រដ្ឋធានីបេកាំង៖ កងទ័ពរំដោះប្រជាជនចិន (PLA) តាមរយៈបញ្ជាការដ្ឋានភូមិភាគខាងត្បូង បានប្រកាសនៅថ្ងៃទី១ ខែសីហា ឆ្នាំ២០២៦ ថា បានរៀបចំសមយុទ្ធប្រយុទ្ធរួមគ្នារវាងកងទ័ពជើងទឹក និងជើងអាកាស នៅជុំវិញតំបន់កូនកោះ Scarborough (ស្កាបូរ៉ូហ្វ) ក្នុងសមុទ្ទចិនខាងត្បូង។ 

កងទ័ពចិន បានបញ្ជាក់ថា សមយុទ្ធត្រូវបានធ្វើឡើងនៅក្នុងដែនអាកាស និងដែនទឹកជុំវិញតំបន់កូនកោះនេះ ដើម្បីឆ្លើយតបទៅនឹងសកម្មភាពរបស់ «ប្រទេសមួយចំនួន» ដែលចិនអះអាងថា កំពុងធ្វើឱ្យប៉ះពាល់ដល់សន្តិភាព និងស្ថិរភាពនៅក្នុងតំបន់។ ទោះបីជាចិន មិនបានបញ្ចេញឈ្មោះប្រទេសណាមួយចំៗក៏ដោយ ប៉ុន្តែ Scarborough គឺជាកូនកោះដែលមានជម្លោះដណ្តើមអធិបតេយ្យភាពយ៉ាងស្រួចស្រាវជាមួយប្រទេសហ្វីលីពីន។

កងទ័ពចិន បន្ថែមថា ការធ្វើសមយុទ្ធនេះ គឺជាការពង្រឹងសមត្ថភាព និងការត្រៀមខ្លួនប្រយុទ្ធការពារអធិបតេយ្យភាពដែនដី និងសិទ្ធិសមុទ្ទរបស់ខ្លួន។ ស្ថានទូតហ្វីលីពីនប្រចាំរដ្ឋធានីបេកាំង មិនទាន់បានចេញមុខឆ្លើយតបនៅឡើយទេ ជុំវិញការធ្វើសមយុទ្ធរបស់កងទ័ពចិន៕