រាជធានីបាងកក៖ អតីតមេដឹកនាំរបបសឹកភូមា ឬមីយ៉ាន់ម៉ា លោក មីន អ៊ុងឡាំង (Min Aung Hlaing) ត្រូវបានគេរំពឹងថា នឹងធ្វើដំណើរទៅដល់ប្រទេសថៃ នៅថ្ងៃទី៦ ខែសីហា ឆ្នាំ២០២៦ខាងមុខ ជាដំណើរទស្សនកិច្ចលើកដំបូងបង្អស់របស់លោក ក្នុងនាមជាមេដឹកនាំស៊ីវិល ដើម្បីស្តារទំនាក់ទំនងការទូតឡើងវិញ បន្ទាប់ពីប្រទេសនេះ ត្រូវបានបាត់ចេញពីឆាកអន្តរជាតិអស់មួយរយៈពេលធំ...។

លោក មីន អ៊ុងឡាំង ដែលបានដឹកនាំរដ្ឋប្រហារយោធា កាលពីឆ្នាំ២០២១ និងបានកាន់តំណែងជាប្រធានាធិបតីភូមា កាលពីខែមេសាកន្លងទៅ ក្រោយការបោះឆ្នោតមួយដែលរងការរិះគន់ពីលោកខាងលិច ត្រូវបានមើលឃើញថា កំពុងប្រឹងប្រែងយ៉ាងខ្លាំងក្នុងយុទ្ធនាការការទូតរបស់ខ្លួន។ លោកបានផ្លាស់ប្ដូរពីឯកសណ្ឋានយោធា មកស្លៀកពាក់ស៊ីវិល និងបានធ្វើដំណើរទៅកាន់ប្រទេសឥណ្ឌា ចិន និងឡាវ នាពេលកន្លងមក។

ក្នុងអំឡុងពេលទស្សនកិច្ចនៅរាជធានីបាងកក លោក មីន អ៊ុងឡាំង នឹងត្រូវទទួលស្វាគមន៍នៅវិមានរាជរដ្ឋាភិបាលថៃ ហើយនឹងជួបពិភាក្សាការងារទ្វេភាគីជាមួយនាយករដ្ឋមន្ត្រីថៃ លោក អានុទីន ឆានវីរគុល។ ភាគីទាំងពីររំពឹងថា នឹងចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យពលកម្ម ព្រមទាំងពិភាក្សាអំពីបញ្ហាសន្តិសុខតាមព្រំដែន បទល្មើសស្កេមអនឡាញ និងការជួញដូរគ្រឿងញៀន។

ទោះជាយ៉ាងណា ដំណើរទស្សនកិច្ចនេះ បានជួបប្រទះនឹងការរិះគន់យ៉ាងខ្លាំងពីសំណាក់ក្រុមអ្នកការពារសិទ្ធិមនុស្ស និងអង្គការសង្គមស៊ីវិល ដែលអះអាងថា ថៃមិនគួរបើកផ្លូវ ឬផ្តល់ភាពស្របច្បាប់ដល់មេដឹកនាំរូបនេះឡើយ ខណៈរូបលោកកំពុងរងទណ្ឌកម្មពីលោកខាងលិច និងត្រូវបានដីកាតាមចាប់ខ្លួនពីតុលាការព្រហ្មទណ្ឌអន្តរជាតិ (ICC) ជុំវិញបទឧក្រិដ្ឋប្រឆាំងមនុស្សជាតិ៕