សុខភាព៖ ការធ្វើមេតាបូលីស សំដៅលើដំណើរការដែលរាងកាយបំលែងអាហារទៅជាថាមពល ដើម្បីធ្វើសកម្មភាពផ្សេងៗប្រចាំថ្ងៃ។ នៅពេលការធ្វើមេតាបូលីសយឺតជាងធម្មតាអាចធ្វើឱ្យឡើងទម្ងន់ និងមានខ្លាញ់ច្រើន។ កត្តាដែលកំណត់ល្បឿននៃការធ្វើមេតាបូលីសរួមមាន៖ ទំហំរាងកាយ ភេទ និងកត្តាអាយុ។ ការធ្វើមេតាបូលីស គឺមិនមានការប្រែប្រួលទេ តែអាចពន្លឿនបានតាមរយៈអាហារ។ ការធ្វើមេតាបូលីសលឿន អាចផ្តល់អត្ថប្រយោជន៍ច្រើនដល់សុខភាពដូចជាបន្ថែមថាមពល មិនងាយអស់កម្លាំង ផ្ចង់អារម្មណ៍បានល្អ និងមិនងាយឡើងទម្ងន់ទៀត។
អាហារទាំង៤នេះ អាចជួយពន្លឿនការធ្វើមេតាបូលីស មានដូចជា៖ ១.គ្រាប់ផ្លែឈើ (Nuts)៖ គ្រាប់ផ្លែឈើ ជាប្រភពនៃប្រូតេអ៊ីន និងជាតិសរសៃ។ ការស្រាវជ្រាវបានបង្ហាញថា អ្នកទទួលទានគ្រាប់ផ្លែឈើជាប្រចាំ តែងមានហានិភ័យទាបនៃភាពស៊ាំអាំងស៊ុយលីន និងមានទំហំចង្កេះតូចជាងអ្នកដែលមិនបានបរិភោគ។ នៅពេលដែលស៊ាំអាំងស៊ុយលីន រាងកាយនឹងមិនស្តុកជាតិខ្លាញ់ច្រើន ឬវិវត្តទៅជាជំងឺទឹកនោមផ្អែមប្រភេទ២។
២.ជាតិកាហ្វេអ៊ីន៖ ជាតិកាហ្វេអ៊ីនអាចជួយដាស់ស្មារតី និងជំរុញដល់ការធ្វើមេតាបូលីសបាន ដោយសារជាតិកាហ្វេអ៊ីន អាចទប់ស្កាត់តំណភ្ជាប់ប្រព័ន្ធសរសៃប្រសាទឈ្មោះ Adenosine ជំរុញឱ្យបញ្ចេញអ័រម៉ូន dopamine និងអ័រម៉ូន norepinephrine។ អ័រម៉ូនទាំងនេះ ជួយដាស់ស្មារតី និងអាចធ្វើឱ្យការហាត់ប្រាណបានយូរ។ ការសិក្សាជាច្រើនបានបង្ហាញថា ជាតិកាហ្វេអ៊ីន ជួយការដុតខ្លាញ់លឿនជាងមុន និងអាចបង្កើនអត្រាការធ្វើមេតាបូលីសប្រហែល ៣-១១ភាគរយ តាមកម្រិតដែលលោកអ្នកទទួលទាន។
៣.សាច់អត់ខ្លាញ់៖ ពេលរំលាយប្រូតេអ៊ីនរាងកាយធ្វើការខ្លាំងជាងពេលរំលាយកាបូអ៊ីដ្រាត ឬខ្លាញ់ ដូច្នេះ បានជាអ្នកជំនាញណែនាំឱ្យបរិភោគសាច់អត់ខ្លាញ់ដូចជា សាច់មាន់ និងសាច់ត្រី ជាដើម។ ដំណើរការរំលាយអាហារ គឺត្រូវការថាមពលច្រើន ហើយរាងកាយដុតកាឡូរី ដើម្បីបំបែកអាហារទាំងនោះ។ ការសិក្សាជាច្រើន ក៏បានបង្ហាញថា ប្រូតេអ៊ីនអាចបង្កើនការដុតកាឡូរីក្រោយអាហារបានរហូតដល់៣៥ភាគរយ។ មួយវិញទៀត រាងកាយត្រូវការប្រូតេអ៊ីន ដើម្បីបង្កើនសាច់ដុំ ហើយពេលមានសាច់ដុំកាន់តែច្រើន ការធ្វើមេតាបូលីសក៏កាន់តែលឿន។
៤.ពពួកសណ្ដែក (Legumes)៖ គ្រាប់សណ្ដែក គឺជាប្រភពប្រូតេអ៊ីន និងជាតិសរសៃ។ រាងកាយប្រើថាមពលច្រើននៅពេលបំបែកជាតិសរសៃ និងប្រូតេអ៊ីន កត្តានេះអាចរក្សាការធ្វើមេតាបូលីសឱ្យមានដំណើរការល្អ។ ជាតិសរសៃខ្ពស់ក្នុងសណ្ដែក ក៏ជួយរក្សាលំនឹងកម្រិតជាតិស្ករក្នុងឈាម និងបង្ការការឃ្លានរបស់ផ្អែមនៅពេលរសៀល។លើសពីនេះ ពពួកសណ្ដែកក៏ផ្តល់ជាតិដែក ស័ង្កសី និងសេលេន្យូម ដែលសុទ្ធតែជាជាតិរ៉ែក្រពេញទីរ៉ូអ៊ីត ត្រូវការដើម្បីផលិតអ័រម៉ូនឱ្យបានគ្រប់គ្រាន់។ បើគ្មានជាតិរ៉ែទាំងនេះ ការធ្វើមេតាបូលីសអាចយឺត ឬចុះខ្សោយ៕ អត្ថបទដកស្រង់ពី៖ Hello គ្រូពេទ្យ
