រាជធានីភ្នំពេញ៖ វីដេអូឃ្លីបមួយត្រូវបានចែកចាយនៅលើបណ្តាញសង្គមហ្វេសប៊ុក ជុំវិញសកម្មភាពបុរសម្នាក់ ដែលគេស្គាល់ថា ជាមន្ត្រីសមត្ថកិច្ចប្រឆាំងបទល្មើសសេដ្ឋកិច្ចខេត្តស្វាយរៀង កំពុងអង្គុយរាប់លុយដុល្លារអាម៉េរិកទាំងបាច់ៗ ដែលត្រូវបានសង្ស័យថា ជាថ្នូរនឹងការដោះលែងរថយន្តដឹកក្រណាត់២គ្រឿង។ ពេលនេះ អ្នកនាំពាក្យរងក្រសួងមហាផ្ទៃ លោក ទូច សុឃៈ បញ្ជាក់ថា នឹងស្វែងរកការពិត ទាក់ទិននឹងបញ្ហាខាងលើនេះ...។
ថ្លែងប្រាប់អង្គភាពសារព័ត៌មាន SBM News តាមសារអេឡិចត្រូនិកតេឡេក្រាម នៅព្រឹកថ្ងៃទី០៧ ខែសីហា ឆ្នាំ២០២៦ លោក ទូច សុឃៈ អ្នកនាំពាក្យរងក្រសួងមហាផ្ទៃ គូសបញ្ជាក់យ៉ាងដូច្នេះថា នេះគឺជាព័ត៌មាន និងជាមូលដ្ឋានដែលក្រសួង អាចពិនិត្យ ស្វែងរកការពិតជាមុនសិន មុននឹងអនុវត្តវិធានការណាមួយ។ ការលើកឡើងបែបនេះ បន្ទាប់ពីមានការលេចធ្លាយវីដេអូឃ្លីប តាមបណ្ដាញសង្គមជាហូហែរ អំពីសកម្មភាព ប៉ូលិសមួយក្រុម ដឹកនាំដោយលោកវរសេនីយ៍ទោ ឈុន ឆាង នាយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តស្វាយរៀង បានឃាត់រថយន្តដឹកក្រណាត់ចំនួន២គ្រឿង ទៅរក្សាទុកនៅមុខផ្ទះរបស់ខ្លួន មិនបានឆ្លងយោបលពីថ្នាក់លើ និងបានតម្រូវឱ្យម្ចាស់រថយន្តបង់លុយចំនួន៩០០០ដុល្លារអាម៉េរិកមកឱ្យខ្លួន ទើបព្រមដោះលែងរថយន្តនោះ ឱ្យមានសេរីភាព។
យ៉ាងណា ក្រោយពីការឃាត់រថយន្ត ពលរដ្ឋជាម្ចាស់រថយន្តបានយកលុយទៅប្រគល់ឱ្យ ហើយថែមទាំងថតបាននូវសកម្មភាព នៃការរាប់លុយទាំងបាច់ៗរបស់មន្រ្តីនគរបាលប្រឆាំងបទល្មើសសេដ្ឋកិច្ច ក្នុងវីដេអូនោះថែមទៀតផង។ បុរសអង្គុយរាប់លុយនោះ អះអាងថា លុយទាំងអស់នេះយកឱ្យមេ បើហ៊ានលួចថត គឺឈប់យកហើយ។ ទោះជាយ៉ាងណាក៏ដោយ ជុំវិញករណីខាងលើ មហាជន ជាពិសេសអ្នកបើ្រប្រាស់បណ្ដាញសង្គម កំពុងរង់ចាំមើលលទ្ធផលនៃការស្រាវជ្រាវ និងវិធានការឆ្លើយតបផ្លូវការ ពីសំណាក់មន្ត្រីជំនាញក្រសួងមហាផ្ទៃ ចំពោះមន្ត្រីដែលបានប្រព្រឹត្តល្មើស លើការប្រព្រឹត្តអំពើពុករលួយដល់ឆ្អឹងបែបនេះ ខណៈសកម្មភាពខាងលើ ក៏បាននិងកំពុងបង្ហាញគំរូអាក្រក់ទៅដល់មន្ត្រីដទៃទៀត ក្នុងការចុះអនុវត្តច្បាប់ដោយគ្មានតម្លាភាព និងបំផ្លាញថវិកាជាតិ តាមរយៈការបិទបាំងបទល្មើសដោយគប់គិតគ្នា ប្រព្រឹត្តិអំពើពុករលួយ៕
