រដ្ឋធានីប៉េកាំង៖ ក្រុមអ្នកស្រាវជ្រាវ នៃសាកលវិទ្យាល័យហ្ស៊ីជៀង (Zhejiang) ហៅកាត់ ZJU បានដោះស្រាយបញ្ហាដ៏ស្មុគស្មាញមួយ ទាក់ទងនឹងម៉ូលេគុល ដោយបានប្រែក្លាយមេផ្សិត(Yeast)ធម្មតា ឱ្យទៅជារោងចក្រដ៏មានប្រសិទ្ធភាព សម្រាប់ផលិតឱសថព្យាបាលជំងឺមហារីកមានតម្លៃថ្លៃ និងបានបង្កើនផលិតភាពរបស់វា រហូតដល់១ពាន់ដង។ នេះបើតាមសារព័ត៌មានរបស់ហុងកុង South China Morning Post (SCMP) ។
ថ្នាំប្រឆាំងនឹងមហារីក ឈ្មោះ Vinblastine (វិនប្លាស្ទីន) ធ្លាប់តែចម្រាញ់ចេញពីប្រភពដើម គឺរុក្ខជាតិផេរីវីនខលម៉ាដាហ្កាស្ការ (Madagascar periwinkle ឬ Catharanthus roseus) អស់រយៈពេលជាយូរមកហើយ។ ប៉ុន្តែគេប្រើស្លឹកស្ងួតរបស់វារហូតដល់២តោន សម្រាប់ផលិតថ្នាំប្រឆាំងនឹងមហារីក Vinblastine បានត្រឹមតែ១ក្រាមប៉ុណ្ណោះ ធ្វើឱ្យថ្នាំនេះ មានតម្លៃថ្លៃជាងមាសទៅទៀត បើគិតតាមទម្ងន់។ ភាពកម្រខ្លាំងនេះ បានធ្វើឱ្យថ្នាំមានតម្លៃថ្លៃ និងមានការផ្គត់ផ្គង់មិនទៀងទាត់ អស់រយៈពេលជាច្រើនទសវត្សរ៍មកហើយ។
ទោះជាយ៉ាងណាក៏ដោយ ក្រោយការខិតខំប្រឹងប្រែងអស់រយៈពេលជាច្រើនឆ្នាំ ក្រុមការងាររបស់ចិនមួយ ដឹកនាំដោយលោកសាស្ត្រាចារ្យ លៀន ជាហ្សាង (Lian Jiazhang) នៃសាកលវិទ្យាល័យ ZJU ប្រទេសចិន ដោយមានកិច្ចសហប្រតិបត្តិការ ជាមួយក្រុមអ្នកស្រាវជ្រាវរបស់លោក ហ្គូ យ៉ាង (Qu Yang) មកពីសាកលវិទ្យាល័យញូវ ប្រាន់ស្វីកខ៍ (New Brunswick) ប្រទេសកាណាដា និងក្រុមការងាររបស់លោកស្រី វ៉ាង យ៉ាជី (Wang Yajie) មកពីសាកលវិទ្យាល័យវ៉េស្ដលេក (Westlake) នៃប្រទេសចិន បានដោះស្រាយបញ្ហាជាប់គាំងទាំងនេះ ប្រកបដោយជោគជ័យ។
ក្រុមអ្នកវិទ្យាសាស្រ្ដទាំងនេះ បានកែប្រែហ្សែនរបស់មេផ្សិត ផលិតស្រាបៀរ (brewer’s yeast) សម្រាប់ផលិតសារធាតុកាថារ៉ានធីន (Catharanthine) ដែលជាសារធាតុដើម សម្រាប់ផលិតថ្នាំប្រឆាំងនឹងជំងឺមហារីក Vinblastine នៅក្នុងបរិមាណ១៦៤,៩មិល្លីក្រាមក្នុងមួយលីត្រ នៅខាងក្នុងធុងបង្កកំណើត (Fermenter)។ បរិមាណនេះ ខ្ពស់ជាងជិត១០០០ដង បើធៀបនឹងតួលេខដែលធ្លាប់ផ្សព្វផ្សាយជាសកល កាលពីពេលមុន។ លទ្ធផលរកឃើញទាំងនេះ ត្រូវបានចុះផ្សាយដោយទស្សនាវដ្ដីវិទ្យាសាស្រ្ត (Science) ដែលមានការត្រួតពិនិត្យដោយក្រុមអ្នកជំនាញ ក្នុងវិស័យដូចគ្នា កាលពីថ្ងៃទី១៦ ខែកក្កដា ឆ្នាំ២០២៦។
បើតាមសេចក្តីប្រកាសព័ត៌មានពី ZJU បានឱ្យដឹងថា រចនាសម្ព័ន្ធស្នូលដែល VinBLAST ភ្ជាប់នោះ គឺជាលក្ខណៈរួម ដែលមាននៅក្នុងឱសថធម្មជាតិជាង៧០០ប្រភេទ។ នេះមានន័យថា ប្រព័ន្ធនេះ អាចនឹងត្រូវពង្រីកនាពេលអនាគត សម្រាប់ផលិតឱសថសំខាន់ផ្សេងៗទៀត ដូចជា ថ្នាំអេច្មាលីន (Ajmaline) ដែលប្រើសម្រាប់ព្យាបាលបញ្ហាចង្វាក់បេះដូង ដើរមិនប្រក្រតីជាដើម។ ក្រុមអ្នកវិទ្យាសាស្រ្ដទាំងនេះ បញ្ជាក់ថា ពួកគេកំពុងសហការជាមួយស្ថាប័នដៃគូ ដើម្បីបង្កើនកម្រិតផលិតកម្មថ្នាំ Vinblastine និងសារធាតុអាល់កាឡូអ៊ីត (alkaloids) និងកំពុងខិតជិតដល់គោលដៅក្នុងការធ្វើឱ្យឱសថជួយសង្គ្រោះជីវិតមនុស្សទាំងនេះ កាន់តែងាយស្រួល ទទួលបាន និងមានតម្លៃសមរម្យ៕
