រដ្ឋធានីហាណូយ៖ កន្លងមក មានតែបណ្ដាប្រទេសមានបច្ចេកវិទ្យាធំៗប៉ុណ្ណោះ ដែលបានប្រើប្រាស់កម្លាំងខ្យល់សម្រាប់បង្កើតថាមពលអគ្គិសនី បំពេញតម្រូវការនៅក្នុងប្រទេសរបស់ពួគេ ប៉ុន្ដែឥឡូវនេះ វៀតណាម ក៏កំពុងសាងសង់រោងចក្រអគ្គិសនីបែបនេះដូចគ្នា នៅក្នុងប្រទេសរបស់ខ្លួនដែរ...។
សារព័ត៌មានវៀតណាម VN Express International បានចេញផ្សាយកាលពីពេលថ្មីៗនេះថា អ្នកជំនាញផ្នែកថាមពលវៀតណាម កំពុងសាងសង់រោងចក្រអគ្គិសនី ដើរដោយកម្លាំងខ្យល់ មានសមត្ថភាពផលិតថាមពលអគ្គិសនីរហូតដល់៥០មេហ្គាវ៉ាត់ (MW)។ ការសាងសង់រោងចក្រថាមពលអគ្គិសនីដើរដោយកម្លាំងខ្យល់នេះ ចាប់ផ្តើមដំណើរការនៅក្នុងខេត្តទឹកខ្មៅ(ដែនដីកម្ពុជាក្រោម) ឬភាគខាងត្បូងប្រទេសវៀតណាមបច្ចុប្បន្ន ដោយបានចាប់អនុវត្តតាំងពីថ្ងៃទី១១ ខែសីហា ឆ្នាំ២០២៦។ រោងចក្រថាមពលអគ្គិសនី ដើរដោយកម្លាំងខ្យល់នេះ ប្រើប្រាស់ផ្ទៃដីគោក និងសមុទ្ទ ទំហំប្រហែល៦០០ហិកតា ជាមួយនឹងទំហំវិនិយោគសរុបប្រមាណ៩៦លានដុល្លារអាម៉េរិក។ ទំហំចំណាយលើកគម្រោងនេះ រួមមាន ខ្សែបញ្ជូនថាមពលកម្រិត១១០គីឡូវ៉ុល (KV) ប្រវែង១៣គីឡូម៉ែត្រ, អនុស្ថានីយបំប្លែងតង់ស្យុងកម្រិត៦៣មេហ្គាវ៉ុល-អំពែរ (MVA), ប្រព័ន្ធខ្សែភ្លើងក្រោមដីកម្រិតតង់ស្យុងមធ្យម ព្រមទាំងទួរប៊ីនខ្យល់ និងគ្រឹះរបស់វា។
លោក ផាម មីញទ្រី (Phạm Minh Trí) អគ្គនាយកក្រុមហ៊ុនសុង ឡាម-កាម៉ៅ អេនើរជី JSC (Song Lam -Ca Mau Energy JSC) បានបញ្ជាក់ថា ខេត្តទឹកខ្មៅ នៅជាប់នឹងសមុទ្ទទាំងបីជ្រុង មានសក្តានុពលយ៉ាងខ្លាំង សម្រាប់ការអភិវឌ្ឍថាមពលអគ្គិសនី ដើរដោយកម្លាំងខ្យល់។ ក្រោយពេលសាងសង់រួច រោងចក្រអគ្គិសនីមួយនេះ ត្រូវគេរំពឹងទុកថា នឹងបង្កើតអគ្គិសនីប្រចាំឆ្នាំ គិតជាមធ្យម ប្រហែល១៤៤លានគីឡូវ៉ាត់ម៉ោង(kWh)។ ជាមួយគ្នា ក្រុមហ៊ុននឹងប្រមូលផ្តុំធនធាន សម្រាប់អនុវត្តដំណាក់កាលបន្តបន្ទាប់ ដើម្បីពន្លឿនការសាងសង់ឱ្យស្របតាមកាលកំណត់ ព្រមទាំងបំពេញកាតព្វកិច្ច សម្រាប់រដ្ឋ និងការទទួលខុសត្រូវចំពោះសហគមន៍មូលដ្ឋាន។
ទន្ទឹមនេះ លោក ហ្វិញ ជី ង្វៀន (Huỳnh Chí Nguyên) អនុប្រធានគណៈកម្មាធិការប្រជាជនខេត្ត បញ្ជាក់ថា អាជ្ញាធរខេត្ត បានស្នើឱ្យក្រុមហ៊ុនវិនិយោគ ប្រើប្រាស់ធនធានហិរញ្ញវត្ថុ មនុស្ស និងឧបករណ៍ឱ្យអស់ពីលទ្ធភាព ដើម្បីធានាគុណភាព និងវឌ្ឍនភាពនៃគម្រោង។ បើតាមផែនការ រោងចក្រនេះ នឹងចាប់ផ្តើមដំណើរការផលិតអគ្គនិសនីនៅត្រីមាសទី៤នៃឆ្នាំ២០២៨ យ៉ាងយូរបំផុត។ ដូច្នេះ ក្រុមហ៊ុនវិនិយោគ ត្រូវតែគោរពបទប្បញ្ញត្តិឱ្យបានម៉ឺងម៉ាត់ ស្តីពីការវិនិយោគ ហើយផ្តល់អាទិភាពដល់កម្មករក្នុងស្រុក និងបំពេញការទទួលខុសត្រូវសង្គម ដើម្បីរួមចំណែកដល់ការអភិវឌ្ឍសេដ្ឋកិច្ច ការពារបរិស្ថាន និងលើកកម្ពស់កម្រិតជីវភាពរបស់ប្រជាជនក្នុងតំបន់នេះ៕
