ខេត្តសៀមរាប៖ ស្របពេលរដូវកាលបៃតង (Green Season) កំពុងចាប់ផ្តើមក្រសួងទេសចរណ៍ ណែនាំភ្ញៀវទេសចរឱ្យទៅទស្សនា«ស្រះដំរី»ដែលជារមណីយដ្ឋានប្រវត្តិសាស្ត្រ និងធម្មជាតិដ៏លាក់កំបាំង ស្ថិតនៅកណ្តាលព្រៃជ្រៅនៃភ្នំគូលែន ខេត្តសៀមរាប...។
នៅថ្ងៃទី៤ ខែកក្កដា ឆ្នាំ២០២៦ ក្រសួងទេសចរណ៍ បង្ហោះរូបភាពភ្ជាប់ជាមួយសំណេរពិពណ៌នាថា ក្រៅពីតំបន់ទេសចរណ៍ល្បីៗ ដូចជា ទឹកធ្លាក់ភ្នំគូលែន ព្រះអង្គធំ និងស្ទឹងលិង្គមួយពាន់ «ស្រះដំរី» ក៏ជាទីតាំងដ៏មានតម្លៃសម្រាប់អ្នកស្រឡាញ់ការផ្សងព្រេង និងស្វែងយល់ពីបេតិកភណ្ឌវប្បធម៌ខ្មែរ។ អ្វីដែលធ្វើឱ្យស្រះដំរីមានភាពលេចធ្លោ គឺរូបចម្លាក់ដំរីថ្មភក់ដ៏ធំ ដែលមានកម្ពស់ជិត៣ម៉ែត្រ និងប្រវែងជិត៤ម៉ែត្រ។ រូបចម្លាក់នេះត្រូវបានឆ្លាក់ចេញពីផ្ទាំងថ្មភក់ធម្មជាតិដែលដុះចេញពីដីនៅទីតាំងផ្ទាល់ ដោយបង្ហាញពីស្នាដៃវិស្វកម្ម និងសិល្បៈដ៏ប៉ិនប្រសប់របស់បុព្វបុរសខ្មែរ។ រូបដំរីដែលបែរមុខទៅទិសខាងលិច ឆ្ពោះទៅកាន់ទីក្រុងអង្គរ ត្រូវបានគេចាត់ទុកថា ជានិមិត្តរូបនៃការការពារទឹកដីដ៏ពិសិដ្ឋ។
ក្រៅតែពីរូបដំរីនោះ នៅជុំវិញទីតាំងក៏មានចម្លាក់ថ្មសត្វផ្សេងៗទៀត រួមមាន សត្វតោ សត្វខ្លា និងសត្វគោ ដែលសុទ្ធសឹងតែឆ្លាក់ចេញពីផ្ទាំងថ្មភ្នំដូចគ្នា។ ជាមួយសភាពព្រៃឈើដ៏ស្រស់បំព្រង អាកាសធាតុបរិសុទ្ធ និងបេតិកភណ្ឌប្រវត្តិសាស្ត្រដ៏កម្រ ស្រះដំរី ត្រូវបានចាត់ទុកជាគោលដៅទេសចរណ៍មួយ ដែលគួរទៅទស្សនាក្នុងរដូវកាលបៃតង សម្រាប់អ្នកដែលចង់ស្វែងរកបទពិសោធថ្មី និងស្វែងយល់ពីអរិយធម៌ខ្មែរ។ គួរជ្រាបថា ស្រះដំរី គឺជាអតីតដែនដីរាជធានីបុរាណ«មហិន្ទ្របព៌ត» ដែលស្ថិតនៅខាងត្បូងភូមិថ្មីប្រហែល៤គីឡូម៉ែត្រ ក្នុងឃុំខ្នងភ្នំ ស្រុកស្វាយលើ ខេត្តសៀមរាប។ អ្នកដំណើរអាចទៅដល់ទីនោះបាន តាមរយៈការធ្វើដំណើរដោយម៉ូតូឆ្លងកាត់ព្រៃ ថ្ម និងទីវាលនៅលើខ្នងភ្នំគូលែន៕
