រាជធានីភ្នំពេញ៖ ក្នុងជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅវិមានសន្តិភាព នាព្រឹកថ្ងៃទី១៤ ខែសីហា ឆ្នាំ២០២៦ លោក អែលប្រ៊ីដ អ៊ែនឌ្រូ ខូលប៊ី (Elbridge A. Colby) អនុរដ្ឋមន្ត្រីទទួលបន្ទុកគោលនយោបាយ នៃក្រសួងសង្គ្រាម​សហរដ្ឋអាម៉េរិក បានសង្កត់ធ្ងន់ថា កម្ពុជាជាប្រទេសសំខាន់មួយក្នុងភាពជាដៃគូជាមួយសហរដ្ឋអាម៉េរិក…។

អនុរដ្ឋមន្ត្រីនៃក្រសួងសង្គ្រាម​សហរដ្ឋអាម៉េរិក មានប្រសាសន៍ប្រាប់សម្ដេចធិបតី ហ៊ុន ម៉ាណែត ថា លោកវាយតម្លៃខ្ពស់ ចំពោះភាពរីកចម្រើននៃទំនាក់ទំនងទ្វេភាគី​ សហរដ្ឋអាម៉េរិក-កម្ពុជា ជាពិសេស ក្នុងវិស័យការពារជាតិ។ លោកអះអាងថា៖«សហរដ្ឋអាម៉េរិក ​ នឹងបន្តពូនជ្រំកិច្ចសហប្រតិបត្តិការការពារជាតិជាមួយកម្ពុជា ឱ្យកាន់តែរឹងមាំថែមទៀត»។ ជាការឆ្លើយតប សម្ដេចធិបតី ហ៊ុន ម៉ាណែត បានបង្ហាញក្ដីរីករាយចំពោះវឌ្ឍនភាពវិជ្ជមាននៃទំនាក់ទំនងកម្ពុជា-សហរដ្ឋអាម៉េរិក រួមទាំងក្នុងវិស័យការពារជាតិ។ សម្ដេចធិបតី ក៏បានវាយតម្លៃខ្ពស់ ចំពោះការបន្តនូវកិច្ចសហប្រតិបត្តិការជាច្រើន ក្នុងវិស័យយោធារវាងប្រទេសទាំងពីរ ព្រមទាំងប្ដេជ្ញាចិត្តជំរុញកិច្ចសហប្រតិបត្តិការនេះឱ្យកាន់តែរីកចម្រើន និងរឹងមាំ។ សម្ដេចក៏បានសម្ដែងការពេញចិត្តចំពោះវឌ្ឍនភាពនៃដំណើរការត្រៀមរៀបចំ សមយុទ្ធយោធា «ឆ្មាំអង្គរ» (Angkor Sentinel) ដែលគ្រោងនឹងធ្វើនៅឆ្នាំ២០២៧ ក៏ដូចជាការបន្តកិច្ចសហប្រតិបត្តិការលើការពង្រឹងសមត្ថភាពកងទ័ពកម្ពុជា។

មុនមកកម្ពុជា លោក អែលប្រ៊ីដ អ៊ែនឌ្រូ ខូលប៊ី អនុរដ្ឋមន្ត្រីនៃក្រសួងសង្គ្រាម​ សហរដ្ឋអាម៉េរិក បានអញ្ជើញទស្សនកិច្ចនៅប្រទេសថៃ ក្នុងគោលបំណងពិភាក្សា និងពង្រឹងកិច្ចសហប្រតិបត្តិការការពារជាតិរវាងថៃ-សហរដ្ឋអាម៉េរិកដូចគ្នាផងដែរ។ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ បានថ្លែងប្រាប់អង្គភាពសារព័ត៌មាន SBM News នៅរសៀលថ្ងៃទី១៤សីហានេះថា ប្រទេសនីមួយៗ តែងជួបគ្នានៅក្នុងជំនួបពិសេសៗ ហើយបានប្រើប្រាស់សុទ្ធតែភាសាការទូតនិយាយអំពីទំនាក់ទំនង ហើយយើងមិនបានដឹងថា លទ្ធផលក្នុងកិច្ចប្រជុំជាក់ស្ដែង គេនិយាយពីអ្វីឱ្យពិតប្រាកដទេ។ ប៉ុន្តែលោក សេក សុជាតិ គូសបញ្ជាក់ថា៖«យ៉ាងណា អ្វីដែលយើងចង់ឃើញ គឺការអនុវត្តជាក់ស្ដែងរវាងការភ្ជាប់ទំនាក់ទំនងរវាងប្រទេស និងប្រទេសដែលជាដៃគូ ឬជាមិត្តរបស់ខ្លួនទៅតាមទំនាក់ទំនង និងកម្រិតនៃការទូតរបស់ប្រទេសនីមួយៗ»។

លោកសង្កត់ធ្ងន់ថា៖«ប្រទេសមហាអំណាចតែងតែស្វែងរកអ្នកគាំទ្រ មិនថាពួកគេមាននិន្នាការអ្វីទេ។ ដូច្នេះ បើសិនជាប្ដេជ្ញាពង្រឹងទំនាក់ទំនងទាំងសងខាង តែម្ខាងមានទំនោរខ្លាំងជាង ហើយម្ខាងទៀតមានទំនោរខ្សោយជាង នោះក៏ជាបញ្ហាដែរ។ យ៉ាងណាក៏ដោយ អ្វីដែលយើងចង់ឃើញគឺការអនុវត្តជាក់ស្ដែង ហើយមានភាពស្មោះត្រង់ក្នុងការជួយគ្នាទៅវិញទៅមក ដើម្បីពង្រឹងគុណភាពនៃការការពារជាតិ និងសន្តិសុខនៅក្នុងតំបន់»។ សូមជម្រាបថា កាលពីថ្ងៃទី១៣សីហាម្សិលមិញ ក្រសួងការពារជាតិថៃ បានទទួលស្វាគមន៍លោក អែលប្រ៊ីដ អ៊ែនឌ្រូ ខូលប៊ី អនុរដ្ឋមន្ត្រីក្រសួងសង្គ្រាមសហរដ្ឋអាម៉េរិក មុនលោកបន្តដំណើរមកកាន់ប្រទេសកម្ពុជា។ ក្នុងជំនួប ភាគីទាំង២បានបង្ហាញជំហរប្តេជ្ញាចិត្តក្នុងការអភិវឌ្ឍសកម្មភាពការពារជាតិរបស់ប្រទេសថៃ ដើម្បីផលប្រយោជន៍ទៅវិញទៅមក ខណៈផែនការ ឬខ្លឹមសារសំខាន់ៗផ្សេងទៀតនៅពីក្រោយជំនួបនេះ មិនត្រូវបានទម្លាយចេញឡើយ៕