រដ្ឋធានីហាណូយ៖ សិស្សនៅតាមសាលារបស់វៀតណាម នឹងទទួលបានការបង្រៀន អំពីបញ្ញាសិប្បនិម្មិត (ឬAI) រយៈពេល១២ម៉ោង ក្នុងឆ្នាំសិក្សានីមួយៗ ក្រោមក្របខ័ណ្ឌ ទើបនឹងចេញផ្សាយដោយក្រសួងអប់រំ និងបណ្ដុះបណ្ដាល។ នេះបើតាមប្រព័ន្ធផ្សព្វផ្សាយរបស់រដ្ឋវៀតណាម VN Express ចេញផ្សាយនៅព្រឹកថ្ងៃសុក្រទី២១ ខែសីហានេះ...។
ក្របខ័ណ្ឌនេះ មានគោលបំណងអភិវឌ្ឍសមត្ថភាពបញ្ញាសិប្បនិមិត្ត(AI) ដល់សិស្សានុសិស្ស និងរៀបចំផែនការអភិវឌ្ឍធនធានមនុស្សជាបណ្តើរៗ ដើម្បីឱ្យពួកគេ មានសមត្ថភាពសម្របខ្លួនទៅនឹងការរីកចម្រើនយ៉ាងឆាប់រហ័សនៃវិទ្យាសាស្ត្រ បច្ចេកវិទ្យា និងការប្រែប្រួលតាមប្រព័ន្ធឌីជីថល។ ខ្លឹមសារអប់រំបញ្ញាសិប្បនិមិត្ត បានរៀបចំឡើង សម្រាប់វិស័យសំខាន់ៗចំនួនបួន ដែលឆ្លើយតបទៅនឹងសមត្ថភាពស្នូលរបស់បញ្ញាសិប្បនិមិត្ត រួមមាន៖ ការគិតដោយផ្តោតលើមនុស្សជាគោល, ក្រមសីលធម៌ AI, បច្ចេកទេស និងការអនុវត្ត AI និងការរចនាប្រព័ន្ធ AI។ ការគិតដោយផ្តោតលើមនុស្សជាគោល និងក្រមសីលធម៌ AI ដើរតួជាគោលការណ៍ណែនាំ សម្រាប់ធានា ការប្រើប្រាស់បញ្ញាសិប្បនិមិត្ត AI ប្រព្រឹត្តទៅដោយសុវត្ថិភាព ប្រកបដោយការទទួលខុសត្រូវ និងស្របតាមតម្រូវការផ្នែកសីលធម៌ និងច្បាប់។
ក្របខ័ណ្ឌនេះ គ្របដណ្ដប់លើដំណាក់កាលអប់រំចំនួនពីរ មានជាអាទិ៍៖ ការអប់រំមូលដ្ឋាន (រួមមានកម្រិតបឋមសិក្សា និងមធ្យមសិក្សាបឋមភូមិ) និងការអប់រំតម្រង់ទិសដៅឆ្ពោះទៅរកអាជីព នៅក្នុងកម្រិតមធ្យមសិក្សាទុតិយភូមិ។ នៅកម្រិតបឋមសិក្សា គឺសិស្សនឹងឈ្វេងយល់អំពីកម្មវិធីបញ្ញាសិប្បនិមិត្ត(AI)សាមញ្ញៗ និងទទួលបានការយល់ដឹងបឋម អំពីតួនាទីរបស់AI នៅក្នុងជីវភាពរស់នៅប្រចាំថ្ងៃ ព្រមទាំងរៀនសូត្រ អំពីការការពារទិន្នន័យផ្ទាល់ខ្លួន និងសិទ្ធិរបស់អ្នកនិពន្ធ។ នៅកម្រិតមធ្យមសិក្សាបឋមភូមិ គឺសិស្សនឹងរៀនប្រើប្រាស់ឧបករណ៍ AI ដើម្បីបង្កើតផលិតផលឌីជីថល និងដោះស្រាយបញ្ហា ពាក់ព័ន្ធនឹងការសិក្សា ព្រមទាំងសិក្សាអំពីគោលការណ៍ជាមូលដ្ឋានរបស់ AI និងការទទួលខុសត្រូវរបស់ពលរដ្ឋ នៅក្នុងសង្គមឌីជីថល។
នៅកម្រិតមធ្យមសិក្សាទុតិយភូមិ សិស្សនឹងត្រូវលើកទឹកចិត្តឱ្យឈ្វេងយល់ រចនា និងកែលម្អឧបករណ៍ AI សាមញ្ញៗ តាមរយៈការអនុវត្តគម្រោងនានា ដែលជួយអភិវឌ្ឍជំនាញ ដោះស្រាយបញ្ហា និងការច្នៃប្រឌិត ព្រមទាំងផ្តល់ឱកាសឱ្យពួកគេ ឈ្វេងយល់អំពីផ្លូវអាជីពដែលអាចទៅរួច នាពេលអនាគត។ ក្របខ័ណ្ឌនេះ មានគោលបំណងកសាងសមត្ថភាពបញ្ញាសិប្បនិមិត្ត ដោយផ្អែកលើមូលដ្ឋាន នៃជំនាញព័ត៌មានវិទ្យា និងចំណេះដឹងផ្នែកវិទ្យាសាស្ត្រកុំព្យូទ័រ ស្របតាមកម្មវិធីសិក្សាផ្នែកព័ត៌មានវិទ្យាបច្ចុប្បន្ន។ កម្មវិធីនេះ ក៏នឹងរួមចំណែកដល់ការអភិវឌ្ឍគុណភាព និងសមត្ថភាពទូទៅ ដែលមានចែងក្នុងកម្មវិធីសិក្សាចំណេះទូទៅឆ្នាំ២០១៨ ដោយជួយឱ្យសិស្សក្លាយ ជាពលរដ្ឋឌីជីថលសកម្ម មានសមត្ថភាពប្រើប្រាស់ និងចូលរួមបង្កើតផលិតផល ឬដំណោះស្រាយផ្អែកលើ AI ប្រកបដោយប្រសិទ្ធភាព ការច្នៃប្រឌិត និងការទទួលខុសត្រូវ។
កម្មវិធីអប់រំផ្នែក AI រួមមាន ខ្លឹមសារស្នូល និងខ្លឹមសារបន្ថែម។ ខ្លឹមសារស្នូល ត្រូវបានរៀបចំឡើងដើម្បីធានាឱ្យបាននូវលទ្ធផលសិក្សាសំខាន់ៗ សម្រាប់សិស្សទាំងអស់ នឹងត្រូវបង្រៀនតាមរយៈប្រធានបទអប់រំផ្នែក AI ដោយកំណត់យករយៈពេល១២ម៉ោង សម្រាប់ថ្នាក់នីមួយៗក្នុងឆ្នាំសិក្សារយៈពេល១ឆ្នាំ។ ប្រធានបទទាំងនេះ នឹងត្រូវដាក់បញ្ចូលទៅក្នុងផែនការអប់រំរបស់សាលា និងកាលវិភាគបង្រៀនពីរវេន ក្នុងមួយថ្ងៃ តាមរបៀបដែលសមស្របទៅនឹងលក្ខណៈរបស់សិស្ស និងស្ថានភាពជាក់ស្តែងរបស់សាលា ដោយមិនបង្កជាសម្ពាធ ឬបន្ទុកការងារលើសកម្រិតនោះឡើយ។ ខ្លឹមសារពាក់ព័ន្ធនឹង AI ក៏អាចត្រូវបញ្ចូលទៅក្នុងមុខវិជ្ជា និងសកម្មភាពអប់រំផ្សេងៗទៀតផងដែរ ដើម្បីពង្រឹង និងអនុវត្តចំណេះដឹង និងជំនាញរបស់សិស្ស ដោយមិនផ្លាស់ប្ដូរ ឬបង្កើនលទ្ធផលសិក្សា ដែលតម្រូវសម្រាប់មុខវិជ្ជាទាំងនោះឡើយ។
ខ្លឹមសារបន្ថែម អាចត្រូវផ្ដល់ជូនក្រៅពីកម្មវិធីស្នូល ដែលមានរយៈពេល១២ម៉ោងសិក្សានោះ ដោយអាស្រ័យលើតម្រូវការ និងសមត្ថភាពរបស់សិស្ស ក៏ដូចជាស្ថានភាពជាក់ស្តែងរបស់សាលា។ ខ្លឹមសារបន្ថែមទាំងនេះ រួមមាន ក្លiបសិក្សា គម្រោង សកម្មភាពផ្អែកលើបទពិសោធជាក់ស្តែង កម្មវិធីក្រៅម៉ោងសិក្សា និងការស្រាវជ្រាវ។ ការបង្រៀនជំនាញ AI នឹងផ្តោតសំខាន់លើបទពិសោធ ការអនុវត្តជាក់ស្តែង ការដោះស្រាយបញ្ហា និងការរៀនតាមរយៈគម្រោង ដែលសមស្របទៅនឹងវ័យរបស់សិស្ស។ បញ្ហាទាក់ទងនឹងក្រមសីលធម៌ ហានិភ័យដែលអាចកើតមាន និងការទទួលខុសត្រូវក្នុងការប្រើប្រាស់ AI អាចត្រូវលើកយកមកពិភាក្សា ជជែកដេញដោល សម្ដែងតួនាទី និងសិក្សាលើករណីជាក់ស្តែង។
ដំណើរការនៃការរៀនសូត្រ នឹងវិវឌ្ឍពីការសង្កេត និងបទពិសោធអនុវត្តជាក់ស្តែង នៅកម្រិតបឋមសិក្សា ទៅជាការឈ្វេងយល់ ការពន្យល់ និងការផ្ទៀងផ្ទាត់ នៅកម្រិតមធ្យមសិក្សាបឋមភូមិ និងឈានទៅដល់ការវិភាគ ការវាយតម្លៃប្រកបដោយការត្រិះរិះពិចារណា និងការបង្កើតដំណោះស្រាយ នៅកម្រិតមធ្យមសិក្សាទុតិយភូមិ៕
