រដ្ឋធានីតេហេរ៉ង់៖ លោក ម៉ូចតាបា ខាមេណី (Mojtaba Khamenei) ជាមេដឹកនាំកំពូលអ៊ីរ៉ង់បច្ចុប្បន្ន បានប្រកាសនៅថ្ងៃទី១១កក្កដា ពីការប្ដេជ្ញាចិត្តយ៉ាងខ្លាំងក្លាក្នុងការសងសឹកដាច់ខាតចំពោះសម្ព័ន្ធមិត្តអាម៉េរិក-អ៊ីស្រាអែល ដែលរួមគ្នាបើកការវាយប្រហារសម្លាប់ឪពុកខ្លួន គឺលោក អាយ៉ាតុលា អាលី ខាមេណី (Ayatollah Ali Khamenei) ជាអតីតមេដឹកនាំកំពូលអ៊ីរ៉ង់។ ការប្រកាសសារដ៏ក្ដៅគគុកនេះ បានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីអាម៉េរិក លោក ដូណាល់ ត្រាំ បានគំរាមកម្ទេចប្រទេសអ៊ីរ៉ង់ឱ្យរលាយសូន្យ ប្រសិនបើហ៊ានប៉ុនប៉ងធ្វើឃាតរូបលោក។

តាមរយៈសារលិខិតផ្លូវការលើកដំបូងបង្អស់ចាប់តាំងពីពិធីបុណ្យសពរបស់ឪពុកខ្លួន លោក ម៉ូចតាបា ខាមេណី បានសង្កត់ធ្ងន់ថា៖«ការសងសឹក គឺជាឆន្ទៈរបស់ប្រជាជាតិយើង ហើយវាមិនអាចជៀសរួចឡើយ។ វាមិនអាស្រ័យលើរូបខ្ញុំ ឬមន្ត្រីណាផ្សេងទៀតនោះទេ ទោះបីជាយើងមានវត្តមាន ឬអត់ ក៏ការសងសឹកនេះត្រូវតែវាយបកទៅវិញដែរ»។ លោកបានបន្ថែមថា អ៊ីរ៉ង់បានរៀបចំបញ្ជីឈ្មោះបុគ្គលគោលដៅសម្រាប់ការសងសឹកនេះរួចរាល់ហើយ។

ចំណែក លោក ដូណាល់ ត្រាំ បានបង្ហោះសារព្រមានយ៉ាងសាហាវនៅលើបណ្តាញសង្គម Truth Social ថា៖«មីស៊ីលចំនួន១ពាន់គ្រាប់កំពុងតម្រង់ចំគោលដៅ និងត្រៀមលក្ខណៈបាញ់ស្រោចទៅកាន់សាធារណរដ្ឋអ៊ិស្លាមអ៊ីរ៉ង់ ប្រសិនបើរដ្ឋាភិបាលអ៊ីរ៉ង់ហ៊ានធ្វើសកម្មភាពគំរាមកំហែង ឬប៉ុនប៉ងធ្វើឃាតប្រធានាធិបតីអាម៉េរិក ដែលនៅក្នុងករណីនេះ គឺរូបខ្ញុំ! បញ្ជាត្រូវបានដាក់ចេញរួចរាល់ហើយ កងទ័ពអាម៉េរិកមានសមត្ថភាពគ្រប់គ្រាន់ក្នុងការបំផ្លិចបំផ្លាញ និងកម្ទេចរាល់គ្រប់តំបន់ទាំងអស់របស់អ៊ីរ៉ង់ឱ្យម៉ត់»។

ស្ថានភាពនៅមជ្ឈិមបូព៌ា កំពុងឡើងកម្តៅខ្លាំង ក្រោយលោក ត្រាំ ប្រកាសហែកចោលកិច្ចព្រមព្រៀងឈប់បាញ់ក្ដី ប៉ុន្តែក្រុមអ្នកសម្របសម្រួលអន្តរជាតិកំពុងប្រឹងប្រែងស្រោចស្រង់កិច្ចចរចាការទូតឡើងវិញ។ ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា ប្រតិភូមកពីប្រទេសកាតាបានធ្វើដំណើរទៅដល់រដ្ឋធានីតេហេរ៉ង់ហើយ ដើម្បីដើរតួជាស្ពានចរចា ខណៈរដ្ឋមន្ត្រីការបរទេសអ៊ីរ៉ង់ លោក អាបាស អារ៉ាកឈី (Abbas Araghchi) បានទទូចថា រដ្ឋធានីតេហេរ៉ង់បានគោរពតាមកិច្ចព្រមព្រៀងកន្លងមកយ៉ាងខ្ជាប់ខ្ជួន ហើយការចរចានឹងជោគជ័យទៅបាន លុះត្រាតែមានការអនុវត្តប្រកបដោយការគោរពគ្នាទៅវិញទៅមកទាំងសងខាង៕