រាជធានីបាងកក៖ ស្នងការតម្រួតនគរបាលភូមិភាគ២របស់ថៃ បានបង្ហាញលទ្ធផលនៃការស៊ើបអង្កេតស្វែងរកជនជាតិរុស្ស៊ី២នាក់បងប្អូនបាត់ខ្លួនដ៏ភ្ញាក់ផ្អើលបំផុត បន្ទាប់ពីសាកសពពួកគេ ដែលបាន​បាត់​ខ្លួនតាំង​ពី​ថ្ងៃ​ទី​២៦កក្កដា នៅ​ខេត្ត​ជលបុរី។ បងប្អូនវ័យក្មេងទាំង២នាក់នេះ ត្រូវបានឃាតកដៃឆៅសម្លាប់ រួចយកទៅកប់នៅក្នុងរណ្ដៅដីជម្រៅ១ម៉ែត្រ មើលទៅគួរឱ្យតក់ស្លុត និងអាណោចអាធ័មបំផុត...។

ជនរងគ្រោះជាបងប្អូនទាំងពីរនាក់ដែលបាត់ខ្លួន ត្រូវបានកំណត់អត្តសញ្ញាណ ដោយនារីជាបងស្រីមានឈ្មោះ ដាយអាណា ណាហ្ស៊ីម៉ូវ៉ា (Diana Nazimova) អាយុ២២ឆ្នាំ និងប្អូនប្រុសឈ្មោះ រ៉ូម៉ែន ណាហ្ស៊ីម៉ូវ៉ា (Roman Nazimova) អាយុទើបតែ១៧ឆ្នាំ​ប៉ុណ្ណោះ ត្រូវបានសាច់ញាតិរាយការណ៍អំពីការបាត់ខ្លួន ក្នុងដែនសមត្ថកិច្ចនៃប៉ុស្តិ៍នគរបាលខេត្តជលបុរី។ កាលពីថ្ងៃទី៣១កក្កដាម្សិលមិញ តម្រួតនគរបាលថៃ បានឃាត់ខ្លួនឈ្មោះ ថាណាណា (ហៅ ពុង) និងឈ្មោះ ថងឆៃ (ហៅ ថង)។ ពួកគេទាំង២នាក់ ក៏ជាជនសង្ស័យ ដែលត្រូវបានតុលាការចេញដីកាតាមចាប់ខ្លួនផងដែរ ពាក់ព័ន្ធនឹងបទលួចយានយន្តនៅពេលយប់ និងទទួលផលចោរកម្ម។ ជនសង្ស័យទាំង២នាក់ បានសារភាពថា ពួកគេពិតជាបានសម្លាប់បងប្អូនជនជាតិរុស្ស៊ីទាំង២នាក់នោះ ដើម្បីប្លន់យកម៉ូតូ។ បន្ទាប់មក ពួកគេក៏បានយកសពជនរងគ្រោះទៅកប់ចោល។

តម្រួតនគរបាលថៃ បាននាំខ្លួនឃាតកដៃឆៅទាំង២នាក់ ទៅបង្ហាញទីតាំងកប់សព ហើយបានជីករកឃើញសពបងប្អូនប្រុសស្រីជនជាតិរុស្ស៊ីទាំង២នាក់នោះ នៅក្នុងរណ្ដៅប្រាកដមែន ក្នុងជម្រៅប្រមាណ១ម៉ែត្រ។ សពស្ត្រីជាបង មានស្នាមរងការវាយប្រហារលើរាងកាយ ខណៈសពប្អូនប្រុសមានស្នាមគ្រាប់កាំភ្លើង២គ្រាប់ (ត្រង់ពោះ និងក្បាល) ដែលត្រូវគ្នានឹងចម្លើយសារភាពរបស់ឃាតក។ បច្ចុប្បន្ន សមត្ថកិច្ចបាននិងកំពុងសាកសួរឃាតកបន្ថែមទៀត មុនកសាងសំណុំរឿងបញ្ជូនទៅកាន់តុលាការផ្តន្ទាទោសតាមនីតិវិធីច្បាប់ក្នុងប្រទេសថៃ។ យ៉ាងណា រឿងរ៉ាវឃាតកម្មមួយនេះ កំពុងទាញចំណាប់អ្នកទេសចរបរទេសចម្រុះជាតិសាស្ត្រ ឱ្យមានការភ័យខ្លាចជាខ្លាំង លើការធ្វើដំណើរមកកាន់ប្រទេសថៃ ព្រោះភាពអសន្តិសុខលើជនបរទេសជាច្រើនដែលបានធ្វើដំណើរមកលេងប្រទេសថៃ ឧស្សាហ៍ជួបរឿងរ៉ាវគ្រោះថ្នាក់ជាបន្តបន្ទាប់៕