ខេត្តណាន៖ គ្រោះទឹកជំនន់នៅក្នុងខេត្តណាន ប្រទេសថៃ បានបណ្ដាលឱ្យមនុស្ស ២នាក់ស្លាប់ និងប៉ះពាល់ដល់ប្រជាជនជាង ១៦០០០នាក់ ស្មើជាង ៨០០០គ្រួសារ ខណៈស្រុកពួ (Pau) គឺជាតំបន់មួយក្នុងចំណោមតំបន់ដែលរងគ្រោះធ្ងន់ធ្ងរជាងគេ ដោយទឹកជំនន់ជន់លិច ៧ឃុំ និង ៦០ភូមិ។ នេះបើយោងតាមរបាយការណ៍បឋមចុះផ្សាយដោយកាសែតថៃនៅថ្ងៃព្រហស្បតិ៍ទី២០ ខែសីហា។

អ្នកស្លាប់ម្នាក់ គឺជាអ្នកជំងឺដេកលើកន្ទេល ដែលមិនអាចជម្លៀសខ្លួនបាន រីឯម្នាក់ទៀតត្រូវទឹកជំនន់ហូរខ្លាំងកួចចចេញពីផ្ទះ ហើយក្រោយមកត្រូវបានប្រទះឃើញស្លាប់។ អាជ្ញាធរកំពុងប្រញាប់ប្រញាល់ជម្លៀសប្រជាជនងាយរងគ្រោះ ខណៈរដ្ឋបាលក្រុងណានកំពុងប្រើប្រាស់បាវខ្សាច់ និងរបាំងការពារទឹកជំនន់ធំៗ ដើម្បីទប់ស្កាត់មិនឱ្យទឹកហូរចូលដល់មន្ទីរពេទ្យណាន។ មន្ត្រីអាជ្ញាធរបានព្រមានថា កម្រិតទឹកអាចនឹងបន្តកើនឡើងបន្ថែមទៀត ដោយផ្លូវសំខាន់ៗមួយចំនួននៅក្នុងស្រុកថាវ៉ាងផា (Tha Wang Pha) មិនអាចធ្វើដំណើរឆ្លងកាត់បានឡើយ។ លើសពីនេះ ផ្លូវល្បឿនលឿនក្នុងតំបន់ក៏ត្រូវបានបិទផងដែរ បន្ទាប់ពីបង្គោលអគ្គិសនីចំនួន ១៥ដើមបានដួលរលំ និង ២៣ដើមទៀតត្រូវរងការខូចខាត៕