ក្រុងព្រៃវែង៖ ស្របពេលដែលវិវាទជុំវិញសកម្មភាពបូមខ្សាច់របស់ក្រុមហ៊ុន ចតុមុខ នៅបន្តឡើងកម្តៅ បន្ទាប់ពីមានការប៉ះទង្គិចគ្នាយ៉ាងខ្លាំងក្លា រវាងប្រជាពលរដ្ឋមូលដ្ឋាន និងភាគីក្រុមហ៊ុន ពេលនេះ មន្រ្តីក្រសួងរ៉ែ និងថាមពល ចេញមុខអះអាងថា ក្រុមហ៊ុនដំណើរការដោយមានអាជ្ញាបណ្ណស្របច្បាប់ តាំងពីឆ្នាំ២០២០ មកម្ល៉េះ ខណៈការប្រើប្រាស់អំពើហិង្សារបស់ពលរដ្ឋ គឺជាទង្វើល្មើសច្បាប់...។
ថ្លែងក្នុងសន្និសីទកាសែតមួយ កាលពីថ្ងៃម្សិលមិញ លោក អ៊ឹង អៀង រដ្ឋលេខាធិការក្រសួងរ៉ែ និងថាមពល បានឱ្យដឹងថា ទីតាំងក្រុមហ៊ុន ចតុមុខ បានអនុវត្តស្របតាមបទដ្ឋានគតិយុត្ត ពិសេសអនុវត្តអនុលោមភាពទៅតាមអាជ្ញាបណ្ណ ដែលក្រសួងបានចេញជូន ហើយនេះមិនមែនជាទីតាំងថ្មីទេ ពោលគឺជាទីតាំងចាស់ ដែលបានអនុវត្តចូល៤ទៅ៥ឆ្នាំហើយ។ ជាមួយគ្នា លោក អ៊ឹង អៀង បានសង្កត់ធ្ងន់ថា ពាក់ព័ន្ធជាមួយព្រឹត្តិការណ៍ដែលបងប្អូនប្រជាពលរដ្ឋ បានប្រើអំពើហិង្សាទៅលើសាឡង់ក្រុមហ៊ុន ដែលជាអ្នកអនុវត្តប្រតិបត្តិការធនធានរ៉ែរបស់ខ្លួន វាជាអំពើមួយដែលពិបាកទទួលយកបាន តាមក្របខ័ណ្ឌច្បាប់។
បន្ថែមលើនេះ លោក អ៊ឹង ឌីប៉ូឡា អ្នកនាំពាក្យក្រសួងរ៉ែ និងថាមពល ក៏បានដឹកនាំក្រុមការងារចុះទៅពិនិត្យផ្ទាល់ជាមួយអាជ្ញាធរដែនដី រកឃើញទីតាំងបូមខ្សាច់ ស្ថិតនៅក្នុងខេត្តកណ្តាល មិនមែននៅខេត្តព្រៃវែងទេ ហើយក៏គ្មានការបាក់ច្រាំងទន្លេ ដូចការលើកឡើងរបស់ប្រជាពលរដ្ឋ និងប្រជានេសាទរស់នៅភូមិថ្មី នៃខេត្តព្រៃវែងនោះដែរ។ សូមជម្រាបថា កាលពីថ្ងៃទី២កក្កដា មានប្រជាពលរដ្ឋជាច្រើននាក់ លើកគ្នាជិះទូកទៅឡោមព័ទ្ធ និងធ្វើការតវ៉ាជាមួយក្រុមហ៊ុនបូមខ្សាច់មួយឈ្មោះ «ចតុមុខ» រហូតឈានដល់ការយកដុំថ្មគប់ទៅលើសាឡង់ដែលកំពុងបូមនោះ ក៏ព្រោះតែក្រុមឈ្មួញសម្រុកបូមខ្សាច់ទាំងយប់ទាំងថ្ងៃ នៅក្បែរច្រាំងក្នុងតំបន់ដែលពួកគាត់រស់នៅ ធ្វើឱ្យដីច្រាំងទន្លេក្រោយផ្ទះប្រជាពលរដ្ឋបាក់ស្រុតជារឿយៗ ទើបបង្កជាក្ដីបារម្ភ និងស្នើឱ្យបញ្ឈប់ការបូមខ្សាច់នៅក្បែរច្រាំងទន្លេបន្តទៅទៀត។ ប៉ុន្តែខាងភាគីក្រុមហ៊ុន មិនព្រមបញ្ឈប់ ទើបជម្លោះពាក្យសម្តី បានផ្ទុះឡើងរហូតដល់មានការគប់ដុំថ្មដាក់សាឡង់ តែមិនចំមនុស្សឡើយ៕
