ក្រុងបាវិត៖ មានការភ្ញាក់ផ្អើលមួយ នៅព្រឹកព្រលឹមថ្ងៃទី០៨ ខែកក្កដា ឆ្នាំ២០២៦នេះ បន្ទាប់ពីម្ចាស់អាជីវកម្មដេប៉ូមួយកន្លែង យីហោ «សំ ហាក់» ស្ថិតក្នុងភូមិសាស្ត្រក្រុងបាវិត ខេត្តស្វាយរៀង ត្រូវបានក្រុមជនសង្ស័យប្លន់សម្លាប់យ៉ាងព្រៃផ្សៃបំផុត នៅក្នុងទីតាំងរបស់ខ្លួន...។
ប្រជាពលរដ្ឋរស់នៅជិតទីតាំងកើតហេតុខាងលើ បានឱ្យដឹងថា កាលពីយប់ថ្ងៃទី០៧ ខែកក្កដាម្សិលមិញ ពួកគាត់បានឮសូរសំឡេងបាញ់ចំនួន០២គ្រាប់ ចេញពីហាងខាងលើ ហើយក៏ស្ងាត់ទៅ ស្រាប់តែព្រឹកឡើងទើបដឹងថា ជាករណីប្លន់សម្លាប់ម្ចាស់ដេប៉ូនោះ។ ទោះយ៉ាងណា បន្ទាប់ពីកើតហេតុរួច កម្លាំងសមត្ថកិច្ចជំនាញនៃស្នងការដ្ឋាននគរបាលខេត្ត បានចុះមកកាន់ទីតាំងកើតហេតុ ដើម្បីធ្វើការស្រាវជ្រាវស្វែងរកជនល្មើសទាំងនោះ មកកផ្តន្ទាទោសតាមច្បាប់។ ទាក់ទិនករណីខាងលើ អង្គភាពសារព័ត៌មាន SBM News បានព្យាយាមសុំការបំភ្លឺបន្ថែមពីលោក សំ សំអុល អធិការនៃអធិការដ្ឋាននគរបាលក្រុងបាវិត នៅព្រឹកថ្ងៃដដែលនេះដែរ ប៉ុន្តែមិនមានការឆ្លើយតបឡើយ គិតត្រឹមម៉ោងផ្សាយនេះ៕
