អន្តរខេត្ត៖ ក្នុងរយៈពេល៦ខែ ពោល គឺចាប់ពីខែមករាដល់មិថុនា​ ឆ្នាំ២០២៦ អង្គភាព ស៊ីម៉ាក់ បានរុករកឃើញគ្រាប់ដែលយោធាថៃបានបាញ់ និងទម្លាក់មកលើទឹកដីកម្ពុជា មានគ្រាប់បែកចង្កោមប្រភេទដូចជា M៤២ M៤៦ និងM៨៥ ប្រមាណ៦លានទៅ៧លានគ្រាប់​។នេះបើតាមការបញ្ជាក់ឱ្យដឹងពី  លោក​​ ហេង រតនា អគ្គនាយកស៊ីម៉ាក់ កាលពីថ្ងៃទី២៥កក្កដា...។

អគ្គនាយកស៊ីម៉ាក់ បានឱ្យដឹងថា ការងារ៦ខែនេះ សម្រេចលទ្ធផលគួរឱ្យកត់សម្គាល់ដូចជា ស្រាវជ្រាវព័ត៌មានតំបន់រងផលប៉ះពាល់ដោយសារសង្គ្រាមថៃឈ្លានពាននៅតាមបណ្តាខេត្តទាំង៧រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ សៀមរាប​ និងកោះកុង​ ក្នុង២២ស្រុក​ ស្មើនឹង៦០ឃុំ-សង្កាត់​ មាន៣៣៥ភូមិ។ ទីតាំងទម្លាក់គ្រាប់បែកមានចំនួន​២៦៥​ពហុកោណ​ ស្មើនឹងផ្ទៃដីរងផលប៉ះពាល់ចំនួន​ ៤៨២៩​ហិកតា និងទីតាំងគ្រាប់បែកចង្កោម​ ចំនួន៣៨៥៨​ពហុកោណ​ ស្មើនឹងផ្ទៃដីរងផលប៉ះពាល់ចំនួន​ ២៦២ ៥០៦​ហិកតា។ ​តាមការប៉ាន់ស្មានយោធាថៃ អាចបាញ់គ្រាប់បែកចង្កោមប្រភេទគ្រាប់១៥៥មម ចំនួនប្រមាណ១២០ ០០០ ទៅ១៣០ ០០០គ្រាប់​ និងមានកូនគ្រាប់បែកចង្កោមប្រភេទ M៤២ M៤៦ និងM៨៥ ប្រមាណ៦លានទៅ៧លានគ្រាប់​ ហើយអាចមានកម្រិតមិនផ្ទុះ​ ប្រមាណ២៥ទៅ៣០ភាគរយ។ 

លើសពីនេះ បានបោសម្អាតរំដោះផ្ទៃដីអាទិភាព សម្រាប់ជនភៀសសឹកវិលត្រឡប់ទៅលំនៅឋានវិញ បានចំនួន៥៩១១ខ្នង តំបន់ផ្ទៃដីសាលារៀនចំនួន៨៧ខ្នង និងមណ្ឌលសុខភាព១៥៤ហិកតា​ តំបន់មណ្ឌលសុខភាពចំនួន២០ទីតាំង វត្តអារាមមានចំនួន៦វត្ត និងហេដ្ឋានរចនាសម្ព័ន្ធផ្សេងៗចំនួន១១៤ទីតាំង។ហើយរកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទចំនួនជាង៨៤០០​គ្រាប់​។ មួយវិញទៀត ក៏បានផ្សព្វផ្សាយអប់រំយល់ដឹងពីគ្រោះថ្នាក់ដោយសារគ្រាប់មិនទាន់ផ្ទុះដល់ពលរដ្ឋ៕