រដ្ឋធានីហាណូយ៖ បច្ចុប្បន្ន វៀតណាម ក្រៅពីការបង្កើនការអភិវឌ្ឍវិស័យយោធា សេដ្ឋកិច្ច នយោបាយ និងវិស័យសក្តានុពលមួយចំនួនទៀត ដើម្បីធ្វើការប្រកួតប្រជែងជាមួយបណ្ដាប្រទេសក្នុងតំបន់ និងពិភពលោក ប្រទេសកុម្មុយនិស្ដមួយនេះ ក៏កំពុងបោះជំហានយ៉ាងលឿនស្លេវលើផ្នែកវេជ្ជសាស្ត្រផងដែរ រហូតឈានដល់ការវះកាត់ជំងឺមហារីក ប្រើប្រាស់ប្រព័ន្ធរ៉ូបូត...។
សារព័ត៌មានវៀតណាម VN Express International បានចុះផ្សាយកាលពីថ្ងៃទី១២សីហាថា មន្ទីរពេទ្យតាំអាញ់ (Tam Anh) ជាមន្ទីរពេទ្យទី១របស់វៀតណាម ដែលវះកាត់ជំងឺមហារីក ដោយប្រើប្រាស់ប្រព័ន្ធរ៉ូបូត ដា វីនស៊ី ហ្ស៊ី (Da Vinci Xi) ចំនួនពីរគ្រឿងក្នុងពេលតែមួយ កំលុងនៃការវះកាត់ព្យាបាលជំងឺមហារីក ដោយអនុវត្តតាមបច្ចេកទេសកុងសូលចំនួន២លើអ្នកជំងឺវ័យ៧៣ឆ្នាំម្នាក់។ បច្ចេកវិទ្យាដ៏ទំនើប រ៉ូបូត ដា វីនស៊ី ហ្ស៊ី ទាំង២គ្រឿងនោះ អាចជួយសម្រួលដល់សល្យពេទ្យ ឬគ្រូពេទ្យឯកទេសវះកាត់ពីររូប បានសហការគ្នាវះកាត់ព្យាបាលជំងឺមហារីកក្រពេញប្រូស្តាត និងជួសជុលប្លោកនោមឡើងវិញ ជូនអ្នកជំងឺ។ ប្រព័ន្ធមនុស្សយន្ត ឬរ៉ូបូតដា វីនស៊ី ហ្ស៊ីនេះ ផលិតដោយសហរដ្ឋអាម៉េរិក ហើយវាបានផ្តល់នូវរូបភាព3D ដ៏មានគុណភាពបង្ហាញយ៉ាងច្បាស់ និងត្រូវបានអនុម័តឱ្យប្រើប្រាស់ ដោយរដ្ឋបាលចំណីអាហារ និងឱសថសហរដ្ឋអាម៉េរិក ហៅកាត់ FDA សម្រាប់ការវះកាត់ជាង១២០ប្រភេទ។
បច្ចេកទេសកង់សូល (Dual Console) អាចអនុញ្ញាតឱ្យសល្យពេទ្យពីររូប វះកាត់ នៅក្នុងពេលតែមួយបាន ដោយគ្រូពេទ្យម្នាក់ៗ ទទួលខុសត្រូវលើផ្នែកវេជ្ជសាស្ត្រផ្សេងៗគ្នា ហើយអាចផ្ទេរការគ្រប់គ្រងទៅវិញទៅមក ខណៈមានការចាំបាច់។ រ៉ូបូតដា វីនស៊ី ហ្ស៊ី ក៏អនុញ្ញាតឱ្យគ្រូពេទ្យ អាចធ្វើការងារក្នុងពេលតែមួយ សម្រាប់ការកាត់ដុំសាច់ ការគ្រប់គ្រងសរសៃឈាម ការរក្សាសរសៃប្រសាទ និងការជួសជុលសរីរាង្គឡើងវិញ ដែលអាចជួយកាត់បន្ថយ រយៈពេលនៃការវះកាត់អ្នកជំងឺ។ មន្ទីរពេទ្យតាំអាញ់ បញ្ជាក់ថា ប្រព័ន្ធរ៉ូបូត ដា វីនស៊ី ហ្ស៊ី ធ្លាប់វះកាត់ជាង២០លានករណីរួចមកហើយ នៅទូទាំងពិភពលោក៕
