ទីក្រុងតៃប៉ិ៖ ជាមួយនឹងការប្រឈមមុខនឹងសម្ពាធកាន់តែធ្ងន់ធ្ងរ ពីមហាយក្សចិន ទាំងនយោបាយ ការទូត សេដ្ឋកិច្ច និងយោធា នៅក្នុងរយៈពេលប៉ុន្មានឆ្នាំចុងក្រោយនេះ រដ្ឋបាលទីក្រុងតៃប៉ិ បានបង្កើនកញ្ចប់ថវិកា លើវិស័យការពារជាតិ កើនឡើងខ្ពស់បំផុត នៅក្នុងកំណត់ត្រារបស់ខ្លួន មិនធ្លាប់មានពីមុនមក...។
ប្រព័ន្ធផ្សព្វផ្សាយដ៏ល្បីល្បាញមួយរបស់ពិភពលោក The Wall Street Journal បានរាយការណ៍ កាលពីថ្ងៃព្រហស្បតិ៍ទី២០ ខែសីហាថា មេដឹកនាំកោះតៃវ៉ាន់ បានស្នើថវិកា សម្រាប់វិស័យការពារជាតិ ក្នុងកម្រិតខ្ពស់បំផុតមិនធ្លាប់មាន រហូតដល់១,១២ពាន់ពាន់លានដុល្លារតៃវ៉ាន់ ឬស្មើនឹងប្រហែល៣៥,១៥ពាន់លានដុល្លារអាម៉េរិក សម្រាប់ឆ្នាំ២០២៧។ តួលេខនេះកើនឡើង១៨ភាគរយ បើធៀបនឹងឆ្នាំ២០២៦ ដែលនឹងធ្វើឱ្យការចំណាយលើវិស័យយោធា កើនលើសពីកម្រិតខ្ពស់ ចំនួន១ពាន់ពាន់លានដុល្លារតៃវ៉ាន់ ដែលបានស្នើឡើងកាលពីដំបូង។
សំណើថវិកាការពារជាតិរបស់កោះតៃវ៉ាន់ ក្លាយជាផ្នែកមួយនៃថវិការដ្ឋបាលកណ្តាល សរុប៣,៩៣ពាន់ពាន់លានដុល្លារតៃវ៉ាន់ ដែលត្រូវបានអនុម័ត ដោយគណៈរដ្ឋមន្ត្រី កាលពីថ្ងៃព្រហស្បតិ៍។ តួលេខសម្រាប់វិស័យការពារជាតិតៃវ៉ាន់ រាប់បញ្ចូលទាំងថវិកា សម្រាប់កងការពារឆ្នេរសមុទ្ទ ប្រាក់សោធននិវត្តន៍យោធា និងថវិកាពិសេស សម្រាប់ការទិញគ្រឿងសព្វាវុធទំនើបៗ។ ការបង្កើនថវិកាវិស័យការពារជាតិរបស់រដ្ឋបាលទីក្រុងតៃប៉ិ ធ្វើឡើងស្របពេលកោះតៃវ៉ាន់ កំពុងប្រឈមមុខនឹងសម្ពាធយោធា កាន់តែខ្លាំងឡើង មកពីប្រទេសចិន និងការអំពាវនាវពីរដ្ឋធានីវ៉ាស៊ីនតោន ជំរុញឱ្យក្រុងតៃប៉ិ ទទួលខុសត្រូវកាន់តែខ្លាំងលើការការពារខ្លួន ដោយយខ្លួនឯងផ្ទាល់។
បើតាមទីភ្នាក់ងារព័ត៌មានរបស់អង់គ្លេស Reuters ប្រធានាធិបតីតៃវ៉ាន់ លោក ឡៃ ឈីង-តេ ( Lai Ching-te) បានប្តេជ្ញាចិត្តថា នឹងរក្សាការចំណាយលើវិស័យការពារជាតិ ឱ្យលើសពី៣ភាគរយ នៃផលិតផលក្នុងស្រុកសរុប (ឬGDP) និងដំឡើង រហូតដល់៥ភាគរយ នៅឆ្នាំ២០៣០។ មេដឹកនាំតៃវ៉ាន់រូបនេះ ចាត់ទុកការចំណាយលើវិស័យយោធាកាន់តែខ្ពស់ គឺជាការវិនិយោគដើម្បីសន្តិភាព។ បើតាមកាសែត Wall Street Journal ថវិកាទាំងនេះ ក៏បង្ហាញអំពីបំណងរបស់តៃវ៉ាន់ ក្នុងការបង្កើនសមត្ថភាពយោធារបស់ខ្លួន រួមទាំងការចំណាយលើដ្រូន (ឬយន្តហោះគ្មានមនុស្សបើក) មីស៊ីល និងគ្រឿងសព្វាវុធ ព្រមទាំងឧបករណ៍យោធាផ្សេងៗទៀត។ ស្របគ្នានេះ រដ្ឋបាលក្រុងតៃប៉ិ បានបញ្ជាក់ថា ខ្លួនកំពុងស្វែងរកការពង្រឹងសមត្ថភាព ក្នុងការរារាំងនូវការវាយប្រហារ ដែលអាចកើតមានពីប្រទេសមហាយក្សចិន។
បើតាម Reuters សំណើនេះ អាចនឹងប្រឈមមុខនឹងការត្រួតពិនិត្យយ៉ាងម៉ត់ចត់ នៅក្នុងស្ថាប័ននីតិប្បញ្ញត្តិ (Legislative Yuan) របស់តៃវ៉ាន់ ខណៈបច្ចុប្បន្នបានគ្រប់គ្រង ដោយគណបក្សប្រឆាំង។ ស្ថាប័ននេះ ធ្លាប់ពន្យារពេលនូវការអនុម័តថវិកា កាលពីពេលកន្លងទៅ និងបានកាត់បន្ថយសំណើចំណាយមួយចំនួនរបស់រដ្ឋាភិបាល។ ជាឧទាហរណ៍ សមាជិកសភា ទើបតែបានអនុម័តថវិការដ្ឋបាលកណ្តាល សម្រាប់ឆ្នាំ២០២៦ កាលពីថ្ងៃទី១៤ ខែសីហា ពោលគឺប៉ុន្មានខែ បន្ទាប់ពីបានដាក់ស្នើដំបូង។
ផែនការនេះ ក៏បានកើតឡើងស្របពេលកោះតៃវ៉ាន់ កំពុងស្វែងរកការពង្រឹងទំនាក់ទំនងសន្តិសុខ ជាមួយសហរដ្ឋអាម៉េរិក ដែលជាប្រភពផ្គត់ផ្គង់គ្រឿងយុទ្ធោបករណ៍សំខាន់ៗរបស់ខ្លួន ទោះជាការលក់អាវុធធំៗ ចាំបាច់ត្រូវមានការអនុម័តពីរដ្ឋធានីវ៉ាស៊ីនតោនយ៉ាងណាក៏ដោយ។ ជាមួយគ្នា ប្រធានាធិបតីសហរដ្ឋអាម៉េរិក លោក ដូណាល់ ត្រាំ (Donald Trump) ធ្លាប់បានលើកឡើងពីកញ្ចប់អាវុធ សម្រាប់កោះតៃវ៉ាន់ មានតម្លៃ ៤៤៥,៩៨ពាន់លានដុល្លារតៃវ៉ាន់ (ដែលកំពុងតែរង់ចាំការអនុម័ត) ថាជាឧបករណ៍អាចប្រើសម្រាប់ការចរចា ជាមួយប្រទេសចិន ដោយបន្ថែមពីភាពមិនច្បាស់លាស ជុំវិញការកំណត់ពេលទិញគ្រឿងសព្វាវុធ នាពេលអនាគត៕
