រដ្ឋធានីសេអ៊ូល៖ ក្រោយលោក​ប្រធានាធិបតីសហរដ្ឋអាម៉េរិក ដូណាល់ ត្រាំ អះអាង អំពីផែនការចង់ជួបមេដឹកនាំកូរ៉េខាងជើង លោក គឺម ជុងអ៊ុន មិនបានមួយថ្ងៃស្រួលបួលផង ប្រមុខការពារជាតិកូរ៉េខាងត្បូង បានទម្លាយតួលេខក្បាលគ្រាប់នុយក្លេអ៊ែរ នៅក្នុងឃ្លាំងស្ដុករបស់រដ្ឋធានីព្យុងយ៉ាង...​។

ប្រព័ន្ធផ្សព្វផ្សាយរបស់កូរ៉េខាងត្បូង KBS World Radio បានចុះផ្សាយនៅថ្ងៃព្រហស្បតិ៍ទី២០ ខែសីហានេះថា ​​រដ្ឋមន្ត្រីការពារជាតិកូរ៉េខាងត្បូង ​ លោក អាន ឃ្យូបាក់ (Ahn Gyu-back) បានឱ្យដឹងថា កូរ៉េខាងជើង ត្រូវ​បានគេប៉ាន់ប្រមាណថា អាចនឹងមានអាវុធនុយក្លេអ៊ែរ ចន្លោះពី៨០ទៅ១២០គ្រាប់ នៅក្នុងឃ្លាំងស្ដុករបស់ខ្លួន។ ប៉ុន្តែប្រមុខការពារជាតិរូបនេះ បានបដិសេធ​បញ្ជាក់អំពីតួលេខ​​ជាក់លាក់​ ខណៈ​សមាជិកសភា បានសួរ​ដេញដោលយ៉ាងលម្អិត កាលពីព្រឹកថ្ងៃព្រហស្បតិ៍នេះ។ ប្រមុខការពារជាតិកូរ៉េខាងត្បូង បានធ្វើអត្ថាធិប្បាយ​​បែបនេះ នៅចំពោះមុខគណៈកម្មាធិការសភា ក្រោយពេលប្រធានាធិបតីសហរដ្ឋអាម៉េរិក លោក ដូណាល់ ត្រាំ អះអាងថា មេដឹកនាំកូរ៉េខាងជើង លោក គីម ជុង-អ៊ុន មានអាវុធនុយក្លេអ៊ែរ «ដ៏មានអានុភាពខ្លាំងក្លា» ចំនួន៥៧គ្រាប់។

លោករដ្ឋមន្ត្រី អាន ឃ្យូ-បាក់ ​បញ្ជាក់ថា ការប៉ាន់ស្មានចំនួន ចន្លោះពី៨០ ទៅ១២០គ្រាប់ គឺបានមកពីអង្គការស្រាវជ្រាវឯកជននានា ហើយលោកបានបញ្ជាក់ឡើងវិញនូវគោលជំហររបស់រដ្ឋាភិបាលកូរ៉េខាងត្បូង ដោយមិនទទួលស្គាល់ជាផ្លូវការ ថា កូរ៉េខាងជើង ជាប្រទេស​មានអាវុធនុយក្លេអ៊ែរនោះឡើយ។ ថ្វីបើមេដឹកនាំសហរដ្ឋអាម៉េរិក កម្រនឹងលើកឡើងពីតួលេខ​ជាក់លាក់ ទាក់ទងនឹងអាវុធនុយក្លេអ៊ែររបស់កូរ៉េខាងជើង យ៉ាងណាក្ដី ប៉ុន្តែលោកប្រធានាធិបតី ដូណាល់ ត្រាំ បានលើកឡើង អំពី​​បញ្ហានេះ កាលពីថ្ងៃពុធនៅឯសេតវិមាន ខណៈ​លោកកំពុងពិភាក្សាអំពីលោក គីម ជុងអ៊ុន ​​និងផែនការជួបជាមួយមេដឹកនាំកូរ៉េខាងជើង​រូបនេះ នៅក្នុងឆ្នាំ២០២៦។

ការលើកឡើងបែបនេះ ធ្វើឡើងស្របពេល​លោកប្រធានាធិបតី ដូណាល់ ត្រាំ បានបញ្ជាដល់មន្ត្រីជាន់ខ្ពស់នៃមន្ទីរបញ្ចកោណ កាត់បន្ថយរយៈពេលធ្វើសមយុទ្ធរួម ជាមួយកងទ័ពកូរ៉េខាងត្បូង ដោយលោកបានសរសេរនៅលើបណ្តាញសង្គម កាលពីថ្ងៃអាទិត្យ ថា សមយុទ្ធទាំងនោះ បានផ្ញើសារទៅកាន់រដ្ឋធានីព្យុងយ៉ាង ដែលជាសារ«មិនសមរម្យទាំងស្រុង និងមានលក្ខណៈអរិភាព ចំពោះប្រទេសមួយដែលមិនបង្កការគំរាមកំហែង និងតែងតែបង្ហាញការគោរព ចាប់តាំងពីលោក ដូណាល់ ត្រាំ ឡើងកាន់តំណែង ជាប្រធានាធិបតី រហូតមក»៕