រដ្ឋធានីព្យុងយ៉ាង៖ ទីភ្នាក់ងារសារព័ត៌មានមជ្ឈិមកូរ៉េ (KCNA) របស់រដ្ឋភិបាលកូរ៉េខាងជើង បានរាយការណ៍ថា មន្ត្រីជាន់ខ្ពស់លំដាប់ទី៤ របស់ប្រទេសចិន លោក វ៉ាង ហ៊ូនីង (Wang Huning) បានដឹកនាំគណៈប្រតិភូបើកកិច្ចពិភាក្សាផ្លូវការជាមួយមន្ត្រីកំពូលនៃបក្សពលករកូរ៉េខាងជើង លោក ចូ យ៉ុងវ៉ុន (Jo Yong Won) នៅក្នុងរាជធានីព្យុងយ៉ាង។ ជំនួបនេះ គឺជាផ្នែកមួយនៃកិច្ចប្រឹងប្រែងរបស់រដ្ឋធានីប៉េកាំង ក្នុងការបន្តពង្រឹងឥទ្ធិពលរបស់ខ្លួនទៅលើប្រទេសសម្ព័ន្ធមិត្តចំណាស់មួយនេះ ស្របពេលដែលកូរ៉េខាងជើង កំពុងងាកទៅបង្កើតទំនាក់ទំនងយោធា និងសេដ្ឋកិច្ចកាន់តែស៊ីជម្រៅជាមួយប្រទេសរុស្ស៊ី។

នៅក្នុងជំនួបនោះ លោក វ៉ាង ហ៊ូនីង បានបញ្ជាក់ជាថ្មីពីបំណងប្រាថ្នារបស់បក្ស និងរដ្ឋាភិបាលចិន ក្នុងការអនុវត្តឱ្យបានហ្មត់ចត់នូវកិច្ចព្រមព្រៀង ដែលលោកប្រធានាធិបតីចិន ស៊ី ជិនពីង និងមេដឹកនាំកូរ៉េខាងជើង លោក គីម ជុងអ៊ុន បានព្រមព្រៀងគ្នា កាលពីខែមិថុនាកន្លងទៅ។ កិច្ចព្រមព្រៀងនោះ រួមមាន ការប្តេជ្ញាចិត្តពង្រីកកិច្ចសហប្រតិបត្តិការលើផ្នែកនយោបាយ សេដ្ឋកិច្ច វប្បធម៌ និងការប្រាស្រ័យទាក់ទងជាយុទ្ធសាស្ត្រ។ ជាមួយគ្នា ភាគីកូរ៉េខាងជើង ក៏បានឆ្លើយតបវិញដោយបង្ហាញជំហរគាំទ្រពេញទំហឹងចំពោះ «គោលការណ៍ចិនតែមួយ» របស់រដ្ឋធានីប៉េកាំង ពាក់ព័ន្ធនឹងអធិបតេយ្យភាពលើកោះតៃវ៉ាន់ផងដែរ។

ក្រុមអ្នកជំនាញភូមិសាស្ត្រនយោបាយ បានលើកឡើងថា សកម្មភាពការទូតដ៏មមាញឹកនាពេលនេះ បង្ហាញពីផលប្រយោជន៍រួមដ៏ធំធេងរបស់ប្រទេសទាំងពីរ។ កូរ៉េខាងជើងត្រូវការបង្អែកសេដ្ឋកិច្ច និងនយោបាយដ៏រឹងមាំពីចិន ខណៈដែលចិនផ្ទាល់ ក៏មិនចង់បាត់បង់ឥទ្ធិពលគ្រប់គ្រង និងការនាំមុខរបស់ខ្លួននៅលើឧបទ្វីបកូរ៉េ និងតំបន់អាស៊ីបូព៌ាឡើយ ជាពិសេសគឺចំពេលដែលសន្ធិសញ្ញាមិត្តភាព កិច្ចសហប្រតិបត្តិការ និងការជួយគ្នាទៅវិញទៅមកឆ្នាំ១៩៦១ (ដែលជាសន្ធិសញ្ញាការពារជាតិរួមគ្នាតែមួយគត់របស់ចិន នៅមានសុពលភាព) បានឈានចូលដល់ខួបលើកទី៦៥ ផងដែរ៕