រដ្ឋធានីញូវដេលី៖ អគ្គិភ័យបានឆាបឆេះសណ្ឋាគារមួយក្នុងទីក្រុង កូលកាតា (Kolkata) រដ្ឋ វ៉េស បេនហ្កាល់ (West Bengal ) ប្រទេសឥណ្ឌា នៅយប់ម៉ោងជិត២ ឈានចូលថ្ងៃទី១៩ ខែសីហា ឆ្នាំ២០២៦នេះ បណ្តាលឱ្យមនុស្សយ៉ាងតិច៩នាក់ស្លាប់ និង៦នាក់ផ្សេងទៀតរងរបួស។

មិននៅឆ្ងាយនោះទេ! សណ្ឋាគារដែលត្រូវព្រះអគ្គិលេបត្របាក់នេះ ស្ថិតនៅជិតនាយកដ្ឋានពន្លត់អគ្គិភ័យតែម្តង។ បើតាមរបាយ​ការណ៍​ដែលផ្សាយដោយសារព័ត៌មានអន្តរជាតិនានា ​រថយន្ត​ពន្លត់​អគ្គិភ័យ​ចំនួន​៥​គ្រឿង ​ត្រូវ​បាន​ដាក់​ពង្រាយ ​ដើម្បីបាញ់ទឹកពន្លត់អគ្គិភ័យ រហូតរលត់ និងអាច​គ្រប់គ្រងស្ថានការណ៍បាន តែសណ្ឋាគារនេះ ឆេះស្ទើរតែខ្ទេចខ្ទីអស់ទៅហើយ។ ជាមួយគ្នា ​ក្រុម​ប៉ូលិស​ និង​ក្រុម​អ្នកជំនាញផ្នែកគ្រប់គ្រង​គ្រោះ​មហន្តរាយ​ បាន​ធ្វើ​ប្រតិបត្តិការ​ជួយ​សង្គ្រោះភ្ញៀវ និងប្រជាជននៅជិតសណ្ឋាគារដែលឆេះនេះ។ អ្នក​របួស​ ត្រូវ​បាន​បញ្ជូន​ទៅ​កាន់​មន្ទីរពេទ្យ​នៅក្បែរ​នោះ​ភ្លាមៗ។ 

សារព័ត៌មាន ABC ស្រង់សម្តីមន្រ្តីប៉ូលិសម្នាក់ដែលចុះធ្វើប្រតិបត្តិការដល់ទីតាំងសណ្ឋាគារថា ក្រុមអ្នកពន្លត់អគ្គិភ័យ បានព្យាយាមចូលទៅរកមនុស្សដែលជាប់នៅជាន់ខាងលើ ខណៈផ្សែងយ៉ាងក្រាស់ឃ្មឹក បានហុយយ៉ាងទ្រលោមពាសពេញសណ្ឋាគារ។ អាជ្ញាធរមានសមត្ថកិច្ច អះអាងថា កិច្ចការសំខាន់ និងត្រូវធ្វើបន្ទាន់ គឺជួយសង្គ្រោះមនុស្សនៅជាប់នៅខាងក្នុងអគារ និងស៊ើបអង្កេតរកមូលហេតុនៃការឆេះនេះ។ 

មន្រ្តីប៉ូលិស សន្និដ្ឋាថា ចំនួនអ្នកស្លាប់ អាចនឹងមានច្រើនជាង៩នាក់។ ABC ផ្សាយថា អគ្គិភ័យដែលឆាបឆេះសន្ធោសន្ធៅបែបនេះ ជារឿយៗ គឺបណ្តាលមកពីបញ្ហាចរន្តអគ្គិសនី ឬការផ្ទុះហ្កាស ឬឧស្ម័ន ហើយសឹងតែក្លាយជារឿងធម្មតាទៅហើយនៅឥណ្ឌា។ ទើបតែ២-៣ថ្ងៃមុនប៉ុណ្ណោះ គឺកាលពីថ្ងៃទី១៧ ខែសីហាថ្មីៗនេះ អគ្គិភ័យបានឆាបឆេះសណ្ឋាគារមួយក្នុងទីក្រុង តារ៉ាភីត (Tarapith) រដ្ឋវ៉េស បេនហ្កាល់ នេះ បណ្តាលឱ្យមនុស្សយ៉ាងតិច៧នាក់ស្លាប់ និងជាច្រើននាក់ផ្សេងទៀតរងរបួសធ្ងន់ធ្ងរ។ ចំណែកកាលពីខែធ្នូ ឆ្នាំ២០២៥ មានមនុស្សយ៉ាងតិច២៥នាក់បានស្លាប់ ក្នុងហេតុការណ៍ឆេះក្លិបរាត្រីដ៏ពេញនិយមមួយនៅរដ្ឋ ហ្កូ (Goa) ភាគខាងលិចប្រទេសឥណ្ឌា៕