ខេត្តស្វាយរៀង៖ កម្លាំងជំនាញនៃស្នងការដ្ឋាននគរបាលខេត្តស្វាយរៀង បានកសាងសំណុំរឿងបញ្ជូនក្រុមជនល្មើសចំនួន១៣នាក់ ទៅតុលាការ ពាក់ព័ន្ធករណីកាប់ប្លន់យកម៉ូតូពលរដ្ឋយ៉ាងសកម្មពេលរាត្រី...។
របាយការណ៍អគ្គស្នងការដ្ឋាននគរបាលជាតិ នៅថ្ងៃទី២៨ ខែកក្កដា ឆ្នាំ២០២៦ បានឱ្យដឹងថា ការបង្ក្រាបក្រុមចោរប្លន់យ៉ាងក្ដៅគគុកនេះ បានធ្វើឡើងបន្ទាប់ពីមានករណីក្រុមជនល្មើសប្រដាប់ដោយដាវ កាប់ប្រហារទៅលើជនរងគ្រោះ ដើម្បីប្លន់យកម៉ូតូ និងទ្រព្យសម្បត្តិ នៅតាមដងផ្លូវសាធារណៈក្នុងភូមិសាស្ត្រក្រុងបាវិត បង្កឱ្យមានការភ័យខ្លាចដល់ប្រជាពលរដ្ឋធ្វើដំណើរនាពេលយប់។
ភ្លាមៗ ក្រោយទទួលបានដំណឹងនេះ លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង បានចាត់កម្លាំងសមត្ថកិច្ចជំនាញ បើកការស្រាវជ្រាវ រហូតឈានដល់ការចាប់ខ្លួនក្រុមជនល្មើស និងអ្នកទទួលផលចោរកម្មចំនួន១៣នាក់ (ក្នុងនោះមានស្រីម្នាក់) ព្រមទាំងដកហូតវត្ថុតាងរួមមាន៖ ម៉ូតូ៤គ្រឿង, ដាវ១ដើម, និងកាំបិត២ដើម។ បច្ចុប្បន្ន ជនសង្ស័យខាងលើ រួមទាំងវត្ថុតាង ត្រូវបានកម្លាំងសមត្ថកិច្ចកសាងសំណុំរឿងបញ្ជូនបន្តទៅកាន់សាលាដំបូងខេត្តស្វាយរៀង ដើម្បីចាត់ការតាមនីតិវិធីច្បាប់៕
