រដ្ឋធានីអង់ការ៉ា៖ អាម៉េរិក និងអេស្ប៉ាញ់ ចាប់ផ្តើមមានប្រវត្តិជម្លោះដ៏ជូរចត់ជាមួយគ្នាមែនទែនហើយ ជាពិសេសពាក់ព័ន្ធនឹងពាណិជ្ជកម្ម។ ប្រធានាធិបតី​អាមេរិក លោក ដូណាល់ ត្រាំ (Donald Trump) បាន​បញ្ជាឱ្យ​រដ្ឋមន្ត្រី​ក្រសួងរតនាគារ លោក ស្កត់ បេសិន (Scott Bessent) កាត់​ផ្តាច់​ទំនាក់ទំនងពាណិជ្ជកម្ម​ទាំងអស់ជាមួយ​អេស្ប៉ាញ ដោយ​ហៅ​ប្រទេសនេះ ថាជាដៃគូ​ដ៏​គ្រោះថ្នាក់ក្នុង​អង្គការណាតូ។ 

ការប្រកាសរបស់លោក ត្រាំ អំពីការសម្រេចចិត្តផ្តាច់ទំនាក់ទំនងពាណិជ្ជកម្មជាមួយអេស្ប៉ាញទាំងស្រុងដោយគ្មានស្ទាក់ស្ទើរនេះ ធ្វើឡើងក្នុងកិច្ចប្រជុំកំពូលអង្គការណាតូ នៅថ្ងៃទី៨ ខែកក្កដា ឆ្នាំ២០២៦ ក្នុងរដ្ឋធានីអង់ការ៉ា ប្រទេសតួកគី។ លោក ផេត្រូ សាន់ឆេស៍ (Pedro Sanchez) នាយករដ្ឋមន្រ្តីអេស្ប៉ាញ់ ក៏ចូលរួមដែរ។ អាម៉៉េរិក និងអេស្ប៉ាញ សុទ្ធតែជាសមាជិកអង្គការណាតូ តែមួយរយៈចុងក្រោយនេះ ចេះតែប៉ះទង្គិចគ្នាជុំវិញរឿងសង្គ្រាមនៅអ៊ីរ៉ង់។ 

ថ្វីដ្បិតលោក ត្រាំ មិនបញ្ជាក់មូលហេតុលម្អិត តែគេអាចដឹងបានថា ប្រហែលជាលោកខឹងអេស្ប៉ាញខ្លាំង ដែលមិនផ្តល់មូលដ្ឋានឱ្យកងទ័ពអាម៉េរិកឈរជើងក្នុងការធ្វើសង្គ្រាមប្រឆាំងនឹងអ៊ីរ៉ង់។ កាលពីខែមីនាកន្លងទៅ អេស្ប៉ាញ ប្រកាសជំហរយ៉ាងដាច់ណាត់ដោយគ្មានការក្រែងចិត្តថា អាម៉េរិក មិនអាចដាក់មូលដ្ឋានទ័ពក្នុងទឹកដីអេស្ប៉ាញបានឡើយ។ លើសពីនេះ អេស្ប៉ាញ ថែមទាំងមិនអនុញ្ញាតឱ្យកងទ័ពអាម៉េរិកបើកយន្តហោះចូលទៅខាងក្នុង ឬឆ្លងកាត់ដែនអាកាសអេស្ប៉ាញថែមទៀត បើសិនជាយន្តហោះនោះ ស្ថិតក្នុងប្រតិបត្តិការសឹកសង្គ្រាមជាមួយអ៊ីរ៉ង់៕