ក្រុងព្រះសីហនុ៖ នាវាល្បាតសមុទ្ទដែលមានសមត្ថភាពយោធា ប៉ុន្តែមិនមែនជានាវាពិឃាត ឬនាវាចម្បាំងធុនធ្ងន់ HMS Tamar (P233) របស់កងទ័ពជើងទឹកព្រីតថេន ឬគេធ្លាប់ហៅថា ចក្រភពអង់គ្លេស បានចូលចតនៅមូលដ្ឋានកងទ័ពជើងទឹកសមុទ្ទរាម នៅថ្ងៃទី២០សីហា សម្រាប់ដំណើរទស្សនកិច្ចនៅកម្ពុជា រហូតដល់ថ្ងៃទី២៧ ខែសីហា ឆ្នាំ២០២៦។ តើ​ទស្សនកិច្ចរបស់កងទ័ពជើងទឹកព្រីតថេន មកកាន់កម្ពុជាលើកទី៣នេះនឹងបង្ហាញសមត្ថភាពអ្វីខ្លះ..?

តាមរយៈទំព័រហ្វេសប៊ុកផ្លូវការស្ថានទូតព្រីនថេនប្រចាំកម្ពុជា ប្រកាសថា ក្នុងអំឡុងពេលស្នាក់នៅកម្ពុជា នាវា HMS Tamar នឹងធ្វើសកម្មភាពហ្វឹកហ្វឺនរួមជាមួយកងទ័ពជើងទឹកកម្ពុជា ដើម្បីពង្រឹងកិច្ចសហប្រតិបត្តិការផ្នែកការពារជាតិ និងការផ្លាស់ប្ដូរជំនាញរវាងកម្ពុជា និងចក្រភពព្រីតថេន ព្រមទាំងគាំទ្រកិច្ចសហប្រតិបត្តិការសន្តិសុខដែនសមុទ្ទនៅតំបន់ឥណ្ឌូ-ប៉ាស៊ីហ្វិក។ មេបញ្ជាការរងមូលដ្ឋានកងទ័ពជើងទឹកសមុទ្ទរាម លោកឧត្តមនាវីត្រី អ៊ិន សុខេមរា ព្រមទាំងនាយនាវីជាច្រើនរូប អញ្ជើញទទួលស្វាគមន៍ នាវា HMS Tamar ដែលដឹកនាំដោយលោកវរនាវីទោ ថម លីនដ៏សី អអិន (Tom Lindsey RN) មេបញ្ជាការនាវា។

សម្រាប់កងទ័ពជើងទឹកចក្រភពព្រីតថេន មកទស្សនកិច្ចនៅកម្ពុជាលើកនេះ គឺជាលើកទី៣ហើយ ចាប់តាំងពីឆ្នាំ២០២៣មក ខណៈដំណើរមកដល់នៃនាវា HMS Tamar (P233) ទម្ងន់ផ្ទុកប្រមាណ២០០០តោន ល្បឿនប្រមាន៤៤គីឡូម៉ែត្រក្នុង១ម៉ោង។ បន្ទប់ពីការចូលចតរបស់នាវា HMS Spey កាលពីឆ្នាំ២០២៣ និងឆ្នាំ២០២៤។ ទស្សនកិច្ចរបស់កងទ័ពជើងទឹកចក្រភពព្រីតថេន មកកាន់កម្ពុជាលើកទី៣ កាន់តែបង្ហាញពីការបន្តពង្រឹងទំនាក់ទំនង និងកិច្ចសហប្រតិបត្តិការទ្វេភាគីក្នុងវិស័យការពារជាតិ និងសន្តិសុខដែនសមុទ្ទនៅក្នុងតំបន់។  

ជាការកត់សម្គាល់ ក្រៅពីការមកដល់របស់កងទ័ពជើងទឹកចក្រភពព្រីតថេន នាពេលនេះ អនុរដ្ឋលេខាធិការក្រសួងសង្គ្រាមសហរដ្ឋអាម៉េរិក លោក ចន នូ (John Noh) និងជំនួយការរងរដ្ឋលេខាធិការក្រសួងសង្គ្រាម លោក រ៉ាហ្វាអែល ឡេអូណាដូ (Rafael Leonardo) ក្នុងដំណើរទស្សនកិច្ចនៅមូលដ្ឋានជើងទឹករាមថ្មីៗនេះ ក៏បានប្រកាសដោយរំពឹងថា នឹងមានដំណើរទស្សនកិច្ចនាវាចម្បាំងសហរដ្ឋអាម៉េរិក មកកាន់ប្រទេសកម្ពុជា ដើម្បីបង្កើនទំនុកចិត្ត ក៏ដូចជាលើកកម្ពស់សន្តិសុខក្នុងតំបន់៕