ក្រុងប៉ោយប៉ែត៖ ក្រុមជនសង្ស័យប្រុសស្រី៧នាក់ ព្រមទាំងដកហូតអាវុធខ្លីចំនួន ២ដើម ត្រូវសមត្ថកិច្ចចាប់ខ្លួនពាក់ព័ន្ធនឹងការជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន ប្រព្រឹត្តនៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ...។
អគ្គស្នងការដ្ឋាននគរបាលជាតិ នៅព្រឹកថ្ងៃទី២៤ ខែកក្កដា ឆ្នាំ២០២៦ បានគូសបញ្ជាក់យ៉ាងដូច្នេះថា ការបង្ក្រាបនេះ ធ្វើឡើងបន្ទាប់ពីទទួលបានសេចក្ដីរាយការណ៍ពីភ្នាក់ងារសម្ងាត់ ថា មានករណីជួញដូរ និងប្រើប្រាស់គ្រឿងញៀនខុសច្បាប់។ ភ្លាមៗ..លោកឧត្ដមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យបានចាត់កម្លាំងការិយ៉ាល័យប្រឆាំងគ្រឿងញៀន បើកប្រតិបត្តិការចាប់ខ្លួនមនុស្សប្រុសស្រីចំនួន៧នាក់ជាបន្តបន្ទាប់។
ជាលទ្ធផល សមត្ថកិច្ចបានធ្វើការដកហូតម្សៅក្រាមសថ្លាចំនួន០១ថង់, ថ្នាំគ្រាប់ចម្រុះពណ៌(អ៊ិចស្តាស៊ី)ចំនួន០៣ថង់, ម្សៅម៉ត់ចំនួន០៧ថង់, បារីអេឡិចត្រូនិចចំនួន០៦ដើម, ក្បាលផតខេចំនួន១០គ្រាប់ ថ្នាំសប្បាយកញ្ចប់ចម្រុះពណ៌៦៩កញ្ចប់ និងកាំភ្លើងខ្លីចំនួន២ដើមផងដែរ។ បច្ចុប្បន្ន ជនសង្ស័យ រួមទាំងវត្ថុតាង ត្រូវបានកម្លាំងជំនាញប្រឆាំងគ្រឿងញៀន បាននិងកំពុងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមផ្លូវច្បាប់៕
