រាជធានីតូក្យូ៖ នាយករដ្ឋមន្ត្រីជប៉ុន លោកស្រី សាណាអេ តាកាអ៊ិឈី (Sanae Takaichi) បានប្រកាសនៅថ្ងៃទី២៩ ខែកក្កដា ឆ្នាំ២០២៦ នេះថា គ្រោះរញ្ជួយដីកម្លាំង៧,១រិចទ័រ ដែលបានវាយប្រហារខេត្តគូម៉ាម៉ូតូ (Kumamoto) ភាគខាងត្បូងប្រទេសជប៉ុន បានបណ្ដាលឱ្យមនុស្សយ៉ាងហោចណាស់១៣នាក់បាត់បង់ជីវិត ហើយនៅមានមនុស្សជាច្រើននាក់ទៀតរងរបួស និងបាត់ខ្លួន។

គ្រោះធម្មជាតិនេះ បានបង្កឱ្យមានការផ្ទុះហ្គាសបំផ្លាញផ្សារទំនើប Aeon និងធ្វើឱ្យបាក់រលំផ្នែកខ្លះនៃរោងចក្រផលិតក្រដាស Nippon Paper Industries ដែលបណ្ដាលឱ្យមនុស្សចំនួន៩នាក់បាត់ខ្លួន ខណៈមនុស្សប្រមាណ៧នាក់ផ្សេងទៀតបានរងរបួសធ្ងន់ធ្ងរ។ ហេតុការណ៍រញ្ជួយដីដែលកើតឡើងក្នុងជម្រៅដី១០គីឡូម៉ែត្រនេះ បានបណ្ដាលឱ្យមានអគ្គិភ័យឆាបឆេះជាច្រើនកន្លែង បាក់រលំអគារ បំផ្លាញផ្លូវថ្នល់ ស្ពានរលំខូចខាត រថភ្លើងដឹកទំនិញក្រឡាប់ និងបានធ្វើឱ្យផ្ទាំងថ្មនៃកំពែងប្រាសាទបុរាណ Kumamoto ជ្រុះបាក់ស្រុតចុះមកក្រោមផងដែរ។

បច្ចុប្បន្ន រដ្ឋាភិបាលជប៉ុនបានបញ្ជូនកងកម្លាំងស្វ័យការពារចំនួន៣៦០០នាក់ រួមទាំងយន្តហោះ២០គ្រឿង ចុះអន្តរាគមន៍ជួយសង្គ្រោះប្រជាពលរដ្ឋ និងវាយតម្លៃទំហំខូចខាតជាបន្ទាត់។ បន្ថែមពីនេះ សេវាកម្មរថភ្លើងល្បឿនលឿន ត្រូវបានផ្អាកជាបណ្តោះអាសន្ន ខណៈអាជ្ញាធរបន្តដាស់តឿនឱ្យប្រជាពលរដ្ឋមានការប្រុងប្រយ័ត្នខ្ពស់ចំពោះរញ្ជួយដីបន្ទាប់ និងហានិភ័យនៃគ្រោះអគ្គិភ័យ៕