រាជធានីភ្នំពេញ៖ សម្តេចមធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក យ៉េ វ៉ីដុង (Ye Weidong) ប្រធានក្រុមហ៊ុន Shanghai Construction Group (SCG) ជាក្រុមហ៊ុនខ្នាតធំមួយរបស់ចិន បានជួបពិភាក្សាការងារ នៅប្រទេសចិន កាលរសៀលថ្ងៃទី១៧ ខែកក្កដា ឆ្នាំ២០២៦។ សម្តេច បានដឹកនាំគណៈប្រតិភូទៅបំពេញទស្សនកិច្ច និងចូលរួមសន្និសីទបញ្ញាសិប្បនិម្មិតពិភពលោក​នៅចិន ពីថ្ងៃទី១៥ ដល់ថ្ងៃទី១៧ ខែកក្កដា ឆ្នាំ២០២៦។

ក្នុងជំនួបជាមួយមេដឹកនាំកម្ពុជា លោក យ៉េ វ៉ីដុង លើកឡើងថា ក្រុមហ៊ុនលោក បានបោះទុនវិនិយោគនៅកម្ពុជា ចាប់តាំងពីឆ្នាំ២០០៤មក ដោយបានចូលរួមអនុវត្តគម្រោងស្ថាបនាហេដ្ឋារចនាសម្ព័ន្ធសំខាន់ៗជាច្រើន ដូចជា ផ្លូវថ្នល់ ទំនប់វារីអគ្គិសនី និងស្ពានធំៗ ជាដើម។ លោក បន្តថា បច្ចុប្បន្ន ក្រុមហ៊ុនកំពុងប្រតិបត្តិការលើគម្រោងកសាងផ្លូវជាតិចំនួន២ខ្សែបន្ថែមទៀតនៅកម្ពុជា។ លោក បង្ហាញបំណងក្រុមហ៊ុនថា នឹងពង្រីកការវិនិយោគរបស់ខ្លួនលើការ​អភិវឌ្ឍ​ហេដ្ឋារចនាសម្ព័ន្ធ​នៅកម្ពុជាបន្ថែមទៀត។

សម្តេចនាយករដ្ឋមន្រ្តី ឆ្លើយតបថា ហេដ្ឋារចនាសម្ព័ន្ធ គឺជាវិស័យអាទិភាពដែលរាជរដ្ឋាភិបាលកម្ពុជាតែងតែយកចិត្តទុកដាក់ និងផ្តល់អាទិភាពខ្ពស់។ សម្តេច បានបញ្ជាក់អំពីការគាំទ្ររបស់រាជរដ្ឋាភិបាល ដល់ប្រតិបត្តិការអាជីវកម្ម និងការអនុវត្តគម្រោងនានារបស់ក្រុមហ៊ុននៅកម្ពុជា។ ជាមួយគ្នា ប្រមុខរាជរដ្ឋាភិបាលកម្ពុជា ស្នើឱ្យក្រុមហ៊ុនយកចិត្តទុកដាក់ក្នុងការចូលរួមបណ្តុះបណ្តាលធនធានមនុស្សលើការកសាងហេដ្ឋារចនាសម្ព័ន្ធ ក៏ដូចជាជំនាញវិស្វកម្ម​ដល់ពលរដ្ឋកម្ពុជា។ បន្ថែមពីនេះ មេដឹកនាំកម្ពុជា លើកទឹកចិត្តឱ្យក្រុមហ៊ុនបន្តផ្សារភ្ជាប់កិច្ចសហការ​ឱ្យកាន់តែជិតស្និទ្ធជាមួយក្រសួងស្ថាប័នពាក់ព័ន្ធនៅកម្ពុជា ដើម្បីជំរុញភាពជោគជ័យរបស់ក្រុមហ៊ុនថែមទៀត៕