រដ្ឋធានីហ្ស៊េរុយសាឡិម៖ មានករណីផ្ទុះគ្រាប់ប៉ែកនៅកសិដ្ឋានមួយ ស្ថិតក្នុងទីក្រុងម៉េតូឡា (Metula) ភាគខាងជើងប្រទេសអ៊ីស្រាអែល នៅថ្ងៃទី១៨ ខែសីហា ឆ្នាំ២០២៦នេះ។ កម្មករជនជាតិថៃ៦នាក់ ដែលកំពុងបំ​ពេញការងារ បានត្រូវរបួស។ 

ក្នុងចំណោម៦នាក់នោះ មាន២នាក់ ត្រូវរបួសធ្ងន់ ហើយមាន​ម្នាក់ ​កំពុង​ទទួល​ការ​វះកាត់។ ប៉ូលិសអ៊ីស្រាអែល សន្និដ្ឋានជាបឋមថា គ្រាប់បែកដែលផ្ទុះនោះ គឺជាគ្រាប់បែកចាស់នៅកប់ក្នុងដីយូរណាស់មកហើយ ដែលមន្រ្តីជំនាញរកមិនទាន់ឃើញ។ ប៉ូលិស បញ្ជាក់ទៀតថា ការផ្ទុះនេះ មិនមែនជាការវាយប្រហារដោយមីស៊ីល ឬអាវុធថ្មីនោះទេ។ ទោះយ៉ាងណា ប៉ូលិស និងមន្រ្តីជំនាញ ​កំពុង​ស៊ើបអង្កេត ដើម្បីដឹងឱ្យច្បាស់ពី​ហេតុការណ៍​នេះ​។ 

ទីក្រុងម៉េតូឡា គឺនៅជិតព្រំដែនជាប់ជាមួយប្រទេសលីបង់ ហើយជាតំបន់ដែលរងផលប៉ះពាល់ផ្ទាល់ពីការប្រយុទ្ធគ្នាយ៉ាងខ្លាំងរវាងអ៊ីស្រាអែល និងលីបង់នាពេលបច្ចុប្បន្ន។ នៅអ៊ីស្រាអែល តំបន់ដែលសម្បូរកសិដ្ឋាន និងការធ្វើកសិកម្មច្រើនជាងគេ គឺស្ថិតក្នុងទីក្រុងម៉េតូឡានេះឯង។ របាយការណ៍ចុះផ្សាយដោយសារព័ត៌មាន The Times of Israel បង្ហាញថា ក្នុងចំណោមជនបរទេសទាំងអស់ ជនជាតិថៃមានចំនួនច្រើនគេ ដែលទៅធ្វើការនៅអ៊ីស្រាអែល ពិសេសផ្នែកកសិកម្មនេះ៕