រដ្ឋធានីហាណូយ៖ នគរបាលវៀតណាម បានចាប់ខ្លួននាយកប្រតិបត្តិចំនួន៣នាក់នៃរោងពុម្ពមួយ ដែលបានចេញផ្សាយសៀវភៅស្តីពី លោក ហូ ជី មិញ (Ho Chi Minh) ដែលជាស្ថាបនិកបក្សកុម្មុយនីស្ដរបស់ប្រទេសនេះ...។
អ្នកនិពន្ធសៀវភៅ «Stories with Thanh - A New Account of Light» គឺលោក ង្វៀន ថាញ់ណាំ (Nguyen Thanh Nam) អតីតនាយកប្រតិបត្តិទូរគមនាគមន៍ ត្រូវបានចាប់ខ្លួនពីបទប្រឆាំងរដ្ឋ កាលពីដើមខែកក្កដា រួមជាមួយអ្នកមានឥទ្ធិពលលើបណ្តាញសង្គមម្នាក់ ដែលបានជួយផ្សព្វផ្សាយសៀវភៅនេះនៅលើបណ្តាញសង្គមរបស់ខ្លួន។ សៀវភៅនេះ បានរៀបរាប់អំពីជីវិតជាច្រើនឆ្នាំរបស់លោក ហូ ជីមិញ នៅឯបរទេស ដើម្បីស្វែងរកវិធីសាស្ដ្រក្នុងការដុតបញ្ឆេះចលនារំដោះជាតិនៅក្នុងប្រទេសកំណើត។ នគរបាលវៀតណាមអះអាងថា ពួកគេបានចាប់ខ្លួននាយក, និពន្ធនាយក, និងប្រធានក្រុមប្រឹក្សាភិបាលនៃរោងពុម្ពសមាគមអ្នកនិពន្ធវៀតណាម (Vietnam Writers' Association Publishing House) ដែលបានបោះពុម្ពផ្សាយសៀវភៅនេះ កាលពីខែឧសភាកន្លងទៅ។ ពួកគេប្រឈមមុខនឹងការចោទប្រកាន់ពីបទ «ផលិត រក្សាទុក ចែកចាយ ឬផ្សព្វផ្សាយព័ត៌មាន ឯកសារ ឬវត្ថុបំណងប្រឆាំងនឹងសាធារណរដ្ឋសង្គមនិយមវៀតណាម» នេះបើយោងតាមសេចក្តីថ្លែងការណ៍របស់នគរបាល។
សេចក្តីថ្លែងការណ៍បានបញ្ជាក់ថា៖«អ្នកទាំង៣ បានចូលរួមក្នុងការកែសម្រួល កែប្រែ បោះពុម្ពផ្សាយ និងផ្សព្វផ្សាយសៀវភៅ..ដែលបំភ្លៃប្រវត្តិសាស្ត្រនៃបដិវត្តន៍ គោលនយោបាយ និងគោលការណ៍ណែនាំរបស់បក្ស និងរដ្ឋ»។ ក្រសួងវប្បធម៌វៀតណាមបានប្រកាសថា ខ្លួនបានដាក់ទណ្ឌកម្មលើស្ថាប័នសារព័ត៌មានចំនួន២៣ ដែលបានចុះផ្សាយអត្ថបទសរសើរសៀវភៅនេះ។ ក្រសួងដដែលកត់សម្គាល់ថា៖«ទីភ្នាក់ងារសារព័ត៌មានទាំងនេះ បានទទួលស្គាល់កំហុសរបស់ពួកគេ និងបានយល់ដឹងយ៉ាងស៊ីជម្រៅអំពីមេរៀននៃការផ្ទៀងផ្ទាត់ប្រភពព័ត៌មាន»។ ស្ថាប័នប្រព័ន្ធផ្សព្វផ្សាយទាំងនោះ បានបង់ប្រាក់ពិន័យជិត២៥០០ដុល្លារអាម៉េរិក ខណៈបុគ្គលិកជាងដប់នាក់ ដែលពាក់ព័ន្ធនឹងការបោះពុម្ពផ្សាយអត្ថបទទាំងនោះ ត្រូវបានផ្ទេរភារកិច្ច ព្យួរការងារ ឬបញ្ឈប់ពីការងារ។
នៅក្នុងសុន្ទរកថា ដែលបានចាក់ផ្សាយតាមទូរទស្សន៍ជាតិ លោក ណាំ បានចេញមុខសារភាពថា៖«ខ្ញុំទទួលស្គាល់ថាមានកំហុស ផ្នែកអង្គហេតុ និងការអះអាងមិនពិត ដែលផ្ទុយនឹងគោលការណ៍ណែនាំ និងគោលនយោបាយរបស់បក្ស និងរដ្ឋ ដែលធ្វើឱ្យប៉ះពាល់ដល់រូបភាពរបស់ប្រធាន ហូ ជីមិញ និងបង្កឱ្យមានការភាន់ច្រឡំក្នុងចំណោមសាធារណជន»។ គួរបញ្ជាក់ថា មេដឹកនាំបក្សកុម្មុយនីស្ដវៀតណាម តែងតែចាប់អ្នករិះគន់ដាក់គុក ដោយក្នុងនោះមានអ្នករិះគន់ជាង១៦០នាក់ កំពុងស្ថិតនៅក្នុងមន្ទីរឃុំឃាំងនាពេលបច្ចុប្បន្ន។ នេះបើយោងតាមអង្គការសិទ្ធិមនុស្ស Human Rights Watch៕
