រដ្ឋធានីវ៉ាស៊ីនតោន៖ ទីបំផុតទៅ ឯកអគ្គរដ្ឋទូតអ៊ីស្រាអែល និងឯកអគ្គរដ្ឋទូតលីបង់ បានចុះហត្ថលេខាលើកិច្ចព្រមព្រៀងសន្តិភាព នៅរដ្ឋធានីវ៉ាស៊ីនតោន សហរដ្ឋអាម៉េរិក នៅថ្ងៃទី២៦ ខែមិថុនា ឆ្នាំ២០២៦ ដើម្បីបញ្ចប់សង្គ្រាមរវាងប្រទេសទាំង២ ខណៈលីបង់មានមនុស្សជាង ៤ពាន់នាក់បានបាត់បង់ជីវិតរួចទៅហើយ។ 

សហរដ្ឋអាម៉េរិក ក៏ចូលរួមចុះហត្ថលេខាលើកិច្ចព្រមព្រៀងសន្តិភាពនេះដែរ។ កិច្ចព្រមព្រៀងនេះ កើតឡើងបន្ទាប់ពីក្រុមអ្នកចរចារបស់អ៊ីស្រាអែល និងលីបង់ បានជួបចរចាគ្នាអស់ជាច្រើនថ្ងៃមក។ ក្រៅពីការបញ្ចប់សង្គ្រាម ការបង្កើតកិច្ចព្រមព្រៀងនេះ ក៏ដើម្បីស្តារអធិបតេយ្យភាពលីបង់ឡើងវិញផងដែរ។

គេមិនត្រូវមើលរំលងចំណុចមួយនោះទេថា បើទោះជាមានការចុះហត្ថលេខាលើកិច្ចព្រមព្រៀងសន្តិភាពក៏ដោយ ក៏ភាពតានតឹងនៅតែបន្ត ដោយយោធាអ៊ីស្រាអែល បានប្រកាសសម្លាប់សមាជិកហេសបូឡាហ៍៧នាក់ និងបានទម្លាក់ខិត្តបណ្ណបញ្ជាឱ្យប្រជាជនលីបង់ភៀសខ្លួនចេញពីភាគខាងត្បូងនៃទីក្រុងម៉ាន់ស៊ូរី (Mansouri)៕