រដ្ឋធានីប៉េកាំង៖ ក្នុងពិធីប្រារព្ធខួបអនុស្សាវរីយ៍លើកទី១០៥ នៃការបង្កើតគណបក្សកុម្មុយនីស្ដចិន (CPC) នៅថ្ងៃទី១ ខែកក្កដា ឆ្នាំ២០២៦នេះ ប្រធានាធិបតីចិន លោក ស៊ី ជីនពីង (Xi Jinping) បានចេញមុខប្រកាសជាថ្មីម្ដងទៀតពីជំហរដាច់ខាត និងមិនអាចកែប្រែបានរបស់រដ្ឋធានីប៉េកាំង ក្នុងការដោះស្រាយបញ្ហាកោះតៃវ៉ាន់ និងការបង្រួបបង្រួមជាតិទាំងស្រុង។

ទីភ្នាក់ងារសារព័ត៌មានរដ្ឋស៊ិនហួ (Xinhua) បានដកស្រង់ប្រសាសន៍របស់លោក ស៊ី ជីនពីង ដែលជាអគ្គលេខាធិការគណបក្សកុម្មុយនីស្ដចិន ដែលបានសង្កត់ធ្ងន់យ៉ាងម៉ឺងម៉ាត់ថា៖«ការដោះស្រាយបញ្ហាតៃវ៉ាន់ និងការសម្រេចបានការបង្រួបបង្រួមជាតិទាំងស្រុងរបស់ប្រទេសចិន គឺជាបេសកកម្មប្រវត្តិសាស្ត្រ និងជាការប្ដេជ្ញាចិត្តដ៏រឹងមាំមិនអាចរង្គោះរង្គើបានឡើយ សម្រាប់គណបក្សកុម្មុយនីស្ដចិន»។ លោកបានបន្តវាយបក និងព្រមានខ្លាំងៗថា រដ្ឋធានីប៉េកាំងនឹងចាត់វិធានការម៉ឺងម៉ាត់បំផុត ដើម្បីកម្ទេចរាល់ក្រុមអបគមន៍ដែលប៉ុនប៉ងទាមទារ «ឯករាជ្យភាពឱ្យតៃវ៉ាន់» ព្រមទាំងប្រឆាំងដាច់ខាតចំពោះការជ្រៀតជ្រែកពីកម្លាំងខាងក្រៅ។

ក្រៅពីបញ្ហាតៃវ៉ាន់ លោក ស៊ី ជីនពីង ក៏បានជំរុញឱ្យមានការរក្សាស្ថិរភាព និងវិបុលភាពរយៈពេលវែង នៅក្នុងតំបន់រដ្ឋបាលពិសេសហុងកុង និងម៉ាកាវ ព្រមទាំងបានបញ្ជាឱ្យពង្រឹងការដឹកនាំដាច់ខាតរបស់គណបក្សទៅលើកងកម្លាំងប្រដាប់អាវុធ ដើម្បីការពារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ជាតិឱ្យបានជាដាច់ខាត៕