រដ្ឋធានីតេហ៊ីរ៉ង់៖ កងនាវាផ្ទុកយន្ដហោះវាយប្រហាររបស់សហរដ្ឋអាម៉េរិក យូអេសអេស អាប្រាហាំ លីនខន់ (USS Abraham Lincoln) ចាប់ផ្ដើមដាក់ពង្រាយ ចាប់តាំងពីខែវិច្ឆិកា ឆ្នាំ២០២៥ នៅក្នុងប្រតិបត្ដិការយោធា ប្រឆាំងនឹងប្រទេសអ៊ីរ៉ង់ ប៉ុន្ដែការដាក់ពង្រាយរយៈពេលយូរបែបនេះ បានធ្វើឱ្យសមាជិក នៃកងនាវិក នៅលើនាវាផ្ទុកយន្ដហោះមួយគ្រឿងនេះ កើតមានវិបត្ដិផ្លូវចិត្ត រហូតដល់ចង់ធ្វើអត្ដឃាត...។
សារព័ត៌មានរបស់កូរ៉េខាងត្បូង The Chosun Daily (ឌឺ ជូសុន ដេលី) បានចេញផ្សាយនៅព្រឹកថ្ងៃអង្គារទី១៨ ខែសីហាថា រហូតមកដល់ពេលនេះ មានសេចក្តីរាយការណ៍ អំពីកងនាវាផ្ទុកយន្តហោះចម្បាំងរបស់សហរដ្ឋអាម៉េរិក USS Abraham Lincoln ដែលបានដាក់ពង្រាយ នៅក្នុងតំបន់មជ្ឈិមបូព៌ា អស់រយៈពេលប្រហែល៩ខែ បន្ទាប់ពីចាកចេញពីសហរដ្ឋអាម៉េរិក ចាប់តាំងពីខែវិច្ឆិកា ឆ្នាំ២០២៥ រហូតមក កំពុងប្រឈមនឹងបញ្ហាជាបន្តបន្ទាប់ ដោយសារការដាក់ពង្រាយកងកម្លាំងរយៈពេលយូរ។ ឥឡូវបញ្ហាដ៏ចម្រូងចម្រាសជាច្រើន បានផ្ទុះឡើង បន្ទាប់ពីមានករណីសមាជិកនាវិក នៅលើនាវាផ្ទុកយន្ដហោះមួយគ្រឿង ប៉ុនប៉ងធ្វើអត្តឃាត។ ស្ថិតក្នុងស្ថានភាពបែបនេះ លោកនាយឧត្ដមសេនីយ៍ ប្រេដ ខូភើរ (Brad Cooper) មេបញ្ជាការនៃទីបញ្ជាការកណ្តាល សហរដ្ឋអាម៉េរិក (U.S. Central Command) ទទួលបន្ទុកប្រតិបត្តិការយោធា ប្រឆាំងនឹងប្រទេសអ៊ីរ៉ង់ បានចាត់វិធានការបន្ទាន់ជាច្រើន រួមទាំងការចុះទៅជួបផ្ទាល់ជាមួយកងនាវិក នៅលើនាវាផ្ទុកយន្ដហោះនេះ។
បើតាមទីបញ្ជាការកណ្ដាលសហរដ្ឋអាម៉េរិក (CENTCOM) បានឱ្យដឹងថា លោកនាយឧត្តមសេនីយ៍ ប្រេដ ខូភើរ ទទួលបន្ទុកដឹកនាំប្រតិបត្តិការសង្គ្រាមប្រឆាំងនឹងអ៊ីរ៉ង់ បានចុះទៅដល់នាវាផ្ទុកយន្ដហោះ យូអេសអេស អាប្រាហាំ លីនខន់ ដែលកំពុងប្រតិបត្តិការ នៅក្នុងដែនទឹកនៃតំបន់មជ្ឈិមបូព៌ា កាលពីប៉ុន្មានថ្ងៃមុន។ លោកផ្កាយ៤រូបនេះ កោតសរសើរថា៖«កងនាវាផ្ទុកយន្ដហោះវាយប្រហារ យូអេសអេស អាប្រាហាំ លីនខន់ ជាក្រុមដ៏រឹងមាំមួយ ទទួលបានលទ្ធផលល្អប្រសើរ ហើយលោកមានមោទកភាពយ៉ាងខ្លាំង ចំពោះសមិទ្ធផលរបស់កងទ័ពអាម៉េរិក។ ប្រវត្តិសាស្ត្រនេះ នឹងកត់ត្រា អំពីការដាក់ពង្រាយកងកម្លាំង នៅក្នុងព្រឹត្តិការណ៍ដ៏តានតឹង និងមានសារសំខាន់បំផុត ក្នុងសង្គ្រាមសម័យទំនើបនេះ»។
ទោះជាយ៉ាងណាក៏ដោយ លោកនាយឧត្ដមសេនីយ៍ ប្រេដ ខូភើរ បានបញ្ជាក់ផងដែរថា៖«ក្នុងចំណោមកងនាវាផ្ទុកយន្តហោះចម្បាំងទាំង១១គ្រឿងរបស់កងទ័ពជើងទឹកសហរដ្ឋអាម៉េរិក កងនាវាផ្ទុកយន្ដហោះ Lincoln មានករណីពាក់ព័ន្ធនឹងសុខភាពផ្លូវចិត្តតិចតួចបំផុត។ នេះមិនមែនមានន័យថា អ្វីៗទាំងអស់សុទ្ធតែល្អឥតខ្ចោះនោះដែរ។ បញ្ហាសុខភាពផ្លូវចិត្ត ក៏ដូចជាសុខភាពរាងកាយ និងសុខភាពខាងស្មារតី គឺសុទ្ធតែត្រូវការនូវការយកចិត្តទុកដាក់បំផុត»។
កងនាវាផ្ទុកយន្ដហោះវាយប្រហារ យូអេសអេស អាប្រាហាំ លីនខន់ មាននាវិកនៅលើនោះ ជាង៥០០០នាក់ ហើយបានចាកចេញពីមូលដ្ឋានកងទ័ពជើងទឹក San Diego រដ្ឋកាលីហ្វ័រញ៉ា សហរដ្ឋអាម៉េរិក នៅថ្ងៃទី២១ ខែវិច្ឆិកា ឆ្នាំ២០២៥។ បើតាមផែនការពីដំបូងឡើយ កងនាវាផ្ទុកយន្ដហោះនេះ នឹងត្រូវដាក់ពង្រាយ នៅតំបន់ឥណ្ឌូ-ប៉ាស៊ីហ្វិក ប៉ុន្ដែបន្ទាប់មក ក៏បានដាក់ពង្រាយឡើងវិញ ទៅកាន់តំបន់មជ្ឈិមបូព៌ា នៅក្នុងខែមករា ឆ្នាំ២០២៦ ហើយក៏បានចូលរួមប្រតិបត្ដិការយោធា នៅក្នុងសង្គ្រាមប្រឆាំងនឹងអ៊ីរ៉ង់៕
