រដ្ឋធានីអង់ការ៉ា៖ សហរដ្ឋអាម៉េរិក នឹងបន្តលក់អាវុធយោធាទៅឱ្យប្រទេសតួកគី ដែលជាមហាអំណាចយោធាធំមួយរបស់អង្គការណាតូ (NATO)។ ប្រធានាធិបតីអាម៉េរិក លោក ដូណាល់ ត្រាំ បានថ្លែងថា វិធានការទណ្ឌកម្មដែលបានដាក់លើរដ្ឋធានីអង់ការ៉ា កាលពី៧ឆ្នាំមុន ជុំវិញការបញ្ជាទិញប្រព័ន្ធការពារអាកាសពីរុស្ស៊ី នឹងត្រូវលុបចោលក្នុងពេលឆាប់ៗខាងមុខនេះ។

លោក ត្រាំ បានប្រាប់ក្រុមអ្នកកាសែតនៅក្នុងកិច្ចប្រជុំកំពូលណាតូ នៅរដ្ឋធានីអង់ការ៉ា ប្រទេសតួកគី ថា៖«យើងមិនចង់ដាក់ទណ្ឌកម្មលើមិត្តភក្តិនោះទេ»។ លោក បានលើកឡើងថា លោកនឹងសម្រេចចិត្តចុងក្រោយក្នុងពេលឆាប់ៗនេះ លើការស្តារការចូលរួមរបស់តួកគីឡើងវិញ នៅក្នុងកម្មវិធីរួមគ្នាផលិតយន្តហោះចម្បាំង។ តួកគីនឹងផ្ទេរប្រព័ន្ធការពារដែនអាកាស S-400 របស់រុស្ស៊ីទៅឱ្យប្រទេសទី៣ ជាថ្នូរនឹងការទទួលបានយន្តហោះចម្បាំងបំបាំងកាយ F-35 របស់អាម៉េរិកវិញ។ គួររំលឹកថា តួកគីត្រូវបានបណ្តេញចេញពីកម្មវិធី F-35 (ដែលកាលនោះ តួកគីក៏ជាអ្នកផលិតគ្រឿងបន្លាស់មួយចំនួនផងដែរ នៅឆ្នាំ២០១៩) ដោយសារក្ដីបារម្ភរបស់អាម៉េរិកថា សមត្ថភាពបំបាំងកាយដ៏ទំនើបរបស់យន្តហោះចម្បាំងនេះ អាចនឹងត្រូវលេចធ្លាយ៕