានិភ័យខ្ពស់បំផុតនៃភ្លៀងធ្លាក់ខ្លាំង។ លើសពីនេះ លោកព្រមានថា អាចមានព្យុះពី ៧ទៅ៩ទៀតនៅតែអាចកើតមានឡើងក្នុងអំឡុងពេលដែលនៅសល់នៃរដូវកាលនេះ៕