ខេត្តស្ទឹងត្រែង៖ កម្លាំងកងរាជអាវុធហត្ថ ចាប់បុរសជាអ្នកនេសាទម្នាក់ ក្រោយលួចគ្រឿងញៀន៣គីឡូក្រាម ក្នុងចំណោមគ្រឿងញៀនជាង៤០គីឡូក្រាម ពីទូកជនល្មើស ដែលត្រូវកងកម្លាំងដេញបង្រ្កាបនាពេលថ្មីៗនេះ នៅលើដងទន្លេមេគង្គ ស្ថិតក្នុងភូមិសាស្ត្រស្រុកបុរីអូរស្វាយសែនជ័យ ខេត្តស្ទឹងត្រែង។ នេះបើតាមរបាយការណ៍ពីមន្រ្តីជំនាញ នៅថ្ងៃទី៤ ខែកក្កដា ឆ្នាំ២០២៦។
កាលពីពេលកន្លងទៅ មន្ត្រីបរិស្ថានអភិរក្សតំបន់រ៉ាមសារ សហការជាមួយកម្លាំងកងរាជអាវុធហត្ថ បានចុះល្បាតតាមដងទន្លេមេគង្គលើ ហើយក៏ប្រទះឃើញទូកមួយគ្រឿងបើកក្នុងល្បឿនលឿន។ ពេលនោះ មន្រ្តីជំនាញ ក៏បានសហការគ្នាដេញតាម ដោយសង្ស័យជាករណីលួចឆក់ត្រី។ ជនសង្ស័យ ប្រឹងបើកទូករត់ដោយមិនព្រមឈប់នោះទេ រហូតទាល់តែទៅបុកទូកអ្នកនេសាទបណ្ដាលឱ្យលិច ហើយក៏រត់គេចខ្លួនបាត់ស្រមោលតែម្ដង បន្សល់ទុកគ្រឿងញៀនជាង៣៧គីឡូក្រាម (តាមពិត គ្រឿងញៀនទាំងអស់ ជាង៤០គីឡូក្រាម តែត្រូវអ្នកនេសាទលួចអស់៣គីឡូក្រាម)។
ក្រោយចប់ប្រតិបត្តិការ សមត្ថកិច្ចជំនាញ បានដាក់ការសង្ស័យថា វត្ថុតាងអាចនឹងមានការប៉ះពាល់ ឬបាត់បង់ដោយសារមានមនុស្សចូលទៅជិត។ បន្ទាប់មក សមត្ថកិច្ច ក៏សម្រេចបើកការស៊ើបអង្កេតសាជាថ្មី ស្រាប់តែធ្លាយតម្រុយថា ជនសង្ស័យ ឈ្មោះ ឡេង ណាត ជាអ្នកនេសាទបានលួចយកគ្រឿងញៀនមួយចំនួនប្រមាណ៣គីឡូក្រាមចេញពីទូកនោះ។ បច្ចុប្បន្ន គ្រឿងញៀនសរុបជាង៤០គីឡូក្រាម ត្រូវបានរក្សាទុកជាបណ្តោះអាសន្ន។ រីឯជនល្មើសដែលលួចគ្រឿងញៀន ត្រូវកម្លាំងកងរាជអាវុធហត្ថខេត្តស្ទឹងត្រែង កសាងសំណុំរឿងចាត់ការតាមផ្លូវច្បាប់ និងបន្តស្វែងរកមេខ្លោងជួញដូរគ្រឿងញៀនជាង៤០គីឡូក្រាមនេះ៕
