រដ្ឋធានីព្យុងយ៉ាង៖ លោកស្រី គីម យូជុង (Kim Yo Jong) ប្អូនស្រីបង្កើតរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចេញមុខរិះគុន និងប្រើពាក្យវាយប្រហារសម្តីធ្ងន់ៗលើប្លុកសមាគមប្រជាជាតិអាស៊ីអាគ្នេយ៍ (អាស៊ាន) ចំពោះការស្វែងរកការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ ដោយលោកស្រីបានហៅជំហរនេះថា «ផ្ដេសផ្ដាស»។

ប្រតិកម្មយ៉ាងក្ដៅគគុកនេះ បានកើតឡើងបន្ទាប់ពីកិច្ចប្រជុំកំពូលអាស៊ាន និងវេទិកាតំបន់កាលពីសប្តាហ៍មុន បានសម្ដែងការព្រួយបារម្ភយ៉ាងខ្លាំងជុំវិញការអភិវឌ្ឍអាវុធនុយក្លេអ៊ែជាបន្តបន្ទាប់របស់រដ្ឋធានីព្យុងយ៉ាង ព្រមទាំងបានសង្កត់ធ្ងន់លើសារសំខាន់នៃកិច្ចសន្ទនាដើម្បីសម្រេចបាននូវសន្តិភាព និងស្ថិរភាពយូរអង្វែង តាមរយៈការលុបបំបាត់អាវុធនុយក្លេអ៊ែនៅលើឧបទ្វីបកូរ៉េ។

ក្នុងសេចក្តីថ្លែងការណ៍ដែលចេញផ្សាយដោយទីភ្នាក់ងារព័ត៌មានរដ្ឋកូរ៉េខាងជើង KCNA លោកស្រី គីម យូជុង បានសម្ដែងការមិនពេញចិត្តយ៉ាងខ្លាំងចំពោះអាកប្បកិរិយារបស់អាស៊ាន ហើយចោទប្រកាន់ថា អាស៊ានដើរតាមការអូសទាញរបស់អាម៉េរិក និងបានមើលរំលងរដ្ឋធម្មនុញ្ញរបស់កូរ៉េខាងជើង ដែលបានចារឹកថា ខ្លួនជារដ្ឋនុយក្លេអ៊ែ។ លោកស្រីបានបន្ថែមថា វាគឺជាការបរាជ័យនៃគំនិតយុទ្ធសាស្ត្រ ដែលនៅតែប្រកាសទាមទារការលុបបំបាត់នុយក្លេអ៊ែ។

ជាមួយគ្នានេះ លោកស្រីក៏បានព្រមានដល់អាស៊ានឱ្យប្រុងប្រយ័ត្ន និង «កុំបណ្តោយខ្លួនឱ្យអាម៉េរិកប្រើប្រាស់»។ គួររំលឹកផងដែរថា ចាប់តាំងពីជំនួបកំពូលរវាងលោក គីម ជុងអ៊ុន និងប្រធានាធិបតីអាម៉េរិក លោក ដូណាល់ ត្រាំ (Donald Trump) កាលពីឆ្នាំ២០១៩ ត្រូវបរាជ័យមក កូរ៉េខាងជើងបានប្រកាសម្ដងហើយម្ដងទៀតថា កម្មវិធីអាវុធនុយក្លេអ៊ែរបស់ខ្លួន គឺគ្មានថ្ងៃលុបចោលឡើយ៕